جۇرەككە سالماق تۇسىرەتىن 6 نارسە: ءوزىڭىزدى تەكسەرىپ كورىڭىز
استانا. KAZINFORM - بۇگىن - دۇنيەجۇزىلىك جۇرەك كۇنى. جۇرەك-قانتامىر اۋرۋلارى الەمدە ءولىم مەن مۇگەدەكتىكتىڭ نەگىزگى سەبەپتەرىنىڭ ءبىرى بولىپ قالا بەرەدى. دەگەنمەن ولاردىڭ دامۋىنا اسەر ەتەتىن ءبىرقاتار قاۋىپ فاكتورىن باقىلاۋدا ۇستاۋعا بولادى.
مامانداردىڭ ايتۋىنشا، جۇرەككە سالماق تۇسىرەتىن نەگىزگى التى فاكتور بار. ولار - قان قىسىمىنىڭ جوعارى بولۋى، تەمەكى شەگۋ، دۇرىس تاماقتانباۋ، دەنە بەلسەندىلىگىنىڭ تومەندىگى، ارتىق سالماق جانە قانت ديابەتى.
وسى فاكتورلاردىڭ ءبىر بولىگى ادامنىڭ كۇندەلىكتى ءومىر سالتىنا تىكەلەي بايلانىستى. سوندىقتان قان قىسىمى مەن قانداعى قانت دەڭگەيىن تۇراقتى باقىلاۋ، دۇرىس تاماقتانۋ، كوبىرەك قيمىلداۋ جانە تەمەكىدەن باس تارتۋ جۇرەك دەنساۋلىعىن ساقتاۋعا كومەكتەسەدى.
قازاقستاندا جۇرەك- قانتامىر اۋرۋلارىنىڭ الدىن الۋ جانە ەمدەۋ باعىتىندا جۇمىستار جۇرگىزىلىپ جاتىر. سوڭعى بەس جىلدا قاناينالىم جۇيەسى اۋرۋلارىنان بولاتىن ءولىم-ءجىتىم 35,1 پايىزعا، ال سىرقاتتانۋشىلىق شامامەن 15 پايىزعا تومەندەدى.
وڭ ديناميكا بيىل دا بايقالادى. 2026 -جىلدىڭ العاشقى التى ايىندا وتكەن جىلدىڭ سايكەس كەزەڭىمەن سالىستىرعاندا:
قاناينالىم جۇيەسى اۋرۋلارىنىڭ سىرقاتتانۋشىلىعى 2,4 پايىزعا؛
ارتەريالىق گيپەرتەنزيا 6,7 پايىزعا؛
جۇرەكتىڭ يشەميالىق اۋرۋى 6,6 پايىزعا؛
ينسۋلت 2,3 پايىزعا تومەندەدى.
بۇل كورسەتكىشتەر كارديولوگيالىق جانە ينسۋلتتىك قىزمەتتەردى دامىتۋعا باعىتتالعان جۇيەلى جۇمىستىڭ ناتيجەسى. قازاقستاندا بەيىندى مەديتسينالىق ورتالىقتاردىڭ جەلىسى كەڭەيىپ، جوعارى تەحنولوگيالىق وپەراتسيالار كوبەيىپ كەلەدى. سونىمەن قاتار جەدەل مەديتسينالىق كومەك جەتىلدىرىلىپ، ينفاركت پەن ءينسۋلتتى ەمدەۋدىڭ زاماناۋي حاتتامالارى ەنگىزىلىپ جاتىر.
دەگەنمەن ماماندار دەنساۋلىقتى ساقتاۋدا ادامنىڭ ءوز جاۋاپكەرشىلىگى دە ماڭىزدى ەكەنىن اتاپ وتەدى.
ءوزىڭىزدى تەكسەرىپ كورىڭىز: قان قىسىمىڭىزدى جانە قانداعى قانت دەڭگەيىن تۇراقتى ولشەپ تۇرىڭىز، پروفيلاكتيكالىق تەكسەرۋلەردەن ءوتىڭىز، كۇندەلىكتى قوزعالىستى كوبەيتىڭىز، تەمەكىدەن باس تارتىڭىز جانە دۇرىس تاماقتانۋعا كوڭىل ءبولىڭىز.
