جۇرەك اۋرۋىن بولدىرماۋ ءۇشىن ساعات نەشەدە ۇيىقتاۋ كەرەك؟

Ұйқы
فوتو: pexels.com

استانا. قازاقپارات - دۇرىس ۇيىقتاماۋ اعزاداعى كوپتەگەن بۇزىلىستاردىڭ سەبەبى بولۋى جانە دەپرەسسيانىڭ پايدا بولۋىنا ىقپال ەتۋى مۇمكىن. ساپالى تۇنگى ۇيقى كۇشتىڭ قالىپقا كەلۋىنە جانە تاڭەرتەڭ سەرگەك ويانۋعا كومەكتەسەدى. ساعات نەشەدە ۇيىقتاۋ كەرەك جانە ۇيقى رەجيمى ءجيى بۇزىلسا نە بولادى؟

ۇيقى مامانى جانە دارىگەر پۋدجانا پاريحتىڭ ايتۋىنشا، ۇيىقتاۋعا جاتۋ ۋاقىتى ءار ادامنىڭ سيركادتى ىرعاعىنا بايلانىستى. سيركادتى ىرعاق دەگەنىمىز - ۇيقى مەن سەرگەكتىك سيكلىن رەتتەيتىن اعزانىڭ ىشكى ساعاتى.

«عالىمدار ۇيىقتاۋعا ارنالعان ەڭ جاقسى ۋاقىت - 22:00 مەن تۇنگى 12:00 اراسى ەكەنىن بايقاعان. الايدا بارلىعى ءسىزدىڭ كەلەسى كۇنى قاي ۋاقىتتا وياناتىنىڭىزعا بايلانىستى»، - دەپ ءتۇسىندىردى پاريح.

كوپشىلىك ەرەسەك ءۇشىن ءۇزىلىسسىز 7-8 ساعاتتىق ۇيقى قاجەت. ەگەر ادام تاڭعى 7:00-دە تۇرسا، ساعات 23:00-دە ۇيىقتاۋعا جاتقانى ءجون.

ەگەر ۇنەمى جاي ۇيىقتاسا نە بولادى؟

ۇيقى رەجيمىن ساقتاماۋ ميوكارد ينفاركتىسىنىڭ قاۋپىن ارتتىرۋى مۇمكىن.

«ۋاقىتىندا ۇيىقتاماۋ ارتىق تاماقتانۋعا اكەلەدى، سەبەبى بۇل كەزدە اشتىق گورمونى - گرەليننىڭ وڭدەلۋى ارتادى. سوندىقتان تابەتىڭىز اشىلادى. بۇل قىسقا ۋاقىت ارالىعىندا ارتىق سالماققا، ال ەگەر بۇل ادەت ۇزاققا سوزىلسا، جۇرەك- قان تامىرلار اسقىنۋلارىنا اكەلۋى مۇمكىن»، - دەيدى دارىگەر.

ۇيىقتاي الماساڭىز نە ىستەۋ كەرەك؟

كەيدە ادام قاتتى شارشاسا دا ۇيىقتاي الماۋى مۇمكىن. توسەكتە 15-20 مينۋت بويى ۇيىقتاي الماي جاتۋ - قالىپتى نارسە. الايدا ۇيىقتاي الماي جاتقانىڭىزعا 30 مينۋت بولسا، ورنىڭىزدان تۇرىپ مىنا نارسەلەردى جاساڭىز:

سوزىلۋعا ارنالعان جەڭىل جاتتىعۋلار جاساڭىز؛

كىتاپ وقىڭىز. ءبىراق كىتاپ قاتتى قىزىقتى بولماۋى كەرەك؛

ىستىق ۆاننا قابىلداڭىز؛

تابيعات دىبىستارىن تىڭداڭىز.

سوڭعى جاڭالىقتار