جەتىسۋ وبلىسىنىڭ فيلارمونياسىنا دانەش راقىشەۆتىڭ ەسىمى بەرىلدى

جەتىسۋ وبلىستىق فيلارمونياسى ەندى قازاقستاننىڭ حالىق ءارتىسى، ءانشى-كومپوزيتور دانەش راقىشەۆتىڭ ەسىمىمەن اتالاتىن بولدى. سونداي-اق تالدىقورعانداعى ونەر ساڭلاعى تۇرعان ۇيگە ەسكەرتكىش تاقتا ورناتىلدى، دەپ حابارلايدى Kazinform.

جەتىسۋلىق جەزتاڭداي ءانشى دانەش راقىشەۆ قازاق مۋزىكاسىنىڭ قورجىنىنا 150 دەن استام اسەتتىڭ اندەرىن، حالىق اندەرىن، باسقا دا حالىق كومپوزيتورلارى مەن قىرعىز اندەرىن، قازاقستان كومپوزيتورلارىنىڭ جانە 100 گە جۋىق ءوز ءانىن اسقان شەبەرلىكپەن ورىنداپ، قالدىردى. 1986 -جىلى «قازاق س س ر-نىڭ حالىق ءارتىسى» جوعارعى اتاعىنا يە بولعان. جەتىسۋدا دانەش راقىشەۆتىڭ ەسىمى انشىلىك-ورىنداۋشىلىق مەكتەبىن قالىپتاستىرۋشى تۇلعا رەتىندە تاريحتا قالدى. 1990 -جىلدارى تالدىقورعانداعى قازاق مەكتەپ-ينتەرناتىندا جانە جەتىسۋ مەملەكەتتىك ۋنيۆەرسيتەتى مۋزىكا فاكۋلتەتىندە ءوز كلاسىن اشىپ، تالاپتى بالالار مەن جاستاردى انشىلىككە باۋلىدى.

فوتو: جەتىسۋ وبلىسى اكىمىنىڭ باسپا ءسوز قىزمەتى

جەتىسۋ وبلىسىنىڭ فيلارمونياسىنا دانەش راقىشەۆتىڭ ەسىمىنىڭ بەرىلۋىنە وراي حالىق ءارتىسى تۇرعان ۇيگە ەسكەرتكىش تاقتا ورناتىلىپ، «جەتىسۋ ءدۇلدۇلى» اتتى مەرەكەلىك كونسەرت ۇيىمداستىرىلدى.

«بۇل مەرەيلى كۇن جەتىسۋ جۇرتشىلىعىنىڭ عانا ەمەس، تۇتاس قازاق ونەرىنىڭ قۋانىشى دەپ بىلەمىن. قازاقتىڭ ءان ونەرىنە ۇلكەن ۇلەس قوسقان دانەش اعامىز تۇرعان قاسيەتتى شاڭىراققا جەتىسۋلىقتار تاقتا ورناتىپ وتىر. مەن ساڭلاق ءانشىنى ەڭ العاش رەت ونەر بايقاۋىندا كوردىم، وندا بايقاۋعا قازىلىق ەتۋگە كەلدى. سول شاقتا تانىستىم، ادامگەرشىلىگە، تالانتىنا ءتانتى بولدىم. بۇگىندە دانەش اعانىڭ شاكىرتتەرى - ونەردە ءوز ورىندارىن تاپقان بەلگىلى انشىلەر. دانەش راقىشەۆتىڭ ەسىمى قازاق ونەرىمەن بىرگە جاساي بەرەدى»، - دەدى حالىق ءارتىسى رامازان ستامعازيەۆ.

 

اۆتور

قالماحانبەت مۇقامەتقالي