جول جابىلعانى تۋرالى ەسكەرتۋدى ەلەمەگەن جۇرگىزۋشىلەرگە قانشا ايىپپۇل سالىنادى؟
استانا. KAZINFORM - جاقىندا استانا-شۋچينسك تاسجولىندا اۋا رايىنىڭ قولايسىزدىعىنا بايلانىستى جولدىڭ جابىلعانى تۋرالى ەسكەرتۋدى ەلەمەگەن 95 كولىك جاپپاي جول اپاتىنا ۇشىراعان بولاتىن.
الدىن الا جۇرگىزىلگەن شاراعا باعىنباي، اپات تۋىنداۋىنا سەبەپ بولعان كولىك جۇرگىزۋشىلەرىنە قانداي جاۋاپكەرشىلىك قاراستىرىلعان؟
Massaget.kz ءتىلشىسى انىقتادى.
قاڭتاردىڭ العاشقى كۇندەرى اۋا رايى كۇرت ناشارلاپ، قازاقستاننىڭ بىرنەشە وبلىسىندا كەيبىر باعىتتار بويىنشا ۋچاسكەلەرى ۋاقىتشا جابىلدى. مۇنداي شارالار ازاماتتاردىڭ قاۋىپسىزدىگى ءۇشىن قاجەت. ال جولداردا كولىك قۇرالدارىنىڭ قوزعالىسىن توقتاتۋ نەمەسە ۋاقىتشا شەكتەۋ قاعيدالارى بويىنشا جولدار جابىلعانى تۋرالى حابارلامالاردى ەلەمەۋ اكىمشىلىك جازاعا اكەپ سوقتىرادى.
قانشا ايىپپۇل سالىنادى؟
اكىمشىلىك قۇقىقبۇزۋشىلىق تۋرالى كودەكستىڭ 667-بابىنا سايكەس، جول قاۋىپسىزدىگىن قامتاماسىز ەتۋ جونىندەگى ۋاكىلەتتى ورگاننىڭ زاڭدى تالاپتارىنا باعىنباۋ فاكتىلەرى انىقتالعان جاعدايلاردا كولىك قۇرالدارى جۇرگىزۋشىلەرىنە شارالار قولدانىلادى.
كودەكستىڭ وسى بابىندا قۇقىق قورعاۋ نەمەسە ارناۋلى مەملەكەتتىك ورگان قىزمەتكەرىنىڭ (اسكەري قىزمەتكەردىڭ) جانە وزگە دە قىزمەتتەردىڭ زاڭدى تارتىبىنە نەمەسە تالابىنا باعىنباعانى ءۇشىن جازا قاراستىرىلعان. وسىلايشا قولايسىز اۋا رايىندا تاسجولداردىڭ جابىق ۋچاسكەلەرىنە شىققان كولىك يەلەرىنە قاراستىرىلعان جاۋاپكەرشىلىكتەر:
ايىپپۇل: 117960 تەڭگەگە تەڭ 30 ا ە ك مولشەرىندە ايىپپۇل سالۋ؛
قاماۋعا الۋ: 15 تاۋلىككە دەيىن اكىمشىلىك قاماۋعا الۋ.
2025-جىلعى ا ە ك مولشەرى - 3932 تەڭگە.
العاشقى بۇزۋشىلىقتان كەيىن 12 اي ىشىندە قۇقىقبۇزۋشىلىق قايتالانسا، 15-20 تاۋلىككە دەيىن قاماۋعا الىنادى.
ال جۇكتى ايەلدەر، 14 جاسقا دەيىنگى بالالارى بار ەرلەر مەن ايەلدەر، كامەلەتكە تولماعان ازاماتتار، I جانە II توپتاعى مۇگەدەكتەر، سونداي-اق 58 جانە 63 جاستان اسقان ايەلدەر مەن ەرلەر مەن ايەلدەر سەكىلدى قاماۋعا الىنبايتىن ادامدارعا ەرەجەنى قايتا بۇزعانى ءۇشىن 50 ا ە ك (196600 تەڭگە) كولەمىندە ايىپپۇل سالىنادى.
ەسكە سالايىق، 3-قاڭتاردا استانا-شۋچينسك تاسجولىندا 40 كولىك سوقتىعىسقانى تۋرالى اقپارات تاراعان بولاتىن.
كەيىنىرەك كولىك سانى ەكى ەسە كوبەيىپ، جول اپاتىنا ۇشىراعان كولىك سانى 95 كە جەتكەنى بەلگىلى بولدى.
پوليتسيا استانا-پەتروپاۆل تاسجولىندا جول اپاتىنىڭ سالدارىن جويۋ كادرلارىن ءبولىسىپ، قانشا ادام زارداپ شەككەنىن جاريالادى.
95 كولىك سوقتىعىسقان ءىرى جول اپاتى قالاي باستالعانىنىڭ ۆيدەوسى پايدا بولدى.
