جىبەك جولى تۋريستىك پويىزى العاش رەت سامارقاندقا باردى
الماتى. KAZINFORM - الماتى قالاسىنان ەكىنشى رەت ساپارعا شىققان Jibek joly تۋريستىك پويىزى سامارقاند قالاسىنا جەتتى.
Jibek joly تۋريستىك پويىزى العاش رەت سامارقاندقا باردى. بۇل تۋريستىك پويىزدىڭ ەكىنشى ساپارى. العاشقى جولىندا Jibek joly پويىزى تاشكەنت قالاسىنان قايتقان بولاتىن. وسى جولى قازاقستاندىق ساياحاتشىلار «الماتى - تۇركىستان - تاشكەنت - سامارقاند - شىمكەنت - الماتى» باعىتى بويىنشا جول ءجۇرىپ كەلەدى. سونداي-اق Kazakh Tourism ۇيىمداستىرۋىمەن ساياحاتشىلار قاتارىنا ب ا ق وكىلدەرى مەن وتاندىق بلوگەرلەر قوسىلدى.
قازاقستان مەن وزبەكستاننىڭ كورىكتى جەرلەرىنە جول تارتاتىن پويىز العاش رەت 2024 -جىلدىڭ قاراشا ايىندا ىسكە قوسىلدى. تۋر 5 كۇنگە سوزىلدى.
بۇل جوبا مەملەكەت باسشىسىنىڭ ءتۋريزمدى دامىتۋ جونىندەگى تاپسىرماسىنا سايكەس «قازاقستان تەمىر جولى» ۇلتتىق كومپانياسىنىڭ ۇيىمداستىرۋىمەن جۇزەگە اسىرىلدى. جوبانى دامىتۋعا قر كولىك مينيسترلىگى، تۋريزم جانە سپورت مينيسترلىگى، الماتى قالاسى مەن تۇركىستان وبلىسىنىڭ اكىمدىكتەرى، سونداي-اق، «وزبەكستان تەمىر جولدارى» كومپانياسى سەرىكتەس رەتىندە ۇلەس قوستى.
