جەتىسۋ وبلىسىندا كولىگىن ساتقان تۇرعىن ەرەكشە جاعدايعا تاپ بولدى
استانا. قازاقپارات - جەتىسۋ وبلىسى ءۇشارال قالاسىندا 11-قاڭتار كۇنى ءىرى كولەمدەگى اقشانى ۇرلاۋ دەرەگى تىركەلدى. كولىگىن 11 ميلليون تەڭگەگە ساتقان جەرگىلىكتى تۇرعىن الاياقتاردىڭ قۇربانىنا اينالدى، - دەپ حابارلايدى polisia.kz.

ەر ادام ساۋدا اياقتالعان سوڭ قاراجاتتى پاكەتكە سالىپ، Mercedes اۆتوكولىگىنىڭ جۇكسالعىشىنا قويعان. سول كۇنى كەشكە تانىسىمەن كەزدەسىپ، مەيرامحاناعا بارىپ، ۋاقىتىن سوندا وتكىزەدى.
مەيرامحانادان شىققان كەزدە جۇكسالعىشتى اشىپ، اقشانى تەكسەرمەك بولادى. وسى ساتتە بىرنەشە كۋپيۋرا جەرگە ءتۇسىپ كەتىپ، جاقىن ماڭدا تۇرعان جاستاردىڭ نازارىن اۋدارتقان. ولاردىڭ ءبىرى «بۇل اقشا ما؟» دەپ سۇراعاندا، ەر ادام ەش كۇماندانباستان «ءيا» دەپ جاۋاپ بەرگەن.
سول كەزدە ەكىنشى جاس جىگىت تاكسي تابا الماي تۇرعانىن ايتىپ، «وركەن» مەيرامحاناسىنا دەيىن جەتكىزىپ سالۋىن وتىنگەن. ەر ادام جاماندىق ويلاماي، ولاردى كولىگىنە وتىرعىزادى.
جولدا كولىك پاترۋلدىك پوليتسيا قىزمەتكەرلەرى جۇرگىزىپ جاتقان رەيد بارىسىندا توقتاتىلادى. ەر ادام پوليتسەيلەرگە شىعىپ، جولاۋشىلاردىڭ ءبىرى دە كولىكتەن تۇسەدى. تەكسەرۋ شامامەن 10 مينۋتقا سوزىلعان. الايدا كولىككە ورالعاندا، ەكىنشى جولاۋشىنىڭ جوعالىپ كەتكەنىن جانە جۇكسالعىشتاعى اقشاسى بار پاكەتتىڭ ورنىندا جوق ەكەنىن بايقايدى.
زارداپ شەگۋشى بىردەن الاكول اۋداندىق پوليتسيا بولىمىنە ارىزدانعان. ءتارتىپ ساقشىلارى جەدەل ىزدەستىرۋ شارالارىن ۇيىمداستىرىپ، كوپ ۇزاماي كۇدىكتىنى قولعا ءتۇسىردى. ول 24 جاستاعى جەرگىلىكتى تۇرعىن بولىپ شىقتى.
قازىرگى ۋاقىتتا بۇل فاكتى بويىنشا سوتقا دەيىنگى تەرگەۋ باستالدى، كۇدىكتى ۋاقىتشا ۇستاۋ يزولياتورىنا قامالدى. تەرگەۋ امالدارى جۇرگىزىلىپ جاتىر.
پوليتسيا ازاماتتارعا ءىرى كولەمدەگى قاراجاتپەن مۇقيات بولۋدى، بوگدە ادامدارعا سەنبەۋدى جانە قاۋىپسىزدىك ەرەجەلەرىن قاتاڭ ساقتاۋدى ەسكەرتتى.