جەڭىل جاتتىعۋلار اۋىرسىنۋدى باساتىن دارىلەردى الماستىرا الادى - زەرتتەۋ

Adelaide University زەرتتەۋشىلەرى بۇرىن جاريالانعان 157 جۇيەلى شولۋدى، 2736 راندوميزاتسيالانعان كلينيكالىق سىناقتى جانە 221279 قاتىسۋشىنىڭ دەرەكتەرىن بىرىكتىرگەن. بۇل جاتتىعۋدىڭ كلينيكالىق اۋىرسىنۋعا اسەرىن قاراستىرعان ەڭ اۋقىمدى جيناقتالعان تالداۋلاردىڭ ءبىرى.

ناتيجەسىندە فيزيكالىق جاتتىعۋ تىرەك-قيمىل جۇيەسى اۋرۋلارىندا عانا ەمەس، نەۆرولوگيالىق، قابىنۋ جانە قاتەرلى ىسىكپەن بايلانىستى اۋىرسىنۋدا دا ورتا ەسەپپەن وڭ اسەر كورسەتكەن. ءتيىمدى تاسىلدەردىڭ قاتارىندا اەروبتىق جانە كۇش جاتتىعۋلارى، يوگا، پيلاتەس پەن تاي-چي بار.

جالپى العاندا، جاتتىعۋ اۋىرسىنۋدى 0 دەن 10 عا دەيىنگى شكالا بويىنشا شامامەن 1,1 بالعا تومەندەتكەن. ۋنيۆەرسيتەتتىڭ تۇسىندىرۋىنشە، بۇل كورسەتكىش بولەك جۇرگىزىلگەن سوزىلمالى اۋىرسىنۋ زەرتتەۋلەرىندەگى كەيبىر كەڭ قولدانىلاتىن دارىلەردىڭ ورتاشا اسەرىنەن شامامەن %60 جوعارى بولعان. الايدا بۇل جاتتىعۋ مەن ءدارىنى تىكەلەي سالىستىرعان كلينيكالىق سىناق ەمەس، سوندىقتان جاتتىعۋ ءدارىنى مىندەتتى تۇردە الماستىرادى دەگەن قورىتىندى جاساۋعا بولمايدى.

زەرتتەۋدىڭ ەڭ قىزىق ناتيجەلەرىنىڭ ءبىرى - كوبىرەك جاتتىعۋ ءاردايىم جاقسى ناتيجە بەرمەگەنى. تومەن قارقىندى باعدارلامالار ورتاشا جانە جوعارى قارقىندى جاتتىعۋلارعا قاراعاندا اۋىرسىنۋدى كوبىرەك ازايتقان. سونداي-اق 12 اپتادان قىسقا باعدارلامالار ۇزاق مەرزىمدى باعدارلامالارعا قاراعاندا جوعارى اسەر كورسەتكەن.

اپتاسىنا ەكى ساعاتتان از ۋاقىتقا سوزىلاتىن جاتتىعۋلار دا ايتارلىقتاي ناتيجە بەرگەن. زەرتتەۋ اۆتورلارىنىڭ پىكىرىنشە، بۇل سوزىلمالى اۋىرسىنۋى بار ادامدار ءۇشىن ماڭىزدى، ويتكەنى كۇردەلى ءارى ۇزاق جاتتىعۋ جوسپارىن ورىنداۋ ولاردىڭ جاعدايىندا قيىن بولۋى مۇمكىن.

عالىمدار فيزيكالىق بەلسەندىلىكتىڭ اۋىرسىنۋعا بىرنەشە جولمەن اسەر ەتۋى مۇمكىن ەكەنىن ايتادى. جاتتىعۋ كەزىندە اعزا ەندورفين مەن سەروتونين سياقتى زاتتار بولەدى، ولار اۋىرسىنۋدى قابىلداۋ دەڭگەيىنە ىقپال ەتەدى. سونىمەن بىرگە تۇراقتى قوزعالىس قابىنۋ پروتسەستەرىن تومەندەتۋگە، كوڭىل كۇيدى جاقسارتۋعا جانە ميدىڭ اۋىرسىنۋ سيگنالدارىن وڭدەۋ ءتاسىلىن وزگەرتۋگە كومەكتەسۋى مۇمكىن.

سوعان قاراماستان، زەرتتەۋشىلەر جاتتىعۋدى امبەباپ اۋىرسىنۋدى باساتىن قۇرال دەپ قاراستىرمايدى. ونىڭ اسەرى اۋىرسىنۋدىڭ سەبەبىنە، ادامنىڭ دەنە دايىندىعىنا، دەنساۋلىق جاعدايىنا جانە جاتتىعۋدى قانشالىقتى تۇراقتى ورىندايتىنىنا بايلانىستى.

اۆتورلاردىڭ ايتۋىنشا، پروبلەما دارىگەرلەردىڭ پاتسيەنتتەرگە كوبىنە جاي عانا «كوبىرەك قوزعالىڭىز» دەپ كەڭەس بەرۋىندە. بولاشاقتا اۋىرسىنۋدىڭ ناقتى تۇرىنە قاراي قانداي جاتتىعۋ، قانداي قارقىن جانە قانشا ۋاقىت قاجەت ەكەنىن ءدارى سەكىلدى ناقتى مولشەرلەپ تاعايىنداۋعا مۇمكىندىك بەرەتىن ۇسىنىمدار قاجەت.

زەرتتەۋ pain Reports جۋرنالىندا جاريالانعان. دالەلدەردىڭ جالپى سەنىمدىلىگى GRADE جۇيەسى بويىنشا ورتاشا دەڭگەيدە باعالانعان.