جول قۇرىلىسى سالاسىندا قانداي ماماندار جەتىسپەيدى

жол құрылысы саласы
Фото: «Жол активтері сапасының ұлттық орталығы» РМК СҚОФ баспасөз қызметі

 پەتروپاۆل. KAZINFORM - ەلىمىزدە بيىلدان باستاپ «كولىك قۇرىلىسى» ءبىلىم بەرۋ توپتارى قۇرىلىپ، جولشىلاردى كاسىبي دايارلاۋ قولعا الىنباق. ماقسات - جول قۇرىلىسى سالاسىنداعى بۇگىندە وزەكتى - مامان تاپشىلىعى ماسەلەسىن جويۋ.

«جول اكتيۆتەرى ساپاسىنىڭ ۇلتتىق ورتالىعى» ر م ك سولتۇستىك قازاقستان وبلىسى فيليالىنىڭ مالىمەتىنشە، قازىرگى تاڭدا ەلىمىزدە جالپى جولداردىڭ ۇزىندىعى 157 مىڭ شاقىرىم. الەمدە جولداردىڭ ۇزىندىعى بويىنشا 32-ورىندا تۇر، ساپاسى جاعىنان قانداي دەڭگەيدە ەكەنىن تاپ باسىپ ايتۋ قيىن. وعان، ەڭ ءبىرىنشى وسى سالاداعى مامانداردىڭ جەتىسپەۋشىلىگى سەبەپ بولىپ وتىر.

بۇگىندە ەلىمىزدە كاسىبي جولشىلاردى دايارلايتىن 8 جوعارى وقۋ ورنى عانا بار. اتاپ ايتار بولساق، گونچاروۆ اتىنداعى قازاق اۆتوموبيل-جول ينستيتۋتى، د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى، ساتپايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى، قازاق قاتىناس جولدارى ۋنيۆەرسيتەتى، قاراعاندى تەحنيكالىق، دۋلاتي اتىنداعى تاراز وڭىرلىك جانە تورايعىروۆ ۋنيۆەرسيتەتتەرى. وسى جوعارى وقۋ ورىندارىندا عانا بىلىكتى كادرلار دايارلانادى. ءبىراق بۇل ەلىمىزدەگى كادر جەتىسپەۋشىلىگى ماسەلەسىن جويار ەمەس.

Жол саласы
Фото: «Жол активтері сапасының ұлттық орталығы» РМК СҚОФ баспасөз қызметі

 

ءالى كۇنگە دەيىن جولشى ماماننىڭ مارەبەسى ايقىندالماعاندىقتان، ازاماتتىق قۇىرىلىس، مۇناي-گاز سالاسىن وقىتاتىن ماماندىقتاردىڭ اراسىندا جاي عانا باعىت رەتىندە قوسىمشا وتىلەدى. ياعني، بولەك ماماندىق قۇرىلماعان.

جول اكتيۆتەرىنىڭ ساپاسى ۇلتتىق ورتالىعى ماماندارىنىڭ ايتۋىنشا، قازىرگى تاڭدا جول قۇرىلىسىمەن اينالىساتىن كومپانيالاردا ينجەنەرلەر جەتىسپەيدى. بۇعان قوسا زەرتحاناشىلار، ارنايى تەحنيكا جۇرگىزۋشىلەرى دە جوقتىڭ قاسى. بۇل ءوز كەزەگىندە جولدىڭ ساپاسىنا كەرى اسەر ەتۋدە. جالپى ەلىمىزدەگى جەرگىلىكتى اتقارۋشى بيلىكتە جول قۇرىلىسى باعىتىندا 1500 ادام ەڭبەك ەتسە، سولاردىڭ تەك %10 عانا ارنايى ماماندىققا يە.

Жол саласы
Фото: «Жол активтері сапасының ұлттық орталығы» РМК СҚОФ баспасөз қызметі

جوعارى وقۋ ورىندارى بەرگەن مالىمەتكە سۇيەنسەك، 2023-2024-وقۋ جىلىندا «جول جانە اەرودرومدار قۇرىلىسى» ماماندىعى بويىنشا بارلىعى 670 ستۋدەنت ءبىلىم الىپ جاتىر. ولاردىڭ 646 سى - باكالاۆر، 24 ءى - ماگيسترانت. ال «كوپىر جانە توننەل قۇرىلىسى» ماماندىعى بويىنشا 84 ستۋدەنت وقىپ ءجۇر. ولاردىڭ 4 ەۋى عانا ماگيستراتۋرادا. تاعى ءبىر ايتا كەتەتىن جايت، سوڭعى 10 جىلدا ەلىمىزدە جول قۇرىلىسى ماماندىعى بويىنشا نەبارى 253 ادام عانا ماگيستر اتانعان. ال دوكتورانتۋراعا بىردە-ءبىر مەملەكەتتىك گرانت بولىنبەگەن.

پەتروپاۆل قالاسىنا كەلەر بولساق، گۋمانيتارلىق- تەحنيكالىق كوللەدجدە «اۆتوموبيل جولدارى جانە اەرودرومدار قۇرىلىسى» ماماندىعى جاستار تاراپىنان سۇرانىستىڭ جوقتىعىنان 2021 جابىلىپ قالعان.

«بيىلدان باستاپ ەلىمىزدە «كولىك قۇرىلىسى» ءبىلىم بەرۋ توپتارى قۇرىلىپ، وعان اۆتوكولىك جولدارى مەن اەرودرومدار، تەمىرجول جانە كوپىرلەر، ترانسپورتتىق توننەلدەر، گاز-مۇناي قۇبىرلارى قۇرىلىسى ماماندىقتارى ەنگىزىلدى. بۇل جولشىلار كوپتەن كۇتكەن جاڭالىق. ءبىزدىڭ ۇلتتىق ورتالىق ماماندارى وسى ماسەلەنى ۇدايى كوتەرىپ كەلگەن ەدى. تەك رەسپۋبليكالىق دەڭگەيدە عانا ەمەس، وڭىرلەردە دە ورتالىقتىڭ فيليالدارى مەكتەپتەردەگى جوعارى سىنىپ وقۋشىلارىمەن جۇزدەسىپ، وسى ماماندىقتى تاڭداۋعا شاقىرىپ جاتىر. كاسىپتىك باعدار بەرۋ جۇمىستارى اياسىندا كەزدەسۋلەر ءوتىپ جاتىر»، - دەيدى «جول اكتيۆتەرى ساپاسىنىڭ ۇلتتىق ورتالىعى» ر م ك سقو فيليال ديرەكتورى جولدىباي تەنتەكوۆ.

سوڭعى جاڭالىقتار