جۇرەگىمىز امان بولسىن دەسەك قانداي زياندى ادەتتەردەن اۋلاق بولعان ءجون

الماتى. KAZINFORM - بۇگىنگى كۇنى الەمدە جۇرەك- قان تامىرلارى اۋرۋلارى ادام ءولىمىنىڭ نەگىزگى سەبەپتىڭ بىرىنە اينالعان. ونىڭ كوپشىلىگى ءبىز تۇسىنە بەرمەيتىن نەمەسە ءمان بەرمەيتىن جامان ادەتتەرمەن بايلانىستى. بۇل تۋرالى الماتى قالالىق كارديولوگيالىق ورتالىعىنىڭ كارديولوگى اقنۇر ارىستانوۆا ايتتى. ول سونداي-اق قانداي زياندى ادەتتەردىڭ جۇرەككە قاۋىپتى ەكەنىن جانە ولاردان ارىلۋ جولدارىن ايتىپ بەردى.

دارىگەردىڭ سوزىنشە، تەمەكى شەگۋ - جۇرەككە اسەر ەتەتىن ەڭ قاۋىپتى ادەتتىڭ ءبىرى.

«نيكوتين جانە تەمەكىدەگى باسقا زاتتار اتەروسكلەروز جانە ميوكارد ينفاركتىسى سياقتى جۇرەك اۋرۋلارىنىڭ دامۋ قاۋپىن ارتتىرادى. سوندىقتان تەمەكى شەگۋدەن باس تارتۋ - جۇرەگىڭىزدى قورعاۋدىڭ ەڭ جاقسى ءتاسىلدىڭ ءبىرى. ودان كەيىن - دۇرىس تاماقتانباۋ. مايلاردى، قانتتى، تۇزدى جانە وڭدەلگەن تاعامدى شامادان تىس تۇتىنۋ سەمىزدىككە، قىسىمنىڭ جوعارىلاۋىنا جانە جۇرەككە قاۋىپ توندىرەتىن باسقا فاكتورلارعا اكەلۋى مۇمكىن. جۇرەك دەنساۋلىعىن ساقتاۋ ءۇشىن جەمىس، كوكونىس، ءداندى داقىلدار جانە مايسىز اقۋىزداردى كوبىرەك تۇتىنۋ ۇسىنىلادى. ۇشىنشىدەن، قوزعالىسى از ءومىر سالتى. فيزيكالىق بەلسەندىلىكتىڭ بولماۋى جۇرەك-قان تامىرلارى اۋرۋلارىنىڭ دامۋ ىقتيمالدىعىن ارتتىرادى»، - دەيدى اقنۇر ارىستانوۆا.

الكوگولدى شامادان تىس تۇتىنۋ دا جۇرەك دەنساۋلىعىنا دا كەرى اسەر ەتەدى. الكوگولدى كوپ مولشەردە ءىشۋ قان قىسىمىن، حولەستەريندى جوعارىلاتىپ، اريتميا مەن باسقا دا جۇرەك پروبلەمالارىنىڭ دامۋ ءقاۋپىن ارتتىرۋى مۇمكىن.

سترەسس پەن تۇراقتى شيەلەنىس جۇرەككە تەرىس اسەر ەتەدى، بۇل قىسىمنىڭ جوعارىلاۋىنا، جۇرەك سوعۋ جيىلىگىنىڭ جوعارىلاۋىنا جانە باسقا ماسەلەلەرگە اكەلەدى.

«جوعارىدا ايتىلعانداردىڭ ءبارىن ەسكەرە وتىرىپ، جۇرەكتىڭ دەنساۋلىعىن ساقتاۋ ءۇشىن جامان ادەتتەن اۋلاق بولۋ جانە سالاۋاتتى ءومىر سالتىن ۇستانۋ قاجەت. تۇراقتى مەديتسينالىق تەكسەرۋ، دۇرىس تاماقتانۋ، فيزيكالىق بەلسەندىلىك جانە تەمەكى شەگۋدەن باس تارتۋ جۇرەك- قان تامىرلارى اۋرۋلارىنىڭ ءقاۋپىن ازايتۋعا جانە كوپ جىل بويى دەنساۋلىقتى ساقتاۋعا كومەكتەسەدى»، - دەپ اتاپ ءوتتى كارديولوگ دارىگەر اقنۇر ارىستانوۆا.

ەسكە سالساق، بۇعان دەيىن فاستفۋد تا - جۇرەك اۋرۋىنىڭ باستى سەبەبى بولاتىنىن جازعانبىز.

اۆتور
دۋمان ارعىنگەلدى