جەتپىس ءۇش جاستاعى اقساقال قازاقستاننان تۇركياعا جاياۋ باردى
قازاقستاندىق ساياحاتشى تۇرىك استاناسىنا جەتپەس بۇرىن بىرنەشە مەملەكەتتى جاياۋ كەسىپ ءوتىپ، مىڭداعان شاقىرىمدى ارتقا تاستاعان، دەپ حابارلايدى قازاقپاراتتىڭ مەنشىكتى ءتىلشىسى.

قازاقستاندىق اقساقال سارسەنباي قوتىراشەۆ ءۇش مەملەكەتتىڭ اۋماعىن جاياۋ ءجۇرىپ ءوتتى. ول رەسەي مەن گرۋزيا ارقىلى تۇرىك ەلىنە جەتۋ ماقساتىندا قازاقستاننان 2-تامىزدا شىققان.
جولاۋشى - قاراپايىم اتا. ءبىراق ونى «قاراپايىم» دەپ اتاۋعا كەلمەيتىن ءتارىزدى. 73 جاستا ەكەنىنە قاراماستان، ەسسىز ارەكەتتەر ىستەۋگە كۇش-جىگەرى تولىپ تۇر.
اقساقال الەمدى ءوز كوزىمەن كورىپ، زەرتتەۋدى، ساياحاتتاپ، وتانىن تانىتۋدى بۇرىننان ارمانداعان ەكەن.
جاياۋ ءجۇرۋدى جاقسى كورەتىن اقساقال وسىلايشا 2 اي ىشىندە تۇركياعا جەتىپ، اڭىزعا اينالعان، تاريحي ىستامبۇلدا ساپارىن اياقتايدى.
الەمدى جاياۋ ارالاۋ تۋرالى وي سارسەنباي قوتىراشەۆقا 7 جىل بۇرىن كەلگەن. ءبىراق ونى ورىنداۋ مۇمكىندىگى بيىل عانا بۇيىردى. ءبىر جىل بۇرىن سارسەنباي اتا قازاقستاندى ارالاپ شىققان.
ەلىمىزدىڭ 17 وبلىسى مەن التايدى كەسىپ، 8000 شاقىرىم جول ءجۇردى.

ونىڭ ساياحاتتاۋداعى ماقساتى - الەم قوعامىن بەيبىتشىلىك پەن دوستىققا شاقىرۋ. ول جول بويى كەزدەسكەن ادامدارعا قازاقستان، قازاق ءتىلى مەن حالقىمىز تۋرالى ايتادى.
سونىمەن قاتار سارسەنباي اتا ادامدارعا قازاق حالقىنىڭ قۇندىلىقتارى مەن مادەنيەتىن ناسيحاتتاپ، تاريحي فاكتىلەردى ءبولىسىپ، قازىرگى، زاماناۋي قازاقستان تۋرالى اڭگىمەلەپ بەرەدى.
اقساقالدىڭ سوزىنشە، ساياحاتتاۋعا ەشقاشان كەش ەمەس، سول سەبەپتى ورنىڭنان تۇرىپ، جولعا شىعۋ كەرەك.
- ادام دەنساۋلىعىن جاقسارتقىسى كەلسە - كۇنىنە، كەمىندە 7 شاقىرىم جاياۋ ءجۇرۋ قاجەت. مەن سويتەمىن جانە ول ءۇشىن سپورتشى بولۋ مىندەتتى ەمەس، - دەيدى ساياحاتشى.
سارسەنباي اتانىڭ سوزىنشە، ونىڭ بالا كەزىندە سپورتپەن شۇعىلدانۋ مۇمكىندىگى بولماعان. ول قاراپايىم جۇمىسشىلار وتباسىندا وسكەندىكتەن، اكەسىنىڭ تابىسى بالاسىن سپورت سەكتسيالارىنا بەرۋگە جەتپەگەن.
اكەسى - ۇلى وتان سوعىسى ارداگەرى، اناسى - ەڭبەك ارداگەرى. ءوزى بەس بالانىڭ ۇلكەنى.

