«جولداس توقايەۆ جاۋ شەبىنە ءبىرىنشى بولىپ باسىپ كىردى» - رەسەي قورعانىس مينيسترلىگى بىرەگەي قۇجاتتى جاريالادى
استانا. KAZINFORM - رەسەيدىڭ قورعانىس مينيسترلىگى قازاقستان پرەزيدەنتى قاسىم-جومارت توقايەۆتىڭ اكەسى - گۆارديا سەرجانتى كەمەل توقايەۆقا قاتىستى ماراپاتتاۋ پاراعىن قۇپياسىزداندىرىپ، كوپشىلىككە جاريالادى.
كەمەل توقايەۆ 1945-جىلى قاڭتاردا پولشادا كورسەتكەن ەرلىگى مەن باتىرلىعى ءۇشىن II دارەجەلى وتان سوعىسى وردەنىمەن ماراپاتتالعان، دەپ حابارلايدى Kazinform KeyNews-كە سىلتەمە جاساپ.
7-جەكە گۆارديالىق لومجينسك اۋىر تانك شابۋىل پولكىنىڭ كومانديرى، گۆارديا پودپولكوۆنيگى افاناسي پوۆاروۆ قول قويعان قۇجاتتا بىلاي دەلىنگەن:
«1945-جىلى 21-قاڭتاردا ەگليەۆەتس ەلدى مەكەنىنىڭ سولتۇستىك-باتىس اۋماعىندا (پولشاداعى مازوۆەتسك ۆويەۆودالىعىنا قاراستى) نەمىستەر تۇندە ءبىزدىڭ پوزيتسيالارعا قارسى شابۋىل جاسادى. اۆتوماتشىلار ءوز تانكتەرىن تايسالماي قورعاپ، كەيىن قارسى شابۋىلعا شىعىپ، نەمىستەردى شەگىندىردى. جولداس توقايەۆ جاۋ شەبىنە ءبىرىنشى بولىپ باسىپ كىرىپ، اۆتوماتىمەن 5 نەمىستى اتىپ ءولتىردى جانە ءبىر جارالى نەمىستى تۇتقىنعا الدى. تۇتقىندى ءوز بولىمشەسىنە اكەلە جاتقاندا، توقايەۆتىڭ اياعىنا جارىلعىش وق ءتيىپ، جارالاندى (باستاپقى ماشينكامەن تەرىلگەن «…جانە اياعىنان ايىرىلدى» دەگەن سويلەم سىزىلىپ تاستالعان). توقايەۆ جارالى نەمىستى اتىپ ءولتىرىپ، جاراسىن تاڭىپ، ءوز تانكتەرىنە جەتتى».
بۇل كۇنى نەمىس مەرگەنى جارىلعىش وقپەن كەمەل توقايەۆتىڭ بالتىرىن جارالاعان. جاۋىنگەر ورالدىڭ ار جاعىنا ەۆاكۋاتسيالانىپ، دارىگەرلەر ونىڭ اياعىن كەسۋدى ۇيعارعان. الايدا سول كەزدەگى جاس دارىگەر - كەيىن الەمگە ايگىلى حيرۋرگ اتانعان گاۆريل يليزاروۆ ونى امان الىپ قالدى. وسى ساتتە يليزاروۆ كەمەل توقايەۆقا سۇيەك دەفورماتسيالارىن ەمدەۋگە ارنالعان بولاشاق ونەرتابىسىنىڭ - بىرەگەي قۇرىلعىسىنىڭ العاشقى نوبايلارىن قولدانعان.
ايتا كەتەيىك، جەڭىستىڭ 80 جىلدىعىنا وراي پرەزيدەنت تەلەراديوكەشەنى ەرەكشە جوبانى ىسكە قوستى. Kazinform اگەنتتىگىنىڭ فوتومۇراعاتىنداعى ەكىنشى دۇنيەجۇزىلىك سوعىس جىلدارى كەزىندە تۇسىرىلگەن سيرەك سۋرەتتەر جاڭا تەحنولوگيا كومەگىمەن ءتۇرلى تۇسكە بويالىپ، قيمىلدايدى. جوبا ەلىمىزدىڭ تەمىرجول ۆوكزالدارى مەن اۋەجايلارىنداعى LED ەكرانداردان كورسەتىلىپ ءجۇر.
ال 5-مامىردا استاناداعى «نۇرلى جول» ۆوكزالىندا «ق ت ج» ۇ ك» ا ق قولداۋىمەن «جەڭىستىڭ 80 جىلدىعى. KAZINFORM فوتوشەجىرەسى» اتتى فوتوكورمە اشىلدى.
