جىل باسىنان بەرى 60 قا جۋىق ادام كاسىپورىندا قازا تاپتى
استانا. KAZINFORM - ەلىمىزدە جۇمىس ورنىندا جاراقات الىپ، قازا تابۋ كورسەتكىشى %31 كوبەيگەن. بۇل تۋرالى «ادىلدىك جانە وركەندەۋ» قوعامدىق قورىنىڭ جيىنىندا حابارلاندى.
قور قىزمەتىنىڭ نەگىزگى باعىتى - ەڭبەك ادامىنىڭ قۇقىعىن قورعاۋ، وتاندىق كاسىپورىندارداعى ەڭبەك قاۋىپسىزدىگىن ارتتىرۋ. رەسمي ستاتيستيكا وسى جىلدىڭ العاشقى 4 ايىندا قازاقستاندىق كاسىپورىنداردا 496 جۇمىسشى جاراقاتتانىپ، 59 ادام قازا تاپقانىن كورسەتكەن. بۇل وتكەن جىلعى وسى كەزەڭمەن سالىستىرعاندا %31,1 ارتىق.
«ءبىزدىڭ مىندەتىمىز - ازاماتتىڭ قۇقىعى مەن مۇددەسىن قورعاۋ، جۇمىسشى مەن جۇمىس بەرۋشى اراسىندا كونسترۋكتيۆتى ديالوگ ورناتۋ، سالالىق ۇ ە ۇ- مەن، كاسىپوداقتارمەن كەلەلى كەلىسسوز جۇرگىزۋ. ءبىز ءوز قىزمەتىمىزدە «قوعامدىق باقىلاۋ تۋرالى» زاڭنىڭ بارلىق مۇمكىندىكتەرىن پايدالانامىز. بۇل بىزگە وزەكتى پروبلەمالاردى انىقتاۋعا، ونى شەشۋگە، مەملەكەتتىك باسقارۋعا قاتىسىپ، اتقارۋشى بيلىك پەن جۇمىس بەرۋشىلەردىڭ ءىس- ارەكەتىنىڭ اشىقتىعىن قامتاماسىز ەتۋگە مۇمكىندىك بەرەدى»، - دەدى قور ديرەكتورى دانا رىسمۇحامەدوۆا.
قوعامدىق قور قازاقستاندىقتار اراسىندا اۋقىمدى ساۋالناما جۇرگىزىپ، ءار ايماق تۇرعىندارىن الاڭداتقان ماسەلەلەردى انىقتاعان. ساۋالناما ناتيجەسى قوردىڭ ءىس- ارەكەتتەر جوسپارىنا نەگىز بولدى. ەڭبەك قۇقىعىن قورعاۋدان بولەك، قازاقستاندىقتار ءومىر ساپاسىن ارتتىرۋدى، كەدەيلىكپەن كۇرەسۋدى، بيلىك ورگاندارىنىڭ ارەكەتىنە باقىلاۋ ورناتۋدى قالايدى.
«ەڭبەك جانە حالىقتى الەۋمەتتىك قورعاۋ مينيسترلىگى وسىدان ەكى جىل بۇرىن وندىرىستە جاراقاتتانۋدى ازايتۋ ماقساتىندا ەڭبەك قاۋىپسىزدىگى مەن ونى قورعاۋدى قامتاماسىز ەتۋگە جاۋاپتى قىزمەتكەرلەردى دايارلاۋ تالاپتارى كۇشەيتىلگەنىن مالىمدەگەن. سول ۋاقىتتان بەرى وندىرىستەگى جازاتايىم وقيعا مەن جاراقاتتارى ازايدى ما؟ «قازتسينك جانە قارمەتتەگى» پروبلەمالار، «قازاقمىس» پەن «مايقايىڭ التىنداعى» وقيعالار وتاندىق كاسىپورىندارداعى ەڭبەك قاۋىپسىزدىگىن كۇشەيتۋ كەرەكتىگىن كورسەتىپ وتىر، سول سەبەپتى الەۋمەتتىك باقىلاۋدى كۇشەيتۋ كەرەك. ءبىز توتەنشە جاعداي مينيسترلىگىنە قاراستى ونەركاسىپتىك قاۋىپسىزدىك دەپارتامەنتىمەن بىرلەسە كاسىپورىندارعا كىرىپ، ونداعى ەڭبەك قاۋىپسىزدىگىنىڭ ساقتالۋىن قاداعالاۋدى جوسپارلاپ وتىرمىز»، - دەدى قوردىڭ ۇلىتاۋ وبلىسى بويىنشا وكىلدىك جەتەكشىسى، كەنشى ءشامشى حامزە.
