جەتىم بالالارعا باسپانا بەرۋدىڭ ارنايى باعدارلاماسى كەرەك - گەننادي شيپوۆسكيح

استانا. KAZINFORM - مەملەكەت تۇرعىن ءۇي، ءبىلىم الۋ جانە جۇمىسقا ورنالاسۋ كەزىندە جەتىم بالالارعا جەتكىلىكتى تۇردە قولداۋ جاساي الماي كەلەدى. بۇگىن سەناتتىڭ جالپى وتىرىسىندا دەپۋتات گەننادي شيپوۆسكيح ۇكىمەت باسشىسىنىڭ اتىنا جولداعان ساۋالىندا وسى پروبلەما تۋرالى ايتتى.

سەناتوردىڭ ايتۋىنشا، قولدانىستاعى مەملەكەتتىك باعدارلاماعا قاراماستان، جەتىمدەر مەن اتا-اناسىنىڭ قامقورلىعىنسىز قالعان بالالار ءالى دە كۇردەلى ماسەلەلەردەن ارىلا قويعان جوق. جەتىم بالالارعا باسپانا الۋعا جەڭىلدىك قاراستىرىلعان، الايدا ستاتيستيكا كورسەتكەندەي، كامەلەتكە تولعانداردىڭ بارىنە بىردەي باسپانا بەرىلە بەرمەيدى. 2022 -جىلى كەزەكتە تۇرعان 61471 جەتىمنىڭ 852 سى عانا باسپانا الدى، ال 2023 -جىلى 62290 مۇقتاج ادامنىڭ 809 ى عانا تۇرعىن ۇيگە يە بولدى.

دەپۋتات كوپتەگەن جەتىم وقۋ ورنىنان كەتكەننەن كەيىن، بولاشاق ءومىرىن قالاي جالعاستىرۋ كەرەك ەكەنىن بىلمەيتىنىن اتاپ ءوتتى. وسىعان بايلانىستى ول ءبىلىم الۋعا مۇمكىندىك بەرۋ ءۇشىن كوللەدجدەر مەن جوعارى وقۋ ورىندارىنداعى جەتىم بالالارعا ارنالعان گرانتقا كۆوتانى ۇلعايتۋدى ۇسىندى.

«شەشۋشى ماسەلە - جۇمىسپەن قامتۋدىڭ شەشىمىن تابۋ بولماق. وكىنىشكە قاراي، قازىر ورتا مەكتەپتى بىتىرگەن جەتىم بالالاردىڭ جۇمىسقا ورنالاسۋ كورسەتكىشى كوڭىل كونشىتپەيدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتىنا سۇيەنسەك، بيىل مانساپ ورتالىقتارىنىڭ كۆوتاسى اياسىندا بارلىعى 4275 ادام جۇمىسقا ورنالاستى، ونىڭ 85 سى عانا جەتىمدەر. جاستار اراسىندا جۇمىسپەن قامتۋ شارالارىمەن 188663 ادام قامتىلسا، ونىڭ نەبارى 56 سى عانا جەتىم بالالار. بۇل ماسەلەنى كوتەرۋ سەبەبىم، ءوزىم دە اتا-انادان ەرتە ايىرىلىپ، بالالار ءۇيىنىڭ تاربيەسىن كوردىم جانە بۇل ماسەلەلەردى ىشتەن بىلەمىن دەسەم ارتىق بولماس. ونداعى دوستارىمىزبەن وسى كۇنگە دەيىن ارالاسىپ تۇرامىز. ونىمەن قوسا، مەنىڭ اتىما جەتىم ازاماتتاردان كوپتەگەن ءوتىنىش كەلىپ تۇسەدى، ولاردىڭ باسىم بولىگى جوعارىدا ايتىلعانداي باسپانا الۋ مەن جۇمىسقا ورنالاسۋعا قاتىستى»، - دەدى گەننادي شيپوۆسكيح.

دەپۋتات پرەمەر-مينيسترگە كامەلەتكە تولعان جەتىم بالالارعا تۇرعىن ءۇيدى كۇتۋ مەرزىمىن قىسقارتاتىن ارنايى باعدارلاما ازىرلەۋدى، سونداي-اق وقۋىن اياقتاعاننان كەيىن ولاردى جۇمىسقا ورنالاستىرۋ ءۇشىن دەربەس باعدارلامانى ىسكە قوسۋدى ۇسىندى.

وسىعان دەيىن جامبىلدا شەنەۋنىكتەردىڭ كەسىرىنەن 156 جەتىم بالا ءۇي كەزەگىنە تۇرماعانى تۋرالى جازدىق.

اۆتور
رۋسلان عابباسوۆ