جەر شارىن ءتورت رەت اينالىپ شىققانمەن بىردەي - بيىل پرەزيدەنت ۇشاعى 158 مىڭ شاقىرىم ساپارلاعان
استانا. KAZINFORM - ءبىر جىل ىشىندە ەلىمىزدىڭ ءبىرىنشى بورتى 158983 شاقىرىمدى ۇشىپ ءوتتى. پرەزيدەنت قاسىم-جومارت توقايەۆ ۇشاق پەن تىكۇشاقتا 245 ساعات 18 مينۋتىن وتكىزدى. بۇل - جەر شارىن ءتورت رەت اينالىپ شىققانمەن بىردەي قاشىقتىق. بۇل تۋرالى ق ر پرەزيدەنتىنىڭ كەڭەسشىسى - باسپا ءسوز حاتشىسى بەرىك ءۋالي Egemen Qazaqstan گازەتىندە جازدى.
- جىل باسىنان بەرى مەملەكەت باسشىسى قاتار، ازەربايجان، سينگاپۋر، تاجىكستان، موڭعوليا، فرانسيا جانە ماجارستان ەلدەرىنە مەملەكەتتىك ساپارمەن، ال يتاليا، ۆاتيكان، ارمەنيا، تۇرىكمەنستان جانە سەربيا ەلدەرىنە رەسمي ساپارمەن باردى. مۇنداعى كەيبىر ەلدەرگە قازاقستان پرەزيدەنتىنىڭ سوڭعى 20 جىلعا جۋىق ۋاقىتتان كەيىن العاش رەت ساپارلاعانىن اتاپ وتكەن ءجون. بۇل مەملەكەت باسشىسىنىڭ جان-جاقتى ىقپالداستىققا باسا نازار اۋداراتىنىن اڭعارتادى، - دەپ جازدى بەرىك ءۋالي.
مەملەكەتتىك جانە رەسمي ساپارلاردان بولەك پرەزيدەنت ءتۇرلى حالىقارالىق ءىس-شارالارعا قاتىسۋ ءۇشىن 11 ەلگە جۇمىس ساپارىمەن باردى. بۇدان باسقا، ەلىمىزگە ءتۇرلى دەڭگەيدەگى ساپارمەن كەلگەن 11 شەت مەملەكەتتىڭ باسشىلارىن قابىلداپ، كەلىسسوزدەر جۇرگىزدى.
- ەلىمىزدىڭ سىرتقى ساياساتتاعى جەتىستىكتەرىنە ارنايى توقتالعان ءجون. قازاقستان بيىل التى حالىقارالىق ۇيىمعا، اتاپ ايتقاندا، ش ى ۇ، ت م ۇ، ا و س ش ك، ۇ ق ش ۇ-عا، ازىق-تۇلىك قاۋىپسىزدىگى جونىندەگى يسلام ۇيىمىنا، سونداي-اق حالىقارالىق ارالدى قۇتقارۋ قورىنا ءتوراعالىق ەتتى. فرانسيامەن بىرگە ەر-رياد قالاسىندا One Water سامميتىن ۇيىمداستىردى. وسى جاۋاپتى ميسسيالاردى ەلىمىز ابىرويمەن اتقارىپ شىقتى. جوعارى دەڭگەيدەگى كەزدەسۋلەردە ماڭىزدى باستامالار كوتەرىپ، ءتيىستى قۇجاتتاردىڭ قابىلدانۋىنا ۇيىتقى بولدى. ەگەمەن ءارى دەربەس ەل رەتىندە ءوزىنىڭ ساياسي، ەكونوميكالىق، اسكەري قاۋىپسىزدىك سالالارىنداعى باسىمدىقتارىن ىلگەرىلەتە ءتۇستى، - دەيدى پرەزيدەنت كەڭەسشىسى.
ايتا كەتەيىك، بەرىك ءۋالي مەملەكەت باسشىسى قاسىم-جومارت توقايەۆتىڭ جىل بويى اتقارعان قىزمەتىنە شولۋ جاساپ، قوعامدىق-ساياسي ومىردەگى، الەۋمەتتىك- ەكونوميكالىق دامۋداعى ىرگەلى وزگەرىستەر مەن تابىستار تۋرالى باياندادى.
پرەزيدەنت بيىل جۇمىس ساپارىمەن ەلىمىزدىڭ 11 وڭىرىنە باردى. ايماقتارداعى 60 تان اسا وندىرىستىك جانە الەۋمەتتىك- مادەني نىساندارمەن تانىسىپ، جۇرتشىلىقپەن كەزدەستى.
سونداي-اق، مەملەكەت باسشىسى بيىل 3979 قۇجاتتى قاراپ، قول قويدى. ونىڭ ىشىندە 95 زاڭ، 319 جارلىق، 81 وكىم، 28 وتىرىس حاتتاماسى، 3456 قىزمەتتىك قۇجات قابىلداندى.
