جەر بەتىندەگى ەڭ ادەمى كۇز قاي جەردە ەكەنىن بىلەسىز بە؟

 كۇز - جىلدىڭ ەڭ ادەمى مەزگىلى. تابيعات بىزگە تاڭعاجايىپ تۇستەر مەن تىنىشتىق سىيلايدى، الەمنىڭ ءار بۇرىشىن كوز بەن جان ءۇشىن ناعىز جۇماققا اينالدىرادى. Kaz.tengritravel.kz پورتالى مەن Aviata سەرۆيسى قاي ەلدەردە كۇز ەرەكشە ادەمى كەيىپكە ەنەتىنى جايلى باياندايدى. 

اگاۆا شاتقالى، كانادا

اگاۆا شاتقالى - ونتاريو پروۆينسياسىنداعى Agawa Canyon park ۇلتتىق ساياباعىنىڭ ءبىر بولىگى. بۇل جارتاستاردىڭ تاريحى بىرنەشە ميلليون جىل بۇرىن باستالدى، ءبىراق تۋريستەر شاتقالدىڭ سۇلۋلىعىن تەك 1970 -جىلدارى عانا اشتى.

تۋريستەر بۇل تاڭعاجايىپ جەرگە ارنايى ۆاگوندارمەن كەلەدى: ساياحات تاڭعاجايىپ تابيعات كورىنىسىنىڭ اسەرىنەن وتە جىلدام وتەدى.

شاتقالدا جابايى تابيعات ساقتالعان: قۇندىز، كىرپى، بۇركىت جانە باسقا دا كانادالىق جابايى تابيعات بار. شاتقال اسىرەسە كۇزدە، جاپىراقتارى التىن تۇستەس، قىزعىلت سارى جانە قىزىل تۇستەرگە اينالعان كەزدە ادەمى كەيىپكە ەنەدى.

نارا، جاپونيا

موميدزي-گاري نەمەسە كويو - كۇزدە جاپىراقتارى سارى، قىزعىلت سارى، قويۋ قىزىل نەمەسە قوڭىر تۇسكە اينالعان كەزدە جاپوندىق جاپىراقتاردى تاماشالاۋ ءداستۇرى. جاپونياداعى بۇل وقيعا ماڭىزدىلىعى جاعىنان كوكتەمدەگى شيە گۇلدەرىنە تەڭ دەپ سانالادى جانە وعان كوپتەگەن جاپوندىقتار قاتىسادى.

كيوتوعا جاقىن جەردە ورنالاسقان ەجەلگى نارا قالاسى اسىرەسە كۇزگى سۇلۋلىعىمەن تانىمال. مۇندا الۋان ءتۇرلى جاپىراقتارى بار ۇلكەن ساياباق بار. التىن، سارى جانە قىزىل جاپىراقتار تامۋكەياما عيباداتحاناسىنا اپاراتىن جولداردى جاۋىپ تۇرادى.

حۋاڭشان تاۋلارى، قىتاي

حۋاڭشان تاۋلارىنىڭ شىڭدارىن سارى تاۋلار دەپ تە اتايدى. قازان ايىندا ەرەكشە قىزىل جامىلعىمەن كومكەرىلەتىن بۇل تاۋلار تۋريستەر مەن فوتوسۋرەتشىلەردى قىزىقتىرماي قويمايدى. ال جەڭىل، اق ۇلپەك بۇلتتار بۇل كورىنىسكە قىتايعا ءتان ەفەمەرلىك اتموسفەرا سىيلايدى. تاۋدا سەرۋەندەۋگە ەڭ جاقسى ۋاقىت - تاڭ اتىپ كەلە جاتقاندا. بۇل كەزدە كۇزگى جاپىراقتار كۇن ساۋلەسىمەن جارقىرايدى.

داندەنونگ تاۋلارى، اۋستراليا

اۆستراليالىق كۇز ناۋرىز ايىنىڭ باسىندا باستالادى. جاعاجاي، سەرفينگ پەن ماڭگىلىك جازى بار ەلدى كۇزگى تابيعاتپەن بايلانىستىرۋ قيىن با؟ وندا ءسىز مەلبۋرن ماڭىندا ورنالاسقان داندەنونگ تاۋلارىندا بولعان جوقسىز. داندەنونگ - تابيعي لاندشافتتى، كەرەمەت سۇلۋلىعى مەن كۇتىلگەن باقتارى بار ۇلتتىق ساياباق. ءسىز مىندەتتى تۇردە الفرەد نيكولاس مەموريالدىق باقتارىنا بارىپ، جەردى كومكەرگەن التىن تۇستەس جاپىراقتاردى تاماشالاۋىڭىز قاجەت.