قازىر ساياحاتشى بولعان اتا جاس كەزىندە اتا-اناسىنا كومەكتەسۋگە ءماجبۇر بولىپ، ءوندىرىس ورنىندا جۇمىس ىستەگەن. بۇل جۇمىس وعان مىنەزىن شىڭداپ، دەنساۋلىعىن نىعايتۋعا كومەكتەستى.
تاڭعالارلىعى - جولدا ول ءبىر رەت تە اۋىرىپ نە ءوزىن جايسىز سەزىنبەگەن.
- مەن ءتۇرلى دارىگەرلەردەن بىرنەشە رەت مەديتسينالىق تەكسەرىستەن ءوتتىم، ولاردىڭ ءبارى مەنىڭ فيزيكالىق فورمام تاماشا ەكەنىن، ءوز جاسىم ءۇشىن دەنساۋلىعىم وتە جاقسى ەكەنىن ايتادى. اللاعا شۇكىر، دەنساۋلىعىمدا كىنارات جوق. قان قىسىمىم ءالى كۇنگە دەيىن 120×80، - دەپ اتاپ ءوتتى ول.
ءوزىنىڭ جاياۋ ساپارلارىن سارسەنباي اتا 3 كەزەڭگە بولگەن. ءبىرىنشى كەزەڭ - قازاقستان بويىنشا ساياحات بولدى. ەكىنشى كەزەڭ اياسىندا ول ءۇش ەلگە - رەسەي، گرۋزيا مەن تۇركياعا ساپارلادى.
بۇل جولى ول جەزقازعاننان استاناعا، ارى قاراي اتىراۋعا باردى. ودان كەيىن رەسەيگە، گرۋزياعا تابانىن تيگىزىپ، تۇركياعا جەتتى.
تۇرىكتەردىڭ استاناسىن كورگەننەن كەيىن ستامبۇلعا جەتىپ، سول جاقتا «جاياۋ سەرۋەنىن» اياقتاپ، ەلگە قايتۋدى جوسپارلاپ وتىر.

سارسەنباي اتا ساپارىنىڭ تۇركيادا اياقتالۋى دا بەكەر ەمەس. ۇزاق جولىن ول قازاقستان مەن تۇركيانىڭ باۋىرلاستىعىنا، سونداي-اق 3-قازاندا اتالىپ وتەتىن تۇركىتىلدەس ەلدەردىڭ ىنتىماقتاستىعى كۇنىنە ارنايدى.
- جيھان كەزۋ وتە قىزىق. ول ءۇشىن ماعان كوپ نارسە قاجەت ەمەس. مەن وزىممەن شابادان مەن جولدوربامدى عانا الىپ، ەڭ قاجەت زاتتاردى سالامىن. ماسەلەن، شابادانىمدا ۇيىقتاۋعا ارنالعان كورپە قاپ، اۋا رايىنا قاراي كيىم-كەشەك پەن جاۋىن وتكىزبەيتىن شەكپەن بار. سونىمەن قاتار ارباما قاجەت قوسالقى بولشەكتەر مەن كەي قۇرال-سايماندى سالىپ الدىم. جولعا كوپ تاماق المايمىن، ىستىقتا ول تەز بۇزىلىپ كەتۋى مۇمكىن. جولدورباما بەلگىلى ءبىر قاشىقتا جەپ ۇلگەرەتىن تاماقتى سالامىن. بۇل جولى ماعان ءوزىم قازىرگە دەيىن جۇمىس ىستەيتىن زاۋىت پەن ءبىزدىڭ گەوگرافيالىق قوعام قارجىلاي كومەكتەستى. جالپى جولعا ءوزىمنىڭ جيعان اقشام مەن زەينەتاقىما شىقتىم، - دەپ تاجىريبەسىن ءبولىستى ساياحاتشى.
ءۇشىنشى كەزەڭدى سارسەنباي اتا كەلەسى جىلى جۇزەگە اسىرۋدى جوسپارلاپ وتىر. ول 9 ەلدى جاياۋ شارلاپ، ەۋروپاعا بارماق.
