جەتىسۋدا مەملەكەتتىك رامىزدەر كۇنىنە ارنالعان پاتريوتتىق شەرۋ ءوتتى
تالدىقورعان. KAZINFORM - تالدىقورعانداعى «جاستار» ساياباعىنان باستالعان شەرۋ ج. بالاپانوۆ، ب. ءاشىموۆ كوشەلەرىمەن ءجۇرىپ ءوتىپ، تالدىقورعان - الماتى تاس جولىنىڭ بويىنداعى 92 مەتر بيىكتىكتە ورناتىلعان مەملەكەتتىك تۋ تۇعىرىنا تابان تىرەدى.
شەرۋگە قاتىسۋشىلاردىڭ قولىندا جالاۋلار جەلبىرەپ، جاستار وكىلدەرى ەلدىڭ بوستاندىعى مەن تاۋەلسىزدىگىنىڭ باستى نىشاندارى رەتىندە قولدارىندا 12х6 مەتر بولاتىن مەملەكەتتىك تۋ مەن مەملەكەتتىك ەلتاڭبانى قوسا الىپ ءجۇردى.
300 گە جۋىق ادام ساپ تۇزەگەن پاتريوتتىق شاراعا سپورتشىلار، ەرىكتىلەر، ساياسي پارتيالار، «ۇلى دالا جورىعى» مارافونىنىڭ جەڭىمپازدارى، ۆەلوسيپەدشىلەر، جاس كادەتشىلەر، جاستار، شىعارماشىلىق زيالى قاۋىم قاتىستى.
مەملەكەتتىك تۋدى كوتەرۋ سالتاناتتى ءراسىمى ءوتىپ، ءانۇران شىرقالدى.
مەرەكەلىك ءىس-شارا تۋ تۇعىرىنىڭ جانىندا جالعاستى. كونسەرتتىك باعدارلاما ۇسىنىلىپ، «كوك تۋدىڭ جەلبىرەگەنى»، «بايتاق دالام»، «اتامەكەن» پاتريوتتىق اندەرى ورىندالدى.
اۆتور
ديانا تۇرلىبەك
