جۋرناليستەردى ءىس-شارالارعا تىركەۋ ءتارتىبى وزگەرەدى

استانا. KAZINFORM - ب ا ق وكىلدەرىن ءىس-شارالارعا تىركەۋ قاعيدالارىنا وزگەرىستەر ەنگىزىلمەك. قاۋلى جوباسى «اشىق ن ق ا» پورتالىندا جاريالاندى.

جۋرناليستەردى اككرەديتتەۋدىڭ جاڭا قاعيدالارى «ماسس- مەديا تۋرالى» قازاقستان رەسپۋبليكاسى زاڭىنىڭ 28-بابىنىڭ 1-تارماعىنا سايكەس ازىرلەندى.

«اككرەديتتەۋشى ۇيىم قىزمەتىنىڭ ەرەكشەلىگىن ەسكەرە وتىرىپ، جۋرناليستەردى اككرەديتتەۋدى جۇرگىزۋگە وتىنىشتەردى قابىلداۋ جانە قاراۋ ءتارتىبىن، ونىڭ ىشىندە مەرزىمىن دە بەلگىلەيدى»، - دەلىنگەن قاۋلىنىڭ تۇسىندىرمە جازباسىندا.

اككرەديتتەلگەن ب ا ق وكىلدەرى كەلەسى شارتتاردى ساقتاۋى ءتيىس:

- اككرەديتتەلگەن مەملەكەتتىك ورگاندار مەن ۇيىمداردان الىنعان اقپاراتتى ونىڭ اتىنان اككرەديتتەۋگە ءتيىستى ءوتىنىش كەلىپ تۇسكەن بۇقارالىق اقپارات قۇرالدارىندا عانا جيناۋ جانە تاراتۋ؛

- اككرەديتتەۋشى ۇيىم جۇرگىزەتىن ءىس-شارالار رەگلامەنتىنىڭ ساقتالۋى؛

- اسا ماڭىزدى مەملەكەتتىك وبەكتىلەر مەن ستراتەگيالىق وبەكتىلەردىڭ وتكىزۋ جانە ىشكى رەجيمىن ساقتاۋ.
قانداي جاعدايدا اككرەديتتەۋدەن باس تارتۋى مۇمكىن:

- بۇقارالىق اقپارات قۇرالىنىڭ ءونىمىن تاراتۋدى نە بۇقارالىق اقپارات قۇرالىن شىعارۋدى توقتاتا تۇرۋ نە توقتاتۋ تۋرالى زاڭدى كۇشىنە ەنگەن سوت شەشىمىنىڭ بولۋى؛

- اككرەديتتەۋ تارتىبىندە كورسەتىلگەن قۇجاتتاردى ۇسىنباۋ؛

- ەسەپكە قويىلعان بۇقارالىق اقپارات قۇرالدارىنىڭ تىزىمىندە بولماۋى.

«جۋرناليستەردى اككرەديتتەۋدىڭ وڭايلاتىلعان ءتارتىبى ءبىرىڭعاي مەديا پلاتفورما ارقىلى جۇزەگە اسىرىلادى. سونداي-اق، مەديا پلاتفورمادا قازاق جانە ورىس تىلدەرىندە اككرەديتتەۋدى جۇرگىزۋگە وتىنىشتەردى قابىلداۋدى باستاۋ تۋرالى حابارلاندىرۋ ورنالاستىرىلادى. جۋرناليستەرگە «ماسس-مەديا تۋرالى» قازاقستان رەسپۋبليكاسى زاڭىنىڭ 28-بابىنىڭ 1-تارماعىنا سايكەس ماسس-مەديا سالاسىنداعى ۋاكىلەتتى ورگان ايقىندايتىن تارتىپپەن اككرەديتتەۋ كارتالارى بەرىلەدى»، - دەگەن تۇسىنىكتەمە بەرىلگەن جوبادا.

قاۋلى جوباسى 1-تامىزعا دەيىن قوعام تالقىسىنا ۇسىنىلىپ وتىر.

ەسكە سالا كەتسەك، مەملەكەت باسشىسى 19-ماۋسىمدا «ماسس- مەديا تۋرالى» زاڭعا قول قويعان ەدى.

اۆتور
داۋلەت ىزتىلەۋ