جۇرگىزۋشى كۋالىگىن قاجەت ەتپەيتىن كولىك
استانا. KAZINFORM - شاعىن كولىكتەرگە دەگەن سۇرانىس بۇكىل الەمدە كۇشەيە ءتۇستى. جۇرگىزۋشى كۋالىگىن قاجەت ەتپەيتىن كولىكتەردىڭ باعاسى ارزان ءارى ولار وتە ۇنەمدى.
ءداستۇرلى جەنيەۆا اۆتوسالونىندا Microlino Lite ەلەكتروكارى العاش رەت تانىستىرىلدى. ەكى ادامعا ەسەپتەلگەن شاعىن كولىكتىڭ كەپتەلىسى كوپ قالالاردىڭ تار كوشەلەرىندە وتە ءتيىمدى ەكەنىن newatlas.com سايتى جازدى.
جاڭا كولىكتىڭ باسقا دا ارتىقشىلىقتارىن Aikyn.kz امەريكالىق رەسۋرستىڭ ماتەريالىنا سۇيەنە وتىرىپ تالدايدى.
بۇعان دەيىن الەمدىك نارىقتا Mobilize Duo ،S04 جانە Ami سياقتى قالا تۇرعىندارىنىڭ كوڭىلىنەن شىعاتىن ميكرو-اۆتوموبيلدەر كورىنە باستادى. سونىڭ ىشىندە Microlino EV كوپىرشىككە ۇقسايتىن جەڭىل نۇسقاسىن ماماندار ەڭ سۇيكىمدىسى دەپ باعالاۋدا.
جەنيەۆا اۆتوسالونىندا ميكرو ەلەكتر كولىگىنىڭ سوڭعى نۇسقاسىنىڭ تۇساۋى كەسىلگەنى دە ورىندى دەپ سانالۋدا. ويتكەنى Microlino-نىڭ ءبىرىنشى مودەلى 2016-جىلى ءدال وسى شۆەيتساريادا تانىستىرىلعان بولاتىن.
العاشقى اۆتوموبيل 2022-جىلى شىعارىلا باستالدى، ديستريبيۋتورلىق كەلىسىمدەر بەلگيادا، گرەتسيادا، فرانسيادا، يتاليادا، نيدەرلاندىدا جانە شۆەيتساريادا جاسالدى.
وتكەن اپتادا Aikyn.kz پاريج تۇرعىندارىنىڭ ۇلكەن كولىكتەرگە قارسى شىققانى تۋرالى ماقالا جاريالادى. مۇنداي ءۇردىس باسقا مەگاپوليستەردە دە جالعاسادى دەگەن بولجامدار ايتىلۋدا.
ءىرى مەگاپوليستەرگە از سالماق ءتۇسىرۋ ماقساتىندا Microlino جاقسى ۇلگى بولۋى مۇمكىن. Microlino Lite ەكى تۇستە شىعارىلادى: «ۆەنەتسياندىق كوك» جانە «بەرليندىك انتراتسيت».
بۇل ەلەكترلى ميكرو كولىك جۇرگىزۋشى كۋالىگى جوق ادامدارعا، سونداي-اق جاس EV پايدالانۋشىلارىنا ارنالعان. مىسالى، فرانسيا مەن يتاليادا 14 جانە ودان جوعارى جاستاعى جۇرگىزۋشىلەر مەن ەرەسەكتەر بۇل كولىكتى جۇرگىزە الادى، تەك ولاردىڭ موپەدتى پايدالانۋ ءۇشىن رۇقساتى بولسا جەتكىلىكتى. ميكرو كولىكتىڭ ەڭ جوعارى جىلدامدىعى 45 ك م/ساعاتپەن شەكتەلگەن.
Microlino Lite جازدا ىڭعايلى بولۋ ءۇشىن توبەسىنە ارنايى ليۋك ورناتىلعان. تەحنيكالىق سيپاتتامالارىندا ونىڭ ماكسيمالدى قۋاتى 9 كۆت بولاتىن 6 كۆت قوزعالتقىشتى كورسەتەدى. ول شامامەن 100 شاقىرىم قاشىقتىقتى شىعارىندىسىز قالا اۋقىمىنا جارامدى ليتي-يوندى باتارەيامەن جابدىقتالعان. كولىكتىڭ 11 كۆت قوزعالتقىشپەن جابدىقتالعان ءتۇرى دە بار.
ميكرو كولىكتىڭ تولىق قۋاتى 180 شاقىرىمعا دەيىن جەتەدى. اككۋمۋلياتورىن 2 ءتيپتى قۋات كوزىن پايدالانىپ، بىرنەشە ساعات ىشىندە %80 عا دەيىن تولىق قۋاتتاۋعا بولادى.
كورپۋسى اۆتوموبيلدەرگە ارنالعان بولات-اليۋميني ماتەريالدان قاپتالعان. ولشەمدەرى 252x147x150 س م جانە سالماعى 571 كەلى.
الدىڭعى پانەلدە ناۆيگاتسيا ءۇشىن پايدالانۋعا بولاتىن سمارتفوندى بەكىتۋگە ارنالعان تاقتايشا بار. جۇرگىزۋشى مەن جولاۋشى الدىڭعى جاعىنان كىرەدى. نەگىزگى قۇرالدار پانەلىندە سيفرلىق اسپاپتار مەن كليماتتىق باقىلاۋ جۇيەسى ورناتىلعان.
سالوندا قۇرىلعىلاردى قۋاتتاۋعا ارنالعان USB پورتتارى، جىلىتقىش جۇيەسى مەن ارتقى تەرەزەدە مۇزدى ەرىتەتىن جولاقتار بار. سالوننىڭ ىشكى كولەمى 230 ليتر جانە وندا قاجەتتى جۇكتەردى تاسىمالداۋعا ىڭعايلى ورىن دا قاراستىرىلعان.
ءبولىپ تولەۋگە ارنالعان باعدارلاما بويىنشا Microlino Lite كولىگىن ايىنا 169 ا ق ش دوللارى تولەپ قولدانۋعا بولادى. كولىك، قازىرشە تەك ەۋروپادا قولجەتىمدى.
aikyn.kz
