جەتىسۋدا دەپارتامەنت باسشىسى ەلەكتر قۋاتى تاريفىن كوتەرۋ ءۇشىن پارا العان
استانا. KAZINFORM - وبلىستىق تابيعي مونوپوليالاردى رەتتەۋ دەپارتامەنتىنىڭ باسشىسى 500 مىڭ تەڭگە پارا الدى دەگەن كۇدىككە ءىلىندى.
- جەتىسۋ وبلىسى بويىنشا سىبايلاس جەمقورلىققا قارسى قىزمەتپەن وبلىستىق تابيعي مونوپوليالاردى رەتتەۋ دەپارتامەنتىنىڭ باسشىسى اشكەرەلەندى. شەنەۋنىك 2025 -جىلعا ارنالعان ەلەكتر ەنەرگياسىنىڭ تاريفى مەن تاريفتىك سمەتاسىن كوتەرگەنى ءۇشىن «تالدىقورعان اكسيونەرلىك كولىك-ەلەكترجەلىلىك كومپانياسى» ا ق باسشىسىنان 500 مىڭ تەڭگە كولەمىندە پارا الدى دەپ كۇدىكتەلۋدە. تەرگەۋ جالعاسۋدا. قىلمىستىق- پروتسەستىك كودەكستىڭ 201-بابىنا سايكەس وزگە اقپارات جاريا ەتىلمەيدى، - دەلىنگەن انتيكور تاراتقان اقپاراتتا.
ايتا كەتەيىك، مەملەكەت باسشىسىنىڭ تاپسىرماسىن ورىنداۋ ءۇشىن سىبايلاس جەمقورلىققا قارسى ءىس-قيمىل اگەنتتىگى قوعامدا زاڭدىلىق پەن ءتارتىپ قاعيداتىن قامتاماسىز ەتۋ، سونداي-اق سىبايلاس جەمقورلىق فاكتىلەرىنىڭ، ونىڭ ىشىندە جوعارى لاۋازىمدى ادامدار اراسىندا جولىن كەسۋ جونىندەگى جۇمىستى جالعاستىرۋدا. قابىلدانعان شارالار مەن تەتىكتەر كەشەنى قويىلعان مىندەتتەردى ءتيىمدى ىسكە اسىرۋعا جانە زاڭدىلىقتىڭ بۇزىلۋىنا ۋاقتىلى دەن قويۋعا مۇمكىندىك بەرەدى.
