جەرۇستى جانە جەراستى وتكەلدەرى جاڭا ستاندارت بويىنشا جوندەلەدى - الماتى اكىمى
الماتى. KAZINFORM - الماتىداعى جەراستى جاياۋ جۇرگىنشىلەر وتكەلدەرى مەن جەرۇستى وتكەلدەرىندەگى ليفتتەر مەن كوتەرگىش قۇرىلعىلار جاڭا ستاندارتقا ساي جوندەلەدى. بۇل تۋرالى الماتى اكىمى ەربولات دوسايەۆ اۋەزوۆ اۋدانى تۇرعىندارىمەن كەزدەسۋ بارىسىندا ءمالىم ەتتى.
قالا تۇرعىندارىنىڭ ءبىرى جول وتكەلدەرىندەگى كوتەرگىشتەردىڭ جۇمىس ىستەمەيتىنىڭ ايتىپ، شاعىمداندى.
«بىزدە بۇكىل قالادا كوپىرلەردە كوتەرگىشتەر بار. ولاردى كۇتىپ ۇستاۋعا جانە پايدالانۋعا اقشا بولىنەدى، ءبىراق ولار ءاردايىم جۇمىس ىستەي بەرمەيدى. كىلت ماسەلەسى دە بار. قاشان ءتارتىپ ورناتىلادى؟»، - دەپ سۇرادى اكىمنەن اۋەزوۆ اۋدانىنىڭ تۇرعىنى.
ەربولات دوسايەۆ تەڭ قولجەتىمدىلىك پەن تەڭ مۇمكىندىك ماسەلەسى ەرەكشە باقىلاۋدا ەكەنىن اتاپ ءوتتى.
«مەن ارنايى كوميسسيا قۇردىم، ونى ءوزىم باسقارامىن. قالا قۇرىلىسى كەڭەسىنە قاتىستى ماسەلەنى ينكليۋزيۆتى قوعامعا ەنگىزدىم. قۇرىلىس ەرەجەسىندە ءبىز قازىر وسىنداي وكىلەتتىككە يە بولدىق. مەملەكەت باسشىسى الماتىنىڭ ەرەكشە مارتەبەسى تۋرالى زاڭعا وزگەرىستەر مەن تولىقتىرۋلارعا قول قويدى، وندا نىسانداردى قابىلداۋ، تالاپتار بويىنشا ماسەلەلەر كوزدەلەدى. الماتى قالاسىنىڭ ديزاين-كودىندا ءبىز قاجەتتى زاتتاردى بەكىتتىك»، - دەدى ەربولات دوسايەۆ.
ايتۋىنشا تەك اۋەزوۆ اۋدانىندا جىل سوڭىنا دەيىن 5 جەرۇستى وتكەلى جاڭا ستاندارت بويىنشا قايتا جاڭارتىلادى.
مەگاپوليس باسشىسى ليفت كىلتىنىڭ ورنىنا ازاماتتاردىڭ، ونىڭ ىشىندە قارتتار مەن ەرەكشە قاجەتتىلىگى بار ادامداردىڭ جەڭىلدەتىلگەن ساناتىن ەسكەرەتىن «وناي» كارتوچكالارىن پايدالانۋ مۇمكىندىگى قاراستىرىلىپ جاتقانىن جەتكىزدى.
«وكىنىشكە قاراي كەيبىر قالا تۇرعىندارىنىڭ مادەنيەتى تومەن، بۇل وتكەلدە ءليفتتى پايدالانۋعا قاتىستى. سوندىقتان ءبىز وعان شىنىمەن مۇقتاج جانداردىڭ مۇددەسى ءۇشىن شەكتەۋلەر ەنگىزۋگە ءماجبۇرمىز. اۋدانداعى ليفتتەر وسى جىلدىڭ سوڭىنا دەيىن جوندەلەدى»، - دەدى الماتى اكىمى.
اۆتور
الما مۇقانوۆا
