جۇسىپبەك ايماۋىت ۇلى ۇستاعان قۇران كىتاپ بۇقار جىراۋ مۋزەيىندە تۇر
پاۆلودار. KAZINFORM - بۇقار جىراۋ اتىنداعى ادەبيەت جانە ونەر مۋزەيىندە جۇسىپبەك ايماۋىت ۇلى ۇستاعان قۇران كىتاپ ساقتاۋلى تۇر. جادىگەردى زامانىندا باياناۋىلداعى ءابىلدا حازىرەت وزگە ءدىني كىتاپتارمەن بىرگە بۇقارادان كەرۋەن تارتتىرىپ الدىرعان ەكەن.
جۇسىپبەك تۋعان قاسيەتتى مەكەن ەجەلدەن «اۋليەلى قىزىلتاۋ» ءوڭىرى دەپ اتالادى. اۋماقتا ولكەتانۋشىلاردى قىزىقتىرىپ وتىرعان تاريحي مەكەننىڭ ءبىرى - شامامەن ⅩⅩ عاسىردىڭ باسىندا حازىرەت ءابىلدا يسابەك ۇلى سالدىرىپ، بالا وقىتقان مەشىت-مەدرەسە ورنى. بۇل ءدىني وقۋ ورنىندا زامانىندا جۇسىپبەك، جازۋشى، اتاقتى ساتيراشى قادىر تايشىقوۆ ساۋاتىن اشقان. ءابىلدا حازىرەت بۇقارادان كەرۋەن تارتتىرىپ، 10 تۇيەمەن 10 مارتە بارعىزىپ، ءۇيىپ-توگىپ ءدىني كىتاپ الدىرتقان. سوندا تۇيەدەن تۇسىرىلگەن كىتاپتار اتىراپتى الىپ جاتادى ەكەن.
1936 -جىلى بولشەۆيكتەر مەدرەسەنى تالقانداعاندا جۇرت ونىڭ ىشىندە قالانىپ تۇرعان قۇران كىتاپتاردىڭ بارلىعىن قادىردىڭ اتاسى تايشىقتىڭ مولاسىنا اپارىپ ۇيگەن. تايشىق اتانىڭ كەسەنەسى بيىكتەۋ ءارى ءۇستى اعاشپەن جابىلعاندىقتان، كىتاپتار ۇزاق جىلدار بويى ساقتالىپ كەلىپتى. الايدا كەيىن توبەسى جانىپ كەتىپ، كىتاپتار بۇلىنە باستاعان سوڭ جەرگىلىكتى ازاماتتار ءبۇتىن قالعاندارىن ۇيلەرىنە تاسىپ اكەتكەن. جۇسىپبەك ۇستاعان قۇران كىتاپتىڭ ءبىرىن ولكەتانۋشى رامازان نۇرعاليەۆ امان ساقتاپ قالىپ، باياناۋىلداعى مۇسا مىرزا مەشىتىنە تاپسىرىپتى. الگى كىتاپتىڭ العاشقى بەتىنە بەلگىسىز بىرەۋ لاتىن الىپبيىمەن مەدرەسەنىڭ ورتەلگەن ۋاقىتىن جازىپ قالدىرعان.
ج. ايماۋىت ۇلىنىڭ 135 جىلدىعىنا وراي تاريحي جادىگەردى باياناۋىل اۋدانىنىڭ باس يمامى سايان قوجين بۇقار جىراۋ مۋزەيىنە امانات ەتتى.
ەسكە سالا كەتەيىك، بۇعان دەيىن باياناۋىلدا جۇسىپبەك ايماۋىت ۇلى نەگىزىن سالعان مادەني كىندىك مەكەنى جايىندا سيپاتتاپ جازعان ەدىك.
اۆتور
مۇرات اياعان
