جەر سىلكىنگەندە الماتىداعى مەترو قانشالىقتى قاۋىپسىز
استانا. KAZINFORM - الماتى قالاسىنىڭ مەتروپوليتەنى نىساندارىن جوبالاۋ جانە سالۋ كەزىندە جولاۋشىلار مەن قىزمەتكەرلەردىڭ قاۋىپسىزدىگىن قامتاماسىز ەتۋ ءۇشىن بارلىق قاجەت تالاپتار ورىندالعان.
قۇرىلىستار ءتۇرلى باعىتتاعى سەيسميكالىق تولقىنداردىڭ ىقتيمال سالدارىن ەسكەرە وتىرىپ جوبالانعان. بۇل تۋرالى Kazinform اگەنتتىگىنىڭ رەسمي ساۋالىنا جاۋاپ بەرگەن الماتى مەتروپوليتەنىنىڭ باسپا ءسوز قىزمەتى حابارلادى.
«تۋننەلدەر مەن تەرەڭدەگى قۇرىلىستاردىڭ، ياعني تىرەۋ جانە قورشاۋ كونسترۋكتسيالارى سەيسميكالىق تولقىنداردىڭ قىسىمىنا توتەپ بەرۋگە ارنالعان»، - دەلىنگەن الماتى قالاسى مەتروپوليتەنى مالىمەتىندە.
قۇرىلىس كەزىندە مەترو اۋماعىنىڭ 9 بالدىق سەيسميكالىق دەڭگەيى ەسكەرىلدى. جەر سىلكىنگەندە بولاتىن تەربەلىس كەزىندە تۋننەلدەردىڭ بەل ورتاسى بويىمەن دەفورماتسيانىڭ الدىن الۋ ءۇشىن بۇكىل جەلى بويىمەن، سونداي-اق باسقا دا جەراستى نىسانداردا سەيسميكاعا قارسى ارنايى دەفورماتسيالىق جىكتەر قاراستىرىلعان.
كومپانيا اقپاراتىنا قاراعاندا، مەترو قۇرىلىس قۇرىلىمدارى مەن جەلىلەردىڭ ءتيىستى پارامەترلەردەن اۋىتقۋىن ەرتە كەزەڭدە انىقتاۋعا مۇمكىندىك بەرەتىن اۆتوماتتاندىرىلعان باقىلاۋ جۇيەسى جۇمىس ىستەپ تۇر.
«اپپاراتتىق-باعدارلامالىق كەشەندە تۇيىسەتىن نىسانداردى ولشەيتىن قۇرىلعىلار، قىسىم داتچيكتەرى، تەنزومەترلەر، تۋننەل توسەمىنىڭ جىلجۋىن ولشەۋگە ارنالعان داتچيكتەر، ەكى ءوستى ەڭىس ولشەۋىشى، ەكى نۇكتەلى ۇڭعىما ەكستەنزومەترى، دەرەكتەردى جيناۋ جانە وڭدەۋ جۇيەلەرى قامتىلعان»، - دەپ اتالىپ وتكەن مەتروپوليتەن اقپاراتىندا.
مەترو قىزمەتكەرلەرى اپاتتى جويۋ جوسپارىنا قاتىستى تۇراقتى تۇردە وقۋ-جاتتىعۋعا، تاجىريبەلىك ساباقتارعا قاتىسىپ تۇرادى. جوسپاردا قىزمەتكەرلەر وزدەرىنىڭ مىندەتتەرىن ورىنداۋ بارىسىندا ادام شىعىنى مەن ماتەريالدىق زالال كەلتىرمەۋ ءىس- ارەكەتتەرى قامتىلعان. توتەنشە جاعداي بولعاندا جولاۋشىلار سابىر ساقتاپ، مەترو قىزمەتكەرلەرىنىڭ نۇسقاۋلارىن ورىنداۋى كەرەك. جولاۋشىلار مەن قىزمەتكەرلەردى شىعاتىن جولعا باعىتتاۋ ءۇشىن ەۆاكۋاتسيالاۋ جوسپارلارى مەن جارىقتاندىراتىن باعىت بەلگىلەرى ورناتىلعان.
ەسكە سالساق، 2022 -جىلى مەملەكەت باسشىسى الماتىدا مەتروپوليتەن جەلىسىن كەڭەيتۋدى تاپسىرعان ەدى.
اۆتور
رۋسلان عابباسوۆ
