جۇرەك اۋرۋىنا اكەپ سوعادى: جاتىن بولمەدەگى جارىق نەسىمەن قاۋىپتى؟
استانا. قازاقپارات - كارولينسكايا ينستيتۋتىنىڭ عالىمدارى تۇندە جاتىن بولمەنى جاساندى جارىقتاندىرۋ مەن جۇرەك- قان تامىرلارى پاتولوگياسىنىڭ دامۋ قاۋپىنىڭ جوعارىلاۋى اراسىنداعى بايلانىستى راستادى. زەرتتەۋ ناتيجەلەرى The Lancet Cardiovascular Research جۋرنالىندا جاريالاندى.
زەرتتەۋ جەتەكشىسى پروفەسسور مايكل پەررەس عالىمدار جاتىن بولمەدەگى جاساندى جارىقتاندىرۋ مەن اتەروسكلەروزدىڭ جەدەل دامۋى اراسىندا ناقتى بايلانىس تاپقانىن حابارلادى. بۇل - بۇكىل اعزاداعى تامىرعا (ارتەريالارعا) اسەر ەتەتىن اۋرۋ.
اتەروسكلەروز كەزىندە ارتەريالىق تامىرلاردىڭ ىشكى قابىعىندا مايلى، نەگىزىنەن حولەستەريندى شوگىندىلەردىڭ وشاقتارى پايدا بولادى، بۇل تامىر ارناسىنىڭ تولىق بىتەلۋىنە دەيىن تارىلۋىنا اكەپ سوقتىرادى. مۇنداي بۇزىلىستىڭ سالدارىنا ترومبوەمبوليا، ينفاركت، ينسۋلت جانە جۇرەك جەتكىلىكسىزدىگى ناتيجەسىندە تىندەردىڭ يشەمياسى جاتادى.
زەرتتەۋگە ەرەسەك ەرىكتىلەر قاتىستى، ولاردىڭ جاس، دەنە سالماعى، جامان ادەتتەر جانە باستاپقى دەنساۋلىق جاعدايى سياقتى ءارتۇرلى فاكتورلار قاراستىرىلدى. ءتىپتى جۇمساق جاساندى جارىقتاندىرۋ جۇرەك- قان تامىرلارى اۋرۋلارىنىڭ دامۋ ءقاۋپىن ارتتىراتىنى بەلگىلى بولدى.
عالىمداردىڭ ايتۋىنشا، جاتىن بولمەدەگى جاساندى جارىق اعزانىڭ تسيركادتى ىرعاعىن رەتتەيتىن گورمون - مەلاتونين ءوندىرىسىن تەجەيدى. بۇل تابيعي بيولوگيالىق پروتسەستەردى بۇزادى جانە اتەروسكلەروتيكالىق تۇيىنشەككە بايلانىستى جۇرەك- قان تامىرلارى جۇيەسىندە ءبىرقاتار پروبلەما تۋدىرۋى مۇمكىن.
