جەتىسۋ وبلىسىندا روبوت سوت ورىنداۋشىلار جۇمىس ىستەيدى

تالدىقورعان. KAZINFORM - جەتىسۋ وبلىسىندا روبوت سوت ورىنداۋشىلار جۇمىسقا كىرىستى. ولار 4 ايدا ازاماتتاردان 15 ميلليون تەڭگە ءوندىرىپ العان. ال قاراپايىم حالىق 4 ميلليون تەڭگە ۇنەمدەگەن.

ەلىمىزدە بيىل تامىز ايىنان باستاپ ادىلەت مينيسترلىگى ازىرلەگەن «روبوت - سوت ورىنداۋشى» جوباسى ىسكە قوسىلىپ، وڭايلاتىلعان ءىس جۇرگىزۋ باستالعانى بەلگىلى. بۇل جوبا ازاماتتارعا ايىپپۇل سوماسىنىڭ %3 دان %25 عا دەيىنگى مولشەردەگى جەكە سوت ورىنداۋشىسىنىڭ قىزمەتى ءۇشىن قوسىمشا اقىسىز ايىپپۇلداردى تولەۋگە مۇمكىندىك بەرەدى.

«روبوت سوت ورىنداۋشى قالاي جۇمىس ىستەيتىنىن بىلاي تۇسىندىرەيىن. ۋاكىلەتتى ورگان اقپاراتتىق جۇيەنى ينتەگراتسيالاۋ ارقىلى اكىمشىلىك قۇقىقبۇزۋشىلىق تۋرالى قاۋلىنى اتقارۋشىلىق ءىس جۇرگىزۋدىڭ مەملەكەتتىك اۆتوماتتاندىرىلعان اقپاراتتىق جۇيەسىنە جىبەرەدى. بۇدان ءارى اۋماقتىق ادىلەت ورگانى اتقارۋشىلىق ءىس جۇرگىزۋدىڭ مەملەكەتتىك اۆتوماتتاندىرىلعان اقپاراتتىق جۇيەسىنىڭ دەرەكتەر بازاسىندا وڭايلاتىلعان ءوندىرىستى اۆتوماتتى تۇردە قوزعايدى. وڭايلاتىلعان ءوندىرىس باستالعاننان كەيىن ازاماتتار 1414-تەن SMS حابارلاما الادى جانە EGovMobile-دا وڭايلاتىلعان ءوندىرىستى قوزعاۋ تۋرالى ەگجەي- تەگجەيلى اقپاراتپەن push-حابارلاما الادى»، - دەيدى جەتىسۋ وبلىستىق ادىلەت دەپارتامەنتىنىڭ باسشىسى ەرجان ەركەنوۆ.

روبوت سوت ورىنداۋشىنىڭ ورىنداۋىنداعى ءىس جۇرگىزۋ 30 كۇن ىشىندە جۇزەگە اسادى. ول اياقتالعاننان كەيىن اتقارۋشىلىق ءىس جۇرگىزۋ ورىندالماعان جاعدايدا جەكە سوت ورىنداۋشىلارىنا ماجبۇرلەپ ورىنداۋعا بەرىلەدى. وندا بورىشكەرلەر جەكە سوت ورىنداۋشىسىنىڭ قىزمەتىنە قوسىمشا اقى تولەۋى ءتيىس.

اۆتور

ايبەك قۇتتىبەك