جىلۋعا جاۋاپتى مينيسترلەر جينالىستارىن قىسقارتىپ، جىلۋ ورتالىقتارىن قاداعالاسىن - دەپۋتات

جىلۋ بەرۋ جۇيەسىنە بولىنگەن قاراجاتتىڭ ەسەبىنە قاتاڭ تالداۋ جاسالىپ، ءاربىر جەمقور قاتاڭ جازالانۋى كەرەك. بۇل تۋرالى ءماجىلىستىڭ جالپى وتىرىسىندا ەرلان سايروۆ ءمالىم ەتتى، دەپ حابارلايدى Kazinform.

«پرەزيدەنت قاسىم-جومارت كەمەل ۇلى توقايەۆ ۇكىمەت الدىندا ەلىمىزدىڭ تۇرعىندارىن جىلۋمەن تۇراقتى قامتاماسىز ەتۋ بويىنشا ناقتى تاپسىرمالار بەردى. دەگەنمەن، ءبىرىنشى اياز تۇسكەندە ەلىمىزدىڭ كوممۋنالدىق ينفراقۇرىلىمىنىڭ سىر بەرە باستاۋى داستۇرگە اينالىپ وتىر. راس، رەسپۋبليكا بويىنشا توزىعى جەتكەن جىلۋ ورتالىقتارى مەن ينفراقۇرىلىم 80 پايىزدان اسىپ كەتتى. ال ولاردىڭ كوبىن ءبىز 50 جىلدان استام ۋاقىت پايدالانىپ كەلەمىز. بۇل - قاۋىپتى جاعداي. بىلتىرعى ەكىباستۇز، ريددەر، بالحاش، كوكشەتاۋ، قاراعاندى، تەمىرتاۋ، پەتروپاۆل قالالارىنداعى اپاتتار قوردالانعان ماسەلەلەردىڭ ايقىن كورىنىسى. سوعان قاراماستان، ءبىز جىلىنا بۇل سالادا تەك 5-7 پايىزعا عانا جاڭارىپ وتىرمىز. بۇل ءتىپتى، ەلدەگى ەسكىرۋ ءۇردىسىنىڭ ورنىن تولتىرمايدى. ولاي جالعاسا بەرسە، جىلۋ ەنەرگەتيكاسىنداعى كوللاپس ورناۋى بەك مۇمكىن»، - دەدى ە. سايروۆ پرەمەر- ءمينيستردىڭ ءبىرىنشى ورىنباسارى رومان سكلياردىڭ اتىنا جولداعان ساۋالىندا.

بۇل تۇرعىدا ول بىلتىر عانا جىلۋ سالاسىنداعى ينفراقۇرىلىمنىڭ توزۋىن ازايتۋ ماقساتىندا ارنايى 160 ميلليارد تەڭگە قارجى بولىنسە دە، سالاداعى پروبلەمالارعا توتەپ بەرۋ قيىنعا ءتۇسىپ جاتقانىن ايتتى.

«جىل باسىندا پارلامەنتتە جوعارعى اۋديتورلىق پالاتاسىنىڭ «جىلۋمەن جابدىقتاۋ سالاسى» بويىنشا قورىتىندى ەسەبىندە 100-دەن اسا ناقتى ۇسىنىس پەن جۇيەلى سىندار ايتىلدى. ۇسىنىس رەتىندە بەرىلدى. ءبىراق، سول ۇسىنىستار بويىنشا نە جاۋاپ، نە اتقارىلعان ءىستى كورمەدىك. وسىلاي ءتىزىپ كەتە بەرۋگە بولادى. سوندىقتان بۇل سالاداعى مەنەدجمەنت پەن باقىلاۋدى كۇشەيتۋىمىز كەرەك»، - دەدى دەپۋتات.

بۇل رەتتە ە. سايروۆ ءبىرقاتار ۇسىنىسىن جاريالادى.

«وسى ورايدا الداعى 3 اي قىس ۋاقىتىندا جاۋاپتى مينيسترلەر جىلى كابينەتتەرىنەن شىعىپ، بارلىق جينالىستارىن قىسقارتىپ، جىلۋ ورتالىقتارىنىڭ باس-قاسىندا وسىنداي ايازدى كۇندەرى ءجۇرۋى كەرەك. ەكىنشىدەن، 2022-2023 -جىلدارى بولىنگەن قاراجاتتىڭ ەسەبىنە قاتاڭ تالداۋ جاسالۋى ءتيىس. بۇل سالاداعى ءاربىر جەمقور قاتاڭ جازالانۋى كەرەك. ۇشىنشىدەن، وسى كۇندەرى وڭىرلەردەگى جەدەل شتابتاردىڭ جۇمىسىن «ەكى ەسەلەنگەن 24/7 رەجيمىنە» كوشىرۋ قاجەت. تورتىنشىدەن، اكىمدىكتەر مەن ۇكىمەت وسى سالاداعى وڭىرلىك قاۋىپتى زونالار بويىنشا «تاۋەكەل كارتاسىن» دايارلاپ، ولار بويىنشا ناقتى ماقساتتى الگوريتم جوسپارىن دايارلاپ قويۋى ءتيىس»، - دەدى ەرلان سايروۆ.

اۆتور

رۋسلان عابباسوۆ