جىلدامدىقتى 2 كيلومەتر/ساعاتقا اسىرساڭ ايىپپۇل: ءى ءى م جاڭا ەرەجەگە تۇسىنىكتەمە جاسادى
استانا. KAZINFORM - الەۋمەتتىك جەلىدە «جىلدامدىقتى تىركەۋ شەگى تومەندەپ، ەندى ساعاتىنا 2 شاقىرىمعا اسىرۋدىڭ وزىنە ايىپپۇل سالىنادى» دەگەن مازمۇنداعى ۆيدەو تارادى، دەپ حابارلايدى ىشكى ىستەر مينيسترلىگى.
ۆەدومستۆو مالىمەتىنشە، بۇل اقپارات شىندىققا سايكەس كەلمەيدى.
- قۇقىق بۇزۋشىلىق ءۇشىن جاۋاپكەرشىلىككە تارتۋ ءتارتىبى وزگەرگەن جوق. بۇرىنعىداي اكىمشىلىك جاۋاپكەرشىلىك بەلگىلەنگەن جىلدامدىقتى ساعاتىنا 10 شاقىرىمعا جانە ودان جوعارى اسىرعان جاعدايدا عانا قولدانىلادى، - دەيدى ءى ءى م اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.
8-مامىردان باستاپ كۇشىنە ەنەتىن بىرلەسكەن بۇيرىق تەك كامەرالاردىڭ جۇمىس تارتىبىنە قاتىستى، ياعني ولاردىڭ ولشەۋ دالدىگى مەن رۇقسات ەتىلگەن قاتەلىك شەگىن ناقتىلايدى. بۇل قۇجات جۇرگىزۋشىلەرگە ەشقانداي جاڭا تالاپ ەنگىزبەيدى جانە جاۋاپكەرشىلىككە تارتۋ شەگىنە اسەر ەتپەيدى.
- وسىلايشا «ساعاتىنا 2 شاقىرىمعا اسىرۋ ءۇشىن ايىپپۇل سالىنادى» دەگەن مالىمدەمەلەر - جالعان اقپارات. اتالعان اقپاراتتى تاراتقان تۇلعا انىقتالدى. قوستاناي وبلىسى رۋدنىي قالاسىنىڭ تۇرعىنى سوت شەشىمىمەن اكىمشىلىك جاۋاپكەرشىلىككە تارتىلدى. ازاماتتاردى تەك رەسمي اقپارات كوزدەرىنە سۇيەنۋگە جانە تەكسەرىلمەگەن مالىمەتتەردى تاراتپاۋعا شاقىرامىز، - دەدى اقتوتى بورانوۆا.
بۇعان دەيىن اقتوبەدە جىل باسىنان بەرى جول-كولىك اپاتىنان 27 ادام كوز جۇمعانىن جازعان ەدىك.
