جەتىسۋدا مال ۇرىلارى ۇستالدى
استانا. KAZINFORM - جەتىسۋ وبلىسى پروكۋراتۋراسىنىڭ باستاماسىمەن جۇرگىزىلگەن جەدەل-ىزدەستىرۋ ءىس-شارالارى بارىسىندا مال ۇرلىعىمەن اينالىسقان 6 ادامنان تۇراتىن قىلمىستىق توپ ارەكەتىنىڭ جولى كەسىلدى.
ولاردىڭ زاڭسىز ارەكەتىنەن كەلگەن شىعىن 20 ميلليون تەڭگەدەن اسادى.
- سارقان اۋدانى باقالى اۋىلىندا ارنايى وپەراتسيا بارىسىندا 43 باس ءىرى قارا مال، پىشاق، ارقان تارىزدەس قىلمىس قۇرالدارى، سونداي-اق سويىلعان مالدار سياقتى زاتتاي ايعاقتار تاركىلەندى.
تاركىلەنگەن مۇلىك قىلمىستىق ارەكەتتىڭ جۇيەلى تۇردە جاسالعانىن دالەلدەيدى. كۇدىكتىلەردىڭ ارەكەتى وبلىس تۇرعىندارىنا ەلەۋلى زيان كەلتىرگەن، - دەلىنگەن حابارلامادا.
كۇدىكتىلەر ۇستالىپ، قاماۋعا الىندى.
قازىرگى ۋاقىتتا ولاردىڭ وبلىس اۋماعىندا وسىعان ۇقساس قىلمىستارعا قاتىسى بار-جوعى تەكسەرىلىپ جاتىر.
ايتا كەتەلىك جىل باسىنان مال ۇرلىعى قاي وڭىرلەردە كوپ ەكەنى انىقتالدى.
