پرەمەر-مينيستر بەكتەنوۆ جاڭا مينيسترگە ماڭىزدى مىندەتتەر جۇكتەدى
استانا. KAZINFORM - قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ مەملەكەت باسشىسىنىڭ ءتيىستى جارلىعىمەن پرەمەر-ءمينيستردىڭ ورىنباسارى - كولىك ءمينيسترى قىزمەتىنە تاعايىندالعان اسەل جاناسوۆانى مينيسترلىك ۇجىمىنا تانىستىردى.
ۇكىمەتتىڭ باسپا ءسوز قىزمەتى حابارلاعانداي، جيىندا پرەمەر-مينيستر نۇرلان ساۋرانبايەۆقا ەلىمىزدىڭ كولىك سالاسىن دامىتۋعا قوسقان ۇلەسى ءۇشىن العىسىن ءبىلدىردى.
سونداي-اق اسەل جاناسوۆانىڭ مول ەڭبەك تاجىريبەسى اتاپ ءوتىلدى. اسەل جاناسوۆا ءار جىلدارى «زەردە» حولدينگى جانە «قازپوشتا» اكتسيونەرلىك قوعامىن باسقارعان. سونىمەن قاتار ساۋدا جانە ينتەگراتسيا ۆيتسە-ءمينيسترى، پرەزيدەنت كەڭەسشىسى، پرەزيدەنت اكىمشىلىگى باسشىسىنىڭ ورىنباسارى بولىپ قىزمەت اتقارعان.
ولجاس بەكتەنوۆ سالا الدىندا مەملەكەت باسشىسى قاسىم-جومارت توقايەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىندا ايقىندالعان اۋقىمدى مىندەتتەر تۇرعانىن اتاپ ءوتتى.
- پرەزيدەنت كەلەسى جىلدى اۋقىمدى قۇرىلىس جىلى دەپ جاريالادى. بۇل كولىك ينفراقۇرىلىمىن دامىتۋ سالاسىن دا قامتيدى. الدىمىزدا تۇرعان مىندەتتەر ايقىن. ەلىمىزدىڭ گەوگرافيالىق ورنالاسۋىن ەسكەرە وتىرىپ، قولدا بار الەۋەتتى بارىنشا ءتيىمدى پايدالانۋىمىز كەرەك. كەلەر جىلى كولىك سالاسىنىڭ بارلىق باعىتى بويىنشا ءىرى جوبالاردى ىسكە قوسۋ جوسپارلانعان. ساپالى ءارى ۋاقتىلى جۇزەگە اسىرىلۋىن قامتاماسىز ەتۋ قاجەت، - دەپ اتاپ ءوتتى پرەمەر-مينيستر.
كولىك مينيسترلىگىنىڭ نەگىزگى باسىم باعىتتارى قاتارىندا جەرگىلىكتى جانە رەسپۋبليكالىق ماڭىزى بار اۆتوموبيل جولدارى قۇرىلىسىنىڭ جوعارى ساپاسىن قامتاماسىز ەتۋ، جول بويىنداعى ينفراقۇرىلىمدى دامىتۋ، 2027 -جىلى اۆتوموبيل وتكىزۋ پۋنكتتەرىن رەكونسترۋكتسيالاۋدى اياقتاۋ، سونداي-اق قازاقستاننىڭ ەۋرازياداعى نەگىزگى كولىك-لوگيستيكالىق حاب رەتىندەگى پوزيتسياسىن نىعايتۋ مىندەتتەرى ايقىندالدى.
وسىعان دەيىن مەملەكەت باسشىسىنىڭ جارلىعىمەن نۇرلان ساۋرانبايەۆ قازاقستان رەسپۋبليكاسىنىڭ كولىك ءمينيسترى لاۋازىمىنان بوساتىلىپ، ونىڭ ورنىنا اسەل جاناسوۆا تاعايىندالعانىن جازعان ەدىك.
