جەتىسۋدا 10 جاستاعى بالا كۇندە تاڭەرتەڭ وزەنگە ءتۇسىپ، شىنىعىپ ءجۇر
تالدىقورعان. KAZINFORM - تالدىقورعاندىق مۇستافا كۇن سايىن تاڭعى ۋاقىتتا وزەن سۋىنا شومىلادى. اتا - اناسى سۋىق سۋعا تۇسكەلى بەرى ۇلدارىنىڭ دەنساۋلىعى جاقسارعانىن ايتسا، دارىگەرلەر مۇنى ماقۇلداعان جوق.

مۇستافا دوسجان ۇلى - تالدىقورعان قالالىق قۇلجاباي قاسىموۆ اتىنداعى №28 مەكتەپ- ليتسەيىنىڭ 5-سىنىپ وقۋشىسى. جىل باسىنان بەرى قالا ىرگەسىندەگى سارىبۇلاق ساياجايىنا بارىپ، وزەن سۋىنا شومىلادى. قىس ايىندا مۇزداي سۋعا ءتۇسىپ، شىنىعۋعا اپاسى ۇيرەتكەن. ۇلدىڭ اتا- اناسى دا بالالارىنىڭ بۇل ءىسىن قۇپتاپ وتىر. ايتۋلارىنشا، سۋىق سۋعا تۇسكەلى بەرى مۇستافانىڭ دەنساۋلىعى جاقسارعان.
- بيىل جىل باسىنان باستاپ ءتۇسىپ ءجۇر سۋعا. سۋىق سۋمەن شىنىعۋىنا اپاسى سەبەپكەر بولدى. ول كىسى اۋىرىپ، سودان سۋىق سۋمەن ەمدەلۋدى قولعا العان. مۇستافاعا دا ۇيرەتتى. سۋعا ءتۇسۋدىڭ ءوزىنىڭ ادىستەرى بار. ەكەۋى بىرگە كۇندە ەرتەمەن وزەنگە بارىپ، سۋعا تۇسەدى. بالامنىڭ اللەرگياسى بولعان. وزەنگە شومىلعالى بەرى ساپ تىيىلدى، - دەدى اكەسى دوسجان قىدىرحانوۆ.
دارىگەرلەر قىس ايلارىندا مۇزداي سۋعا شومىلۋ ارقىلى اعزانى شىنىقتىرىپ، يممۋنيتەتتى كۇشەيتۋگە بولاتىنىن، ول بۇلشىق ەت پەن بۋىن اۋرۋىن ازايتىپ، تۇماۋدى بولدىرماۋىنا سەپتىگىن تيگىزەتىنىن ايتتى. ءبىراق ادامنىڭ جاس ەرەكشەلىگى ەسكەرىلۋى كەرەك ەكەن.
- 7-10 جاسقا دەيىنگى بالالارعا قىس ايلارىندا سۋىق سۋعا شومىلۋعا بولمايدى. بۇل - بالالاردىڭ يممۋندىق جۇيەسى جانە تەرمورەگۋلياتسيا ورتالىعىنىڭ قالىپتاسۋ ەرەكشەلىگىمەن تۇسىندىرىلەدى. سۋىق سۋمەن كونتاكت وسى جۇيەلەردىڭ بۇزىلۋىنا الىپ كەلۋى مۇمكىن. بالالار ءۇشىن دە، ۇلكەندەر ءۇشىن دە قىس ايلارىندا سۋىق سۋعا شومىلۋ بىرتىندەپ جۇيەلى تۇردە بولعان دۇرىس. بىردەن سۋىق سۋعا شومىلۋ اعزاعا زيان بولادى، سول ءۇشىن الدىمەن اعزانى بىرتىندەپ ۇيرەتۋ كەرەك. سەبەبى سۋىق سۋعا شومىلۋ شىنىقپاعان ادام ءۇشىن قاۋىپتى. تىنىسى توقتاپ، ەسىنەن تانىپ، اياق- قولى تارتىلۋى مۇمكىن، - دەدى تەراپيەۆت دارىگەر سايات قانات ۇلى.
سۋىق سۋ قابىلداپ، سەرگەك جۇرەتىن مۇستافانىڭ دەنساۋلىعىمەن قاتار ساباق ۇلگەرىمى دە جاقسى. وسى ورايدا دايىندىقسىز جانە ەرەسەكتەردىڭ قاراۋىنسىز وزەن، كولدەرگە بارىپ سۋعا شومىلۋ بالا ومىرىنە قاۋىپتى ەكەنىن دە ەسكەرتەمىز.