جىلاندار جەر سىلكىنىسىن 7 كۇن بۇرىن سەزە المايدى - عاني نازاربەك

تۇركىستان. KAZINFORM - بۇگىن الەۋمەتتىك جەلىدە قار ۇستىندە جورعالاعان جىلاننىڭ ۆيدەوسى تارادى. اۆتور وقيعانىڭ قازىعۇرت اۋدانىندا بولعانىن جازعان.

«26- قاڭتار. جىلاننىڭ ءجۇرىسىن قارا»، - دەيدى ۆيدەونى جەلىگە جۇكتەگەن ازامات.

جازبانىڭ استىنا پىكىر جازعاندار قىسقى مەزگىلدە قالىڭ ۇيقىعا كەتەتىن جورعالاۋشىنىڭ بۇل ارەكەتىنە ءار ءتۇرلى باعا بەرىپ جاتىر. ءبىرى «جەر سىلكىنىسىن 7 كۇن بۇرىن بىلگەن جىلاندار، جەر بەتىنە شىعىپ كەتتى» دەسە، ەندى ءبىرى «جەردىڭ استى تىنىش بولماي تۇر» دەيدى. سونداي-اق جەلى قولدانۋشىلارى «جىلى ورنىنان جايدان-جاي شىقپاسا كەرەك»، «جىلان جەر سىلكىنىسىن الدىن الا سەزەدى دەيتىن. قار بەتىنە شىعىپ كەتكەنى سونى مەڭزەيدى. تىنىشتىق بولسىن!»، «ءشوپتىڭ ىشىندە جاتقان جىلان عوي. مالعا ازىق شاشقاندا اراسىنان شىققان سياقتى»، «كۇن جىلىنۋىنىڭ شىرايى» دەگەن سارىنداعى پىكىرلەر دە جازعان.

اتالعان جاعدايعا بايلانىستى «سىرداريا - تۇركىستان» مەملەكەتتىك وڭىرلىك تابيعي پاركىنىڭ عىلىمي قىزمەتكەرى عاني نازاربەكتەن تابيعي قۇبىلىستىڭ جاي-جاپسارىن سۇرادىق.

«بۇل جەردە جىلان جۇرگەن ايماقتى زەرتتەپ كورۋ كەرەك. سەبەبى، سول ماڭدا قۇرىلىس جۇمىستارى ءجۇرىپ جاتقان بولۋى دا مۇمكىن. گاز قۇبىرىن، سۋ قۇبىرىن تارتۋعا جەر قازىلسا، ۇيقىدا جاتقان جىلاندار ويانىپ كەتەدى. سونداي-اق قازىر ۇيىندە جىلان اسىرايتىندار كوپ. ولار دا «حايپ» ءۇشىن جىلاندى قار ۇستىنە تاستاپ ۆيدەو ءتۇسىرىپ جاتادى. جالپى جىلاندار جەر استىندا بولعان سوڭ، جەر سىلكىنىسى سەكىلدى تابيعي قۇبىلىستاردى سەزەدى. ءبىراق ءبىر جەتى ەمەس، 10-15 مينۋت بۇرىن، ارى كەتكەندە 1 ساعات بۇرىن عانا سەزە الادى. جەر سىلكىنىسىن سەزگەن جاعدايدا ءبىر-ەكەۋى عانا ەمەس، سىرتقا جاپپاي شىعىپ كەتۋى كەرەك. تەك جىلاندار عانا ەمەس، تاسباقا، سارىشۇناق سەكىلدى جەر استىندا ءومىر سۇرەتىن بارلىق جانۋار مەن جاندىك جەر ۇستىنە شىعادى»، - دەپ جاۋاپ بەردى عاني نازاربەك.