جولاۋشىلارىنا قىزمەت كورسەتپەگەن: FlyArystan مەن SCAT كومپانيالارى ايىپپۇل ارقالادى
استانا. KAZINFORM - جازعى كەزەڭدە رەيستەر سانىنىڭ ۇلعايۋىنا بايلانىستى ق ر زاڭناماسىندا كوزدەلگەن قىزمەتتەردى ۋاقتىلى كورسەتپەۋ نەمەسە رەيستى كەشىكتىرۋ كەزىندە قىزمەتتەردى كورسەتپەۋ تۋرالى اۋەكومپانيالارعا جولاۋشىلاردىڭ شاعىمدارى جيىلەپ كەتتى.
وسىعان بايلانىستى، ق ر كولىك مينيسترلىگىنىڭ ازاماتتىق اۆياتسيا كوميتەتى رەيستەردىڭ كەشىگۋى كەزىندە قىزمەتتەردى تيىسىنشە ۇسىنۋ بولىگىندە قازاقستان رەسپۋبليكاسىنىڭ قولدانىستاعى زاڭناماسىنىڭ تالاپتارىن بۇزعانى ءۇشىن وتاندىق جانە شەتەلدىك اۋەكومپانيالاردى جاۋاپكەرشىلىككە تارتۋ بويىنشا جۇمىستى جالعاستىرۋدا.
«ماسەلەن، الماتى - قاراعاندى باعىتى بويىنشا رەيس كىدىرتىلگەن كەزدە قىزمەتتەردى ۇسىنباۋعا بايلانىستى (جولاۋشىلار قوناق ۇيگە ورنالاستىرىلمادى، سونىمەن قاتار جولاۋشىلاردى اۋەجايدان قوناق ۇيگە جانە كەرى تاسىمالداۋ ۇيىمداستىرىلمادى) اعىمداعى جىلدىڭ 11-شىلدەسىندە «FlyArystan» اۋە كومپانياسىنا قاتىستى ق ر «اكىمشىلىك قۇقىق بۇزۋشىلىق تۋرالى» كودەكسىنىڭ 567-بابىنىڭ 2-بولىگى بويىنشا اكىمشىلىك قۇقىق بۇزۋشىلىق تۋرالى حاتتاما جاسالدى، وعان سايكەس اۋە كومپانياعا 1000 ا ە ك (3692000 تەڭگە) مولشەرىندە ايىپپۇل سالىندى.
بۇعان دەيىن، سونداي-اق اتىراۋ- الماتى باعىتى بويىنشا رەيستى كەشىكتىرگەن كەزدە ءتيىستى قىزمەت كورسەتپەگەنى ءۇشىن اعىمداعى جىلدىڭ 24-ماۋسىمىندا «SCAT» اۋە كومپانياسى اكىمشىلىك جاۋاپكەرشىلىككە تارتىلىپ، ايىپپۇل 1000 ا ە ك (3692000 تەڭگە) قۇرادى»، - دەپ جازدى كولىك مينيسترلىگىنەن.
جولاۋشىلاردىڭ قۇقىقتارىن ساقتاۋعا قاتىستى زاڭنامانى مۇلتىكسىز ساقتاۋ ازاماتتىق اۆياتسيا كوميتەتى جۇمىسىنداعى باسىم باعىتتاردىڭ ءبىرى بولىپ تابىلادى جانە اۋە كومپانيالار تاراپىنان بۇزۋشىلىق فاكتىلەرى انىقتالسا، بەلگىلەنگەن شارالار قولدانىلاتىندىعىن اتاپ وتكەن ءجون.
اۆتور
اسحات رايقۇل
