جەتىسۋ وبلىسىندا اۋىل اكىمىنىڭ باسى داۋعا قالدى
تالدىقورعان. KAZINFORM - اقسۋ اۋىلىنىڭ تۇرعىنى اسەم بوكەنوۆا اۋىل اكىمىنىڭ ۇستىنەن ارىز جازدى. كوپبالالى انا شەنەۋنىكتى ءتۇن ورتاسىندا تەرەزەدەن كىرىپ، زورلىق كورسەتپەك بولدى دەپ ايىپتاپ وتىر.
36 جاستاعى اسەم بوكەنوۆا اۋىلدىق اكىمشىلىكتە باس مامان بولىپ جۇمىس ىستەيدى. ول وتكەن شىلدە ايىنىڭ 31- كۇنى كۇتپەگەن جاعدايعا تاپ بولعانىن جەتكىزدى. كەلىنشەك ءتۇن ىشىندە شىرت ۇيقىدا جاتقاندا ۇيىنە بوتەن ادام كىرىپ كورپەسىن اشقانىن ايتادى.
«تۇنگى ساعات 02.30 شاماسىندا ۇيىقتاپ جاتسام تۋ سىرتىمنان بىرەۋ كەلىپ ءىش كيىمىمدى تارتادى. باسىندا تۇسىنگەن جوقپىن. انىقتاپ قاراسام ءداۋ بىرەۋ پىس- پىس ەتىپ، ىشىمدىك ءيىسى شىعىپ وتىر ەكەن. شوشىپ جۇگىرىپ بارىپ اس ءۇيدىڭ جارىعىن جاقسام جاڭاعى اكىم»، - دەيدى اسەم بوكەنوۆا.
ال، ءىلياس رايىمقۇلوۆ قولاستىنداعى قىزمەتكەرىنىڭ ءسوزىن جوققا شىعارىپ وتىر. ول اسەم بوكەنوۆانىڭ ۇيىندەگى دۇكەنگە بارعانىن، ءبىراق جابىق بولعان سوڭ قايتىپ كەتكەنىن ايتادى. سونداي-اق، اكىم بۇل قىزمەتتەن الۋ ءۇشىن ادەيى جابىلعان جالا دەپ توپشىلايدى.
«بۇل كىسى بۇرىنعى اكىمنىڭ كەزىندە جۇمىسقا كەلمەي ۇيدە جاتىپ اقشا الاتىن. سول كىسىنى قولداپ ماعان قارسى شىعىپ جالا جاۋىپ وتىر قازىرگى ۋاقىتتا. 31 نەن 1 نە قاراعان ءتۇنى دۇكەنگە بارعانىمىز راس. جانىمدا دوسىم مەن ايەلىم بولدى. دۇكەن جابىق ەكەن. قوڭىراۋىن باستىق، ەسىگىن تاقىلداتتىق. سودان ءبىز قايتىپ كەتتىك سول جەردەن. بۇل كىسى سۇمدىق جاعدايدى ايتىپ وتىر عوي، سونداي جاعداي بولعان بولسا نە سەبەپتى بىردەن پوليتسيا قىزمەتكەرلەرىنە حابارلاسپادى؟ ەرتەڭىندە تۇستەن كەيىن ءبىراق حابارلاسقان» دەيدى، - اقسۋ اۋىلدىق وكرۋگىنىڭ اكىمى ءىلياس رايىمقۇلوۆ.
بۇل جاعدايعا قاتىستى ق ر قىلمىستىق كودەكسىنىڭ 149-بابى 2-بولىگى بويىنشا ءىس قوزعالعان. الايدا، اسەم بوكەنوۆا بۇل باپپەن كەلىسپەيتىنىن جەتكىزدى. ءىس اقسۋ اۋداندىق سوتىندا قارالىپ جاتىر، كەلەسى سوت وتىرىسى 24-قىركۇيەكتە وتەدى دەپ جوسپارلانعان.
