جۇمىسى اۋىر، ەڭبەگى ادال جۇمىسشىلاردىڭ جالاقىسىن ەكى ەسەگە ءوسىرۋ كەرەك - جۇلدىز سۇلەيمەنوۆا

جالاقى
سۋرەت كورنەكىلىك ءۇشىن اشىق دەرەككوزدەن الىندى

ۇكىمەت ازاماتتىق قىزمەتشىنىڭ ايلىعىن ارتتىرىپ، وسى ەڭبەگى اۋىر جۇمىسشىلاردىڭ مۇددەسىن ەسكەرمەي كەلەدى، - دەدى جۇلدىز سۇلەيمەنوۆا.

ەدەن جۋۋشى، پلوتنيك، سانتەحنيك، اۋلا تازالاۋشى، ەلەكتريك ساناتىنداعى جۇمىسشىلاردىڭ ايلىعى ءوسۋى كەرەك. وسى ماسەلەنى كوتەرگەن دەپۋتات جۇلدىز سۇلەيمەنوۆا AMANAT پارتياسى فراكسياسىنىڭ دەپۋتاتتارى اتىنان قازاقستان رەسپۋبليكاسى پرەمەر-ءمينيستردىڭ ورىنباسارى تامارا دۇيسەنوۆاعا دەپۋتاتتىق ساۋال جولدادى.

جىل سايىن ۇكىمەت تاراپىنان ازاماتتىق قىزمەتشىلەردىڭ جالاقىسىندا بىلىكتىلىك ساناتتارىنا قولدانىلاتىن كوەففيتسيەنتتەردى ارتتىرۋ قاراستىرىلىپ، جالاقىلارى ءوسىپ كەلەدى. وكىنىشتىسى سول، مەكەمەلەردىڭ قىزمەتىن ەدەن جۋۋشى، اۋلا تازالاۋشى، سانتەحنيك، پلوتنيك، ەلەكتريك سەكىلدى قاراپايىم ەڭبەك ادامدارىنىڭ كۇندەلىكتى اۋىر جۇمىستارىنسىز جۇزەگە اسىرۋ مۇمكىن ەمەس بولسا دا بۇگىندە وسى اتالعان جۇمىسشىلار ازاماتتىق قىزمەتشىلەر رەەستىرىندە جوق. سوندىقتان، ۇكىمەت تاراپىنان ازاماتتىق قىزمەتشىنىڭ ايلىعىن ارتتىرعاندا، وسى ەڭبەگى اۋىر جۇمىسشىلاردىڭ مۇددەسى ەسكەرىلمەي كەلەدى، - دەدى جۇلدىز سۇلەيمەنوۆا.

اسىرەسە، دەنساۋلىق ساقتاۋ، وقۋ-اعارتۋ سالاسىنداعى ەڭ اۋىر جۇمىستاردى اتقاراتىن جۇمىسشىلاردىڭ ايلىق جالاقىسى تومەن. مىسالى، مەكتەپتەردەگى ەدەن جۋۋشى - 82856 تەڭگە، ەلەكتريك 81575 تەڭگە، اۋلا سىپىرۋشى - 79317 تەڭگە. بۇگىنگى تاڭدا، تەك ورتا ءبىلىم سالاسىندا 216 مىڭنان استام وسى ساناتتاعى جۇمىسشىلار بار، ولاردىڭ 254 مىڭى قولىنا تيەتىن ايلىق جالاقىسى 74 مىڭ تەڭگەدەن 85 مىڭ تەڭگە ارالىعىندا.

ءبىلىم بەرۋ، دەنساۋلىق ساقتاۋ مەكەمەلەرىندەگى ورتا جانە كىشى بۋىن ماماندارى مەن قىزمەتشىلەردىڭ ەڭبەكاقىسىن كەمىندە ەكى ەسەگە كوتەرۋ قاجەت دەپ سانايمىز. اتقاراتىن جۇمىسىنىڭ كۇردەلىلىگىنە جانە اۋىرلىعىنا ءارى ەرەكشەلىگىنە قاراي لايىقتى جالاقى تاعايىندالۋى ءتيىس دەپ ەسەپتەيمىز.

سەبەبى، جالاقى الەۋمەتتىك جاعدايدى، كۇنكورىس دەڭگەيىن، دەنساۋلىعىنا جانە بالالارىن ءوسىپ-جەتىلدىرۋگە جەتكىلىكتى بولۋى شارت. الەۋمەتتىك ادىلدىك زامانىندا جۇمىسى اۋىر، ەڭبەگى ادال جۇمىسشىلاردىڭ جالاقىسى ارتۋى قاجەت. حالقىمىزدا «ەڭبەك ادامى - ەلدىڭ قۇتى» دەگەن جاقسى ءسوز بار. «Amanat» پارتياسىنىڭ فراكسياسى قاراپايىم ەڭبەك ادامدارىنا ساناتىنداعى جۇمىسشىلارعا لايىقتى جالاقى تولەۋدىڭ شىن مانىندە ءادىل ءارى ءبىرىڭعاي جۇيەسىن قۇرۋ جونىندە ۆەدومستۆاارالىق جۇمىس توبى قۇرىلۋى كەزەك كۇتتىرمەيتىن ماسەلە دەپ بىلەمىز، - دەدى دەپۋتات.

وسىعان بايلانىستى دەپۋتاتتار مىناداي ۇسىنىس ايتتى:

وقۋ-اعارتۋ مينيسترلىگى 2016 جىلى 29-قاڭتارداعى №123-قازاقستان رەسپۋبليكاسى ءبىلىم جانە عىلىم ءمينيسترى بۇيرىعىمەن بەكىتىلگەن ءبىلىم جانە عىلىم سالاسىنداعى ازاماتتىق قىزمەتشىلەر لاۋازىمدارىنىڭ ءتىزىلىمىن قايتا قاراپ، ەدەن جۋۋشى، پلوتنيك، سانتەحنيك، اۋلا تازالاۋشى، ەلەكتريك ساناتىنداعى جۇمىسشىلاردىڭ وسى تىزىلىمگە ەنگىزىلۋىن قاراستىرسىن.

وقۋ-اعارتۋ مينيسترلىگى ۇلتتىق ەكونوميكا مينيسترلىگىمەن بىرلەسە وتىرىپ، رەسپۋبليكالىق بيۋدجەتتى ناقتىلاۋ كەزەڭىندە اتالعان جۇمىسشىلاردىڭ بازالىق لاۋازىمدىق جالاقىسىن ينفلياتسياعا جانە جۇمىستاردىڭ كۇردەلىلىگىنە سايكەس ۇلعايتۋدى قاراستىرسىن.

وقۋ-اعارتۋ مينيسترلىگى قارجى مينيسترلىگىمەن بىرلەسە وتىرىپ، ەدەن جۋۋشى، پلوتنيك، سانتەحنيك، اۋلا تازالاۋشى، ەلەكتريك ساناتىنداعى جۇمىسشىلاردىڭ ەڭبەك دەمالىسىنا تولەنەتىن تولەم مولشەرىنە ساۋىقتىرۋ جاردەماقىسى قوسۋ مۇمكىندىگىن قاراستىرىپ، رەسپۋبليكالىق بيۋدجەتتەن شىعىندارىن ەسەپتