جەردى بولۋگە ارنالعان كونكۋرستارعا تالاپ كۇشەيەدى
استانا. KAZINFORM - الەۋەتتى مەنشىك يەلەرىنە قويىلاتىن توپىراق ساپاسىن، وسىمدىك جامىلعىسىن ساقتاۋ، جايىلىمداردىڭ توزۋىن بولدىرماۋ، اۋىسپالى ەگىستەردى ساقتاۋ جانە جەردى ۇتىمدى پايدالانۋ تيىمدىلىگىن ارتتىرۋ بويىنشا باسقا دا قارسى مىندەتتەمەلەر قولدانىستاعى كونكۋرستارداعى تالاپتاردا كۇشەيتىلەتىن بولادى. بۇل تۋرالى primeminister.kz. سايتى جازدى.
مۇنداي تاپسىرمانى 2024 -جىلعى 3-ساۋىردە وتكەن پايدالانىلماي جاتقان جانە زاڭنامانى بۇزا وتىرىپ بەرىلگەن جەرلەردى الىپ قويۋ ماسەلەلەرى جونىندەگى كوميسسيانىڭ كەزەكتى وتىرىسىنىڭ قورىتىندىسىندا پرەمەر-ءمينيستردىڭ ورىنباسارى سەرىك جۇمانعارين بەردى.
جەر رەسۋرستارىن باسقارۋ كوميتەتىنىڭ ءتوراعاسى مۇرات تەمىرجانوۆتىڭ ايتۋىنشا، 2024 -جىلدىڭ باسىنان بەرى اۋىل شارۋاشىلىعى ماقساتىنداعى 391,2 مىڭ گەكتار، ال 2022-2024 -جىلدارى بارلىعى 10,4 ميلليون گەكتار جەر مەملەكەت مەنشىگىنە قايتارىلعان. ونىڭ 3,7 ميلليون گەكتار جەرى جەرگىلىكتى حالىققا قايتا ءبولىندى (جالپى ماقساتتاعى مال جايۋعا - 1,72 ميلليون گەكتار، كونكۋرستىق نەگىزدە ءبولىپ پايدالانۋعا - 1,69 ميلليون گەكتار).
«ايتا كەتۋ كەرەك، اۋىل شارۋاشىلىعى جەرلەرىنىڭ 4,4 ميلليون گەكتار نەمەسە 2022 -جىلدان باستاپ ەل بويىنشا قايتارىلعان بارلىق جەردىڭ %44 ى بۇرىن 204 ءىرى كاسىپكەرلىك سۋبەكتىلەرىنىڭ قولىندا بولعان»، - دەپ حابارلادى مۇرات تەمىرجانوۆ.
جايىلىم تاپشىلىعىن ازايتۋ ءۇشىن اكىمدىكتەرگە، جالپى پايدالانۋعا، مال جايۋ ءۇشىن 562,1 مىڭ گەكتار جايىلىمدىق جەر بەكىتىلىپ بەرىلگەن، 65,1 مىڭ گەكتار جايىلىم جەر پايدالانۋعا كونكۋرستىق نەگىزدە بەرىلگەن، 746,6 مىڭ گەكتار رەزەرۆكە قويىلعان. ەلدى مەكەندەر شەگىنە 97,3 مىڭ گەكتار جايىلىمدىق جەر ەنگىزىلدى.
«بۇگىندە ءبىزدىڭ نەگىزگى مىندەتىمىز - جەردى قايتارۋ عانا ەمەس، ءتيىمدى پايدالانۋ جانە جەر پايدالانۋشىلاردى باقىلاۋ. الىنعان جەرلەردى پايدالانۋ مەن جاقسارتۋ ءۇشىن جاۋاپكەرشىلىكتى كۇشەيتۋ قاجەت. بايقاۋ شارتتارىن بيزنەس-قوعامداستىقپەن، اكىمدىكتەرمەن جانە باسقا دا مۇددەلى قاتىسۋشىلارمەن تالقىلاعان ءجون. توپىراقتى، وسىمدىك قۇرامىن ساقتاۋ، زاماناۋي تەحنولوگيالاردى پايدالانۋ بويىنشا قارسى مىندەتتەمەلەر قويۋ كەرەك. ول ءۇشىن جەردى ءبولۋدىڭ جاڭا ەرەجەلەرى مەن پرينتسيپتەرىن ازىرلەۋ قاجەت»، - دەدى سەرىك جۇمانعارين.
پيلوتتىق رەجيمدە مەملەكەتتىك جەر كاداسترىنىڭ جانە تەحنيكالىق زەرتتەۋدىڭ اۆتوماتتاندىرىلعان اقپاراتتىق جۇيەسى 2.0 جەر پايدالانۋشىنىڭ ەسەپتىك جازباسى قۇرىلدى. وندا توپىراقتىڭ (قاراشىرىك، جىلجىمالى مينەرالدار) جانە وسىمدىك جامىلعىسىنىڭ جاي-كۇيىنىڭ جوعارى ساپالى اگروحيميالىق سيپاتتاماسى بار جەر ۋچاسكەسى تۋرالى اقپارات بولادى. ونى ۇتىمدى پايدالانۋ كريتەرييلەرىنە سايكەستىگىن قامتاماسىز ەتۋ ءۇشىن بەس جىل سايىن ۋچاسكەنى زەرتتەۋ جۇمىستارى جۇرگىزىلەتىن بولادى. ەگەر ونىمدىلىكتىڭ ناشارلاۋى انىقتالسا، ءتيىستى شارالار قابىلدانادى.
