جىل باسىنان بەرى 21 مىڭعا جۋىق ماس جۇرگىزۋشى ۇستالعان

استانا. KAZINFORM - جىل باسىنان بەرى 25 مىڭنان استام جۇرگىزۋشى كولىك باسقارۋ قۇقىعىنان ايىرىلعان. بۇل تۋرالى ق ر ءى ءى م اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ ايتتى.

«جۇرگىزۋشى تارتىبىنە باقىلاۋ كۇشەيتىلدى. 21 مىڭعا جۋىق ماس جۇرگىزۋشى ۇستالدى. 10 مىڭعا جۋىق قارسى جولاققا شىعۋ دەرەكتەرىنىڭ جولى كەسىلدى. 25 مىڭنان استام جۇرگىزۋشى كولىك باسقارۋ قۇقىعىنان ايىرىلىپ، 20 مىڭنان استام قۇقىق بۇزۋشى اكىمشىلىك قاماۋعا الىندى. 400 مىڭعا جۋىق جاياۋ جۇرگىنشىگە ايىپپۇل سالىندى. جالپى، 2024 -جىلى 10 ميلليوننان استام جول ەرەجەسىن بۇزۋ فاكتىلەرى انىقتالدى. بۇل بىلتىرعى جىلعا قاراعاندا 3 ميلليونعا ارتىق. ول ءۇشىن اۆتوماتتى تۇردە تىركەۋ كامەرالارى بەلسەندى قولدانىلۋدا. ولاردىڭ كومەگىمەن 7 ميلليوننان استام جول ەرەجەسىن بۇزعاندار انىقتالدى»، - دەدى اكىمشىلىك پوليتسيا كوميتەتىنىڭ ءتوراعاسى و ك ق الاڭىندا وتكەن باسپا ءسوز ءماسليحاتىندا.

سونداي-اق قايسار سۇلتانبايەۆ اۆتوكولىك جولدارىن كۇتىپ ۇستاۋ جانە جول ءجۇرىسىن ۇيىمداستىرۋ جۇمىستارى جايلى ايتا كەلە، بۇل سالادا 38 مىڭنان استام تەكسەرۋ جۇرگىزىلىپ، جولداردى كۇتىپ ۇستاۋدا 36 مىڭنان استام كەمشىلىك انىقتالعانىن اتاپ ءوتتى. وسىعان قاتىستى 5,5 مىڭعا جۋىق لاۋازىمدى تۇلعا اكىمشىلىك جاۋاپكەرشىلىككە تارتىلعان.

بۇگىندە جولداردى كۇتىپ ۇستاۋ قاعيدالارىن بۇزعانى ءۇشىن سالىناتىن ەڭ تومەنگى ايىپپۇل - 55380 تەڭگە.

سپيكەردىڭ ايتۋىنشا، جولداعى جاعدايدى باقىلاۋ اياسىندا پوليتسيا تاراپىنان جۇيەلى شارالار قابىلدانىپ جاتىر. «قاۋىپسىز جول»، «اۆتوبۋس»، «اۆتوكولىك»، «ابايلاڭىز، بالالار!» سەكىلدى جەدەل پروفيلاكتيكالىق شارالار وتكىزىلىپ تۇرادى.

ايتا كەتەيىك، بۇعان دەيىن ەلىمىزدى بيىل 22 مىڭنان استام جول اپاتى تىركەلىپ، 2 مىڭ ادام قازا بولعانىن جازعان ەدىك.

اۆتور
ەربول جانات