جەر شارىنىڭ مۇز قويماسى تاۋسىلىپ بارادى: 50 جىلدا 9 تريلليون توننا مۇز ەرىپ كەتكەن
استانا. KAZINFORM - مۇزدىقتاردىڭ ەرۋى سالدارىنان 1975 -جىلدان بەرى ولاردىڭ كولەمىنىڭ 9 تريلليون تونناعا دەيىن ازايىپ كەتكەن، بۇل دەگەنىمىز گەرمانيانىڭ كولەمىندەي.
بۇل تۋرالى ب ۇ ۇ- نىڭ مامانداندىرىلعان اگەنتتىگى دۇنيەجۇزىلىك مەتەورولوگيالىق ۇيىمنىڭ وكىلى كلەر نۋلليس مالىمدەدى.
- دۇنيەجۇزىلىك مۇزدىقتاردى باقىلاۋ قىزمەتىنىڭ باعالاۋى بويىنشا، 1975 -جىلى باقىلاۋ باستالعالى بەرى مۇزدىقتار جالپى كولەمى 9 تريلليون توننادان استام مۇزدى جوعالتتى. بۇل قالىڭدىعى 25 مەتر بولاتىن گەرمانيا اۋماعىنداي الىپ مۇزدى بلوكقا تەڭ، - دەدى ول جەنيەۆادا وتكەن بريفينگتە.
ونىڭ ايتۋىنشا، سوڭعى جىلدارى الەم «باقىلاۋ تاريحىنداعى مۇزدىقتاردىڭ ەڭ جىلدام شەگىنۋىنە» كۋا بولدى. ب ۇ ۇ وكىلى مۇزدىقتار مەن مۇز جامىلعىلارى الەمدىك سۋ رەسۋرستارىنىڭ شامامەن 70 پايىزىن ساقتاپ تۇرعانىن ەسكە سالدى.
ايتا كەتەلىك الداعى جىلدارى اركتيكاداعى جىلىنۋ جاھاندىق ورتاشا كورسەتكىشتەن ءۇش ەسە ارتىق بولاتىنى تۋرالى جازعان ەدىك.
