جىلدامدىقتى ءجيى اسىراتىن InDrive جانە ياندەكس Go جۇرگىزۋشىلەرى تاسىمالدان شەتتەتىلۋى مۇمكىن - كولىك مينيسترلىگى
استانا. KAZINFORM - كولىك مينيسترلىگى جىلدامدىقتى ءجيى اسىراتىن InDrive جانە ياندەكس Go جۇرگىزۋشىلەرىن جولاۋشى تاسىمالداۋدان شەتتەتۋى مۇمكىن. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.

اتالعان شارالاردى ق ر كولىك مينيسترلىگى مەن inDrive، ياندەكس Go اراسىندا جاسالعان ىنتىماقتاستىق تۋرالى مەموراندۋم شەڭبەرىندە جۇزەگە اسىرۋ كوزدەلىپ وتىر.
«قوسىمشانى پايدالانۋشى ادامنىڭ بەرگەن باعاسى مەن جالپى رەيتينگكە سۇيەنە وتىرىپ، جىلدامدىقتى ءجيى اسىراتىن جۇرگىزۋشىلەر جولاۋشىلاردان كەلىپ تۇسكەن تاپسىرىستاردى ورىنداۋدان ۋاقىتشا نەمەسە مۇلدەم شەتتەتىلۋى مۇمكىن. سونداي-اق كولىك جۇرگىزۋشىلەرىنە كولىكتىڭ تەحنيكالىق جاعدايىن تەكسەرۋ قاجەتتىگى جونىندە جانە قاۋىپسىزدىك بەلدىكتەرىنە قاتىستى حابارلامالار كەلىپ تۇراتىن بولادى»، - دەلىنگەن حابارلامادا.
جالپى ق ر كولىك مينيسترلىگى، ىشكى ىستەر مينيسترلىگى، ياندەكس Go جانە inDrive اراسىندا قول قويىلعان مەموراندۋم موبيلدى قوسىمشا وپەراتورىنىڭ تاكسي تاسىمالداۋشىلارىنىڭ اۆتوموبيل كولىگى سالاسىنداعى زاڭناما تالاپتارىن ساقتاۋىن قامتاماسىز ەتۋ بويىنشا شارالاردى كەزەڭ-كەزەڭىمەن قابىلداۋىن كوزدەيدى.
«قۇجاتتى ىسكە اسىرۋ اياسىندا پلاتفورمانىڭ سەرىكتەس-جۇرگىزۋشىلەرىنە ارنالعان ونلاين جانە وفلاين فورماتتا ترەنينگتەر وتكىزۋ جوسپارلانىپ وتىر. وقىتۋ بارىسىندا جول قوزعالىسى ەرەجەلەرى مەن قالاارالىق اۆتوموبيل جولدارىندا قاۋىپسىزدىك ەرەجەلەرىن ساقتاۋ تاقىرىپتارى ەگجەي-تەگجەيلى قاراستىرىلاتىن بولادى. مەموراندۋمدى ازىرلەۋ بارىسىندا كوزدەلگەن باستى ماقسات - رەسپۋبليكالىق جانە جەرگىلىكتى ماڭىزى بار قالاارالىق اۆتوموبيل جولدارىندا، سونداي-اق قالا ىشىندەگى توراپتاردا جول قوزعالىسىنا قاتىسۋشىلاردىڭ قاۋىپسىزدىگىن ارتتىرۋ»، - دەپ حابارلادى ۆەدومستۆونىڭ باسپا ءسوز قىزمەتى.
كومپانيا وكىلدەرىنىڭ ايتۋىنشا، بيىل ەكىنشى توقساننىڭ سوڭىنا قاراي مۇمكىندىگى شەكتەۋلى جانداردىڭ جەكە قاجەتتىلىكتەرى مەن كىشكەنتاي بالالارعا ارنالعان ورىندىقتارعا قاتىستى اقپاراتتى كورسەتۋگە مۇمكىندىك بەرەتىن قوسىمشا فۋنكتسيانى ەنگىزۋ جوسپاردا بار.
ايتا كەتەرلىگى، جىل باسىندا كولىك ءمينيسترى مارات قارابايەۆ موبيلدى تاكسي قىزمەتىنە تاپسىرىس بەرەتىن قوسىمشالار وپەراتورلارىنىڭ وكىلدەرىمەن كەزدەسۋ وتكىزگەن بولاتىن. وتىرىس بارىسىندا اۆتوموبيل كولىگى سالاسىنداعى زاڭنامانىڭ ساقتالۋىن قامتاماسىز ەتۋ قاجەتتىلىگى جانە جولاۋشىلاردى تاسىمالداۋ قاۋىپسىزدىگىنە ىشكى كورپوراتيۆتىك تالاپتاردى ەنگىزۋ ماسەلەلەرى تالقىلانعان ەدى. وتىرىس قورىتىندىسى بويىنشا جولاۋشىلاردى تاسىمالداۋ سالاسىنداعى تۇيتكىلدى ماسەلەلەردى شەشۋ بويىنشا ناقتى شارالاردى ەنگىزۋ ۇسىنىلىپ، ناتيجەسىندە بۇل شارالار مەموراندۋمدا كورىنىس تاپتى. سونداي- اق تاكسي اگرەگاتورىنىڭ وكىلدەرىنە جۇرگىزۋشىلەردىڭ جۇمىس جانە دەمالىس ءتارتىبىن ساقتاۋ تالاپتارىن كۇشەيتۋ ۇسىنىلعان بولاتىن.