جوعارعى سوت: ەلەكتروندى بىلەزىكتەر ءجيى قولدانىلا باستادى
استانا. KAZINFORM - بيىلعى جىلدىڭ 10 ايىندا عانا سوتتار زاڭ بۇزعان ادامدارعا 505 رەت ەلەكتروندى بىلەزىك تاعۋ شاراسىن قولدانعان، دەپ حابارلايدى ق ر جوعارعى سوتىنىڭ باسپا ءسوز قىزمەتى.
باسپاءسوز قىزمەتىنىڭ مالىمەتتەرىنە قاراعاندا، جوعارعى سوتتىڭ قىلمىستىق ىستەر جونىندەگى سوت القاسىنىڭ ءتوراعاسى نازگۇل راحمەتۋللينا شارتتى تۇردە مەرزىمىنەن بۇرىن بوساتۋ جانە جازانىڭ وتەلمەگەن بولىگىن جازانىڭ نەعۇرلىم جەڭىل تۇرىمەن اۋىستىرۋ، سونداي- اق قاماۋعا الۋ تۇرىندەگى بۇلتارتپاۋ شاراسىن سانكسيالاۋ تۋرالى ماتەريالداردى سوتتاردىڭ قاراۋى ماسەلەلەرى جونىندە دوڭگەلەك ۇستەل وتكىزدى.
دوڭگەلەك ۇستەل جۇمىسىنا جوعارعى سوتتىڭ سۋديالارى، پارلامەنت ءماجىلىسىنىڭ دەپۋتاتى ا. قۇسپان، رەسپۋبليكالىق ادۆوكاتتار القاسىنىڭ (ر ا ا) ءتوراعاسى ا. بيكەبايەۆ، «اتامەكەن» ۇكپ باسقارما ءتوراعاسىنىڭ ورىنباسارى گ. بيجانوۆا، سونداي- اق باس پروكۋراتۋرانىڭ، ءى ءى م قىلمىستىق- اتقارۋ جۇيەسى كوميتەتىنىڭ جانە راا وكىلدەرى قاتىستى.
قاتىسۋشىلار سوتتاردىڭ قاماۋعا الۋعا سانكتسيا بەرۋدەن باس تارتۋىنىڭ ۇلەستىك پايىزى جىل سايىن تۇراقتى ءوسىپ كەلە جاتقانىن اتاپ ءوتتى.
ەگەر 2021 -جىلى سوتتار قاماۋعا الۋ تۋرالى ءوتىنىشحاتتاردىڭ %90 عا جۋىعىن قاناعاتتاندىرسا، 2024 -جىلى - تەك %75 ىن عانا قاناعاتتاندىرعان.
سونىمەن بىرگە، قاماۋعا الۋدان باس تارتا وتىرىپ، سوتتار ءۇيقاماق پەن كەپىلگە الۋدى ءجيى قولدانا باستادى.
2021 -جىلمەن سالىستىرعاندا ءۇيقاماعىن تاڭداۋ 860 تان 1911 عا دەيىن نەمەسە ەكى ەسەدەن استامعا، ال كەپىلگە الۋ - 4 ەسەگە (59 دان 214 كە دەيىن) ءوستى.
بيىل جوعارعى سوتتىڭ باستاماسىمەن ەلەكتروندى بىلەزىك دەپ اتالىپ كەتكەن جازالاۋ ءتۇرىن قولدانۋ جوباسى قولعا الىندى.
2024 -جىلى ەلەكتروندى باقىلاۋ قۇرالدارى ءۇيقاماققا الىنعانداردىڭ 60 پايىزىندا قولدانىلعان بولسا، 2021 -جىلى بۇل كورسەتكىش 3 پايىزدان اسپاعان.
شارتتى تۇردە مەرزىمىنەن بۇرىن بوساتۋ جانە جازانىڭ وتەلمەگەن بولىگىن نەعۇرلىم جەڭىل جازامەن اۋىستىرۋدىڭ وزەكتى ماسەلەلەرى دە اتاپ ءوتىلدى.
«دوڭگەلەك ۇستەلدىڭ قورىتىندىسى بويىنشا اتالعان ينستيتۋتتاردى قولدانۋ پراكتيكاسى بويىنشا ءتيىستى ۇسىنىمدار ازىرلەندى»، - دەلىنگەن حابارلامادا.
وسىعان دەيىن قازاقستان سۋديالارىنىڭ سەزىندە جوعارعى سوت ءتوراعاسى اسلامبەك مەرعاليەۆ جوعارى سوت كەڭەسى ۇزدىك حالىقارالىق ستاندارتتارعا جاۋاپ بەرەتىن ورگانعا اينالعانى تۋرالى ايتقانىن جازعان ەدىك.
