جەتىسۋ وبلىسىندا جىلدامدىقتى تىركەيتىن جاڭا كامەرالار ورناتىلدى

پوليتسيانىڭ مالىمەتىنشە، جاڭا اپپاراتتىق-باعدارلامالىق كەشەندەر «Ekin BOX SPOTTER» دەپ اتالادى. ولار اقسۋ، الاكول، ەسكەلدى، قاراتال، كەربۇلاق، كوكسۋ، پانفيلوۆ جانە سارقان اۋداندارى اۋماعىنا ورنالاستىرىلعان. ءار اۋداندا بەس جىلدامدىق ولشەگىش كەشەن ىسكە قوسىلعان.

بۇل كامەرالار اۆتوماتتى رەجىمدە جۇمىس ىستەپ، جىلدامدىقتى اسىرۋ فاكتىلەرىن تىركەيدى.

ۆەدومستۆونىڭ مالىمەتىنشە، رەسپۋبليكالىق جانە وبلىستىق ماڭىزى بار جولداردا «ZEREK-2» ،«VIDAR SPEED- R»، «سەرگەك» جانە «مەرگەن» جۇيەلەرى دە جۇمىس ىستەيدى. بۇل كامەرالار جىلدامدىقتى اسىرۋمەن قاتار قارسى جولاققا شىعۋ، جول تاڭباسىن ساقتاماۋ سەكىلدى وزگە دە قۇقىق بۇزۋشىلىقتاردى انىقتايدى.

پوليتسيا مۇنداي شارالار جول قوزعالىسىنا قاتىسۋشىلاردىڭ ءومىرى مەن دەنساۋلىعىن ساقتاۋ ءۇشىن قابىلدانىپ جاتقانىن اتاپ ءوتتى.

- جۇرگىزۋشىلەردى جىلدامدىق رەجىمىن جانە جول قوزعالىسى ەرەجەلەرىن ساقتاۋعا شاقىرامىز. جولداعى مۇقياتتىلىق پەن جاۋاپكەرشىلىك ادام ءومىرىن ساقتاۋعا كومەكتەسەدى، - دەپ مالىمدەدى ۆەدومستۆو وكىلدەرى.

قازىرگى تاڭدا جەتىسۋ وبلىسى اۋماعىندا قۇقىق بۇزۋشىلىقتاردى تىركەيتىن جانە بەينەباقىلاۋ جۇرگىزەتىن 2356 كامەرا جۇمىس ىستەيدى.

ايتا كەتەيىك، استانادا بەينەباقىلاۋ كامەرالارىنىڭ سانى ءبىر جىلدا ەكى ەسەگە ارتتى.