جول پوليتسياسىن الداپ سوققان اقتوبەلىك ءومىر بويىنا كولىك جۇرگىزە المايدى

وقيعا بيىل مامىر ايىندا بولدى. ايىپتاۋ اكتىسىنە سۇيەنسەك، سوتتالۋشى بۇعان دەيىن دە ماس كۇيىندە كولىك جۇرگىزگەنى ءۇشىن 7 جىلعا كۋالىگىنەن ايىرىلعان. سوعان قاراماستان تۋىسقانىنىڭ كولىگىن الىپ، تاعى دا ماس كۇيىندە رۋلگە وتىرعان. تۇندە پاترۋلدىك پوليتسيا قىزمەتكەرلەرى توقتاتىپ، قۇجاتىن سۇراعان كەزدە بولەسىنىڭ ساقتاندىرۋ ءپوليسىن ۇسىنادى. ال پوليتسيا قىزمەتكەرلەرى وسى قۇجاتتى الىپ، ساراپتامادان وتكىزەدى، اكىمشىلىك حاتتاما تولتىرادى.

- ماعان 1414 نومىرىنەن حابارلاما كەلدى. مەنىڭ ۇستىمنەن اكىمشىلىك ءىس قوزعالعان ەكەن. ءمان-جايدى ءبىلۋ ءۇشىن پوليتسيا باسقارماسىنا باردىم. ولار مەنى پاترۋلدىك پوليتسيا قىزمەتىنە جىبەردى. وندا اكىمشىلىك ءىس قوزعالعانىن، قازىر ءوزىمنىڭ تەرگەۋ يزولياتورىندا وتىرعانىمدى ايتتى. ال مەن ول جاقتا ەمەس، پوليتسيا بولىمىندە تۇرمىن. تۇستەن كەيىن كەلۋدى سۇراعان سوڭ كەتىپ بارا جاتتىم. ءبىراق پوليتسيا قىزمەتكەرى مەنى قۋىپ جەتىپ، سوت وتىرىسى ءجۇرىپ جاتقانىن ايتتى. ۆيدەو ارقىلى مەنىڭ فوتومدى، كەيىن بولەمدى كورسەتتى. سول كۇنى رۋلدە بولعان مەن ەمەس، بولەم. ال حاتتاما مەنىڭ اتىما تولتىرىلىپ، پوليتسيا مەنى قاماۋعا الدىم دەپ ويلاعان، - دەدى كۋاگەر سەرىك.

سوت وتىرىسىنا پاترۋلدىك پوليتسيا قىزمەتكەرلەرى دە قاتىسىپ، كۋالىك ەتتى. ولار سەرىك ەسىمدى ادامنىڭ فوتوسىندا ۇقساستىق بولعانىن، ناقتى سول ادام دەپ ويلاعانىن ايتتى. تەك ساقتاندىرۋ پوليسىن الىپ، ساراپتاماعا اپارادى. ال قالعان قۇجاتتارىن ەلەكتروندى تۇردە ورتاق بازادان شىعارىپ العان. وسى جاۋاپسىزدىعى ءۇشىن پوليتسيا قىزمەتكەرىنىڭ ءبىرى قاتاڭ سوگىس، ەكىنشىسى قىزمەتىنە تولىق ساي ەمەس ەسكەرتۋىن العان. سوت-مەديتسينالىق ساراپتاما كەزىندە بوتەننىڭ قۇجاتىن ۇسىنعان جۇرگىزۋشىنىڭ جەڭىل دارەجەدە ماس بولعانى انىقتالدى.

- سوت وتىرىسى كەزىندە سوتتالۋشى وزىنە تاعىلعان ايىپتى مويىندامادى. سوعان قاراماستان ونىڭ كىناسى سوت قۇجاتتارىمەن دالەلدەندى. پوليتسيا، مەديتسينا قىزمەتكەرلەرى كۋاگەرلىك ەتتى. سوتتالۋشى ماس كۇيىندە بولعان، قورىتىندى بار. سونىمەن بىرگە ۆيدەو دالەل بولدى. ايىپتاۋ تاراپى ءىس دۇرىس سارالاندى دەپ سانايدى. سوتتالۋشىنى ايىپتى دەپ تانىپ، قىلمىستىق كودەكستىڭ 346-بابى 1-بولىگىمەن 2 جىلعا باس بوستاندىعىنان ايىرۋدى سۇرايمىن. جازاسىن وتەۋ ورنىن قاۋىپسىزدىگى تومەن تۇزەتۋ مەكەمەسى دەپ بەلگىلەنسىن، - دەدى پروكۋرور.

اقتوبە قالالىق 2-سوتى باسپا ءسوز قىزمەتىنىڭ حابارلاۋىنشا، سوت ۇكىمىمەن سوتتالۋشى قىلمىستىق كودەكستىڭ 356-بابى 1-بولىگىمەن ايىپتى دەپ تانىلىپ، 6 ايعا باس بوستاندىعىنان ايىرىلدى. سونىمەن بىرگە ءومىر بويىنا كولىك جۇرگىزۋ قۇقىعىنان ايىرىلدى. سوت ۇكىمى زاڭدى كۇشىنە ەنگەن جوق.

ەسكە سالساق، الەۋمەتتىك جەلىدە كوپ قارالىم مەن ءلۇپىل جيناماق بولعان اقتوبەلىك جۇرگىزۋشى قامالدى. ول قالانىڭ باس داڭعىلىنداعى جۇرگىنشىلەر جولىندا كولىگىمەن جۇرگەن.