جەتىسۋدا 14 جاسار قىزىن ايۋاندىقپەن ولتىرگەن ەرلى-زايىپتىعا ۇكىم شىقتى
تالدىقورعان. KAZINFORM - تالدىقورعاندا كامەلەتكە تولماعان قىزدى ازاپتاپ، قاساقانا ولتىرگەن ەرلى-زايىپتىلاردىڭ ءىسى بويىنشا سوت وتىرىسى اياقتالدى. 14 جاسار كارينا دوروحينانىڭ ولىمىنە تۋعان اناسى مەن وگەي اكەسى كىنالى دەپ تانىلدى.

جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ەرلى-زايىپتى م. جانە ە- گە قاتىستى ق ك 121-بابى 3-2-بولىگى 3-تارماعى، 110-بابى 2-بولىگى 1-تارماعى، 99-بابى 2-بولىگى 7، 10، 14- تارماقتارىمەن ايىپتالعان قىلمىستىق ءىستى قارادى.
سوت تاراتقان مالىمەتكە سۇيەنسەك ايىپتالۋشى م. 2023 -جىلدىڭ كۇزىندە كامەلەتكە تولماعان جابىرلەنۋشىگە قارسى كۇش قولدانىپ، وگەي اكەسى بولا تۇرا سەكسۋالدىق سيپاتتاعى وزگە دە ارەكەتتەر جاساعان.

تەرگەۋ مالىمەتىنشە، م. جانە ە. الدىن الا ءسوز بايلاسىپ، قىلمىستى جاسىرۋ ماقساتىندا قىزدى قاساقانا ولتىرگەن.
- سوت ۇكىمىمەن م. 121-بابىنىڭ 3-2 بولىگى 3-تارماعى، 110-بابىنىڭ 2-بولىگىنىڭ 1-تارماعى، 99-بابىنىڭ 2-بولىگىنىڭ 7، 10، 14-تارماقتارى بويىنشا كىنالى دەپ تانىلىپ، وعان ءومىر بويىنا باس بوستاندىعىنان ايىرۋ جازاسى تاعايىندالدى. سوت ۇكىمىمەن ە. 110-بابىنىڭ 2-بولىگىنىڭ 1-تارماعى، 99-بابىنىڭ 2-بولىگىنىڭ 7، 10، 14-تارماقتارىمەن كىنالى دەپ تانىلىپ، وعان 19 جىلعا باس بوستاندىعىنان ايىرۋ جازاسى تاعايىندالدى. سونداي-اق، ودان جابىرلەنۋشى وكىلىنىڭ پايداسىنا 15 ميلليون تەڭگە مورالدىق زيان ءوندىرىلدى. ۇكىم زاڭدى كۇشىنە ەنگەن جوق، - دەدى جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتى.
ەسكە سالا كەتەيىك، اتالعان جانتۇرشىگەرلىك قىلمىس 2023 -جىلدىڭ سوڭىندا بولعان ەدى.
تالدىقورعاندا 14 جاسار قىز ەكى اي بويى ساباققا بارماي، جوعالىپ كەتتى.
كەيىننەن جاس ءوسپىرىمنىڭ جوعالۋىنا كۇدىكتى رەتىندە اناسى مەن وگەي اكەسى ۇستالىپ، قاماۋعا الىندى.
تەرگەلىپ جاتقان كارينانىڭ اتا-اناسى قىلمىس جاساعاندارىن مويىنداپ، قىزدىڭ دەنەسىن كومگەن ورىندى كورسەتتى.
وسىلايشا وبلىس پوليتسەيلەرى قىزدىڭ جەرلەنگەن جەرىن تاۋىپ، دەنەسىن قازىپ الدى.
اۆتور
ايبەك قۇتتىبەك