جىل باسىنان بەرى قانشا ادام مەملەكەتتەن اتاۋلى الەۋمەتتىك كومەك العانى بەلگىلى بولدى

استانا. قازاقپارات - 2024-جىلعى 1-قاراشادا 76 مىڭ وتباسىنداعى 403 مىڭ ادامعا اتاۋلى الەۋمەتتىك كومەك تاعايىندالدى. بيىل وسى ماقساتقا بيۋجەتتەن 54,7 ميلليارد تەڭگە قاراستىرىلعان.

بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى ءمالىم ەتتى.

اتاۋلى الەۋمەتتىك كومەكتىڭ نەگىزگى ماقساتى - اقشالاي تولەم تۇرىندە قولداۋدى جۇزەگە اسىرۋ جانە وتباسىنىڭ ەڭبەككە قابىلەتتى مۇشەلەرىن جۇمىسپەن قامتۋعا جاردەمدەسۋدىڭ بەلسەندى شارالارىنا تارتۋ ارقىلى وتباسىن قيىن ومىرلىك جاعدايدان شىعارۋ.

ا ا ك مىنالاردى كوزدەيدى:

- تابىسى وڭىرلىك ەڭ تومەن كۇنكورىس دەڭگەيىنىڭ %70 نان اسپايتىن ازاماتتارعا توقسان سايىن الەۋمەتتىك كومەك تاعايىنداۋ؛

- تابىسى از وتباسىلارداعى 1 جاس پەن 6 جاس ارالىعىنداعى ءار بالاعا 1,5 ا ە ك (5538 تەڭگە) مولشەرىندە اي سايىنعى قوسىمشا تولەم بەرۋ. 2024-جىلعى 1-قاراشاعا ا ا ك الۋشىلار قاتارىنان مەكتەپ جاسىنا دەيىنگى 126 مىڭ بالاعا 4,5 ميلليارد تەڭگە سوماسىنا قوسىمشا تولەم تاعايىندالدى؛

- جۇمىسقا ورنالاستىرۋ، ءوز ءىسىن اشۋعا نيەتتى وتباسىلارعا گرانتتار بەرۋ، بىلىكتىلىكتى ارتتىرۋ كۋرستارىنا جىبەرۋ (قاجەت بولعان جاعدايدا) جانە باسقالار ارقىلى جۇمىسپەن قامتۋعا جاردەمدەسۋ.

قازىرگى ۋاقىتتا قازاقستاندىقتار ا ا ك تاعايىنداۋعا ءوتىنىشتى تۇرعىلىقتى جەرى بويىنشا مانساپ ورتالىعىندا، اۋىل وكرۋگىنىڭ اكىمىنە سونداي-اق ەلەكتروندىق ۇكىمەت پورتالى (egov.kz) ارقىلى بەرە الادى.

بۇعان دەيىن جىل باسىنان بەرى كوپبالالى وتباسىلار 390 ميلليارد تەڭگەگە جۋىق جاردەماقى العانىن جازعان بولاتىنبىز.