جۇمىسىنان ايىرىلعان 250 مىڭنان استام ادام تولەم الدى
استانا. KAZINFORM - بيىل ەلىمىزدە جۇمىسىنان ايىرىلۋىنا بايلانىستى 250 مىڭنان استام ادام مەملەكەتتىك الەۋمەتتىك ساقتاندىرۋ قورىنان الەۋمەتتىك تولەم الدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنەن ءمالىم ەتتى.
«2024 -جىلعى 1-قاراشاداعى جاعداي بويىنشا مەملەكەتتىك الەۋمەتتىك ساقتاندىرۋ قورىنان (بۇدان ءارى –م ءا س ق) جۇمىسىنان ايىرىلۋىنا بايلانىستى الەۋمەتتىك تولەم الۋشىلاردىڭ سانى 256,6 مىڭ ادامدى قۇرادى. بۇل رەتتە بيىل 212,9 مىڭ ادامعا تولەم العاش رەت تاعايىندالدى. تولەمدەردىڭ جالپى سوماسى 70,6 ميلليارد تەڭگە بولدى»، - دەلىنگەن ۆەدومستۆو تاراتقان اقپاراتتا.
قولدانىستاعى زاڭناماعا سايكەس جۇمىستان بوساتىلعان جۇمىسكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە سوڭعى 24 ايداعى تابىسىنا بايلانىستى 1 ايدان 6 ايعا دەيىن جۇمىسىنان ايىرىلۋى بويىنشا الەۋمەتتىك تولەمدەر الادى. تولەم جوعالعان كىرىستىڭ 45 پايىزىنا دەيىنگى مولشەردە م ءا س ق قاراجاتى ەسەبىنەن جۇزەگە اسىرىلادى.
تولەم تاعايىنداۋ ءۇشىن جۇمىستان بوساتىلعان جۇمىسكەرگە:
- eGov.kz پورتالىندا اۆتوريزاتسيالانۋ؛
- «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەۋشى ادامداردى تىركەۋ» قىزمەتىن تاڭداۋ؛
- ونلاين- قىزمەتكە تاپسىرىس بەرىپ، بارلىق جولداردى تولتىرۋ جانە وعان ە س ق- مەن قول قويىپ، ءوتىنىمدى جىبەرۋ قاجەت.
ءبىر كۇن ىشىندە تۇرعىلىقتى جەرىڭىزدەگى مانساپ ورتالىعى بوس جۇمىس ورىندارىن ۇسىنادى. ەگەر جۇمىس تابىلماسا، 3 جۇمىس كۇنى ىشىندە قاشىقتىقتان جۇمىسسىز مارتەبەسى بەرىلەدى.
بۇل قىزمەتتى ونلاين رەجيمىندە ەلەكتروندىق ەڭبەك بيرجاسى (enbek.kz) ارقىلى دا الۋعا بولادى.
جۇمىسسىز رەتىندە تىركەلۋ تۋرالى مالىمەتتەر بولعان كەزدە ەڭبەكمينىنىڭ اقپاراتتىق جۇيەسى پرواكتيۆتى فورماتتا م ءا س ق- تان تولەمدى تاعايىنداۋ بويىنشا قىزمەت كورسەتۋگە كەلىسۋ ءۇشىن ءموبيلدى تەلەفونعا SMS- حابارلاما جىبەرەدى. كەلىسكەن جاعدايدا SMS- حابارلاماعا جاۋاپ بەرۋ قاجەت. تولەم اۆتوماتتى تۇردە تاعايىندالادى.
ەستەرىڭىزگە سالا كەتەيىك، م ءا س ق قاراجاتى ەسەبىنەن جۇمىستان ايىرىلعان جاعدايدا تولەنەتىن الەۋمەتتىك تولەم جۇمىستان شىعۋ سەبەپتەرىنە قاراماستان جۇزەگە اسىرىلادى جانە جۇمىسسىز ادامدى ول جۇمىس ىزدەگەن كەزەڭدە قولداۋعا ارنالعان.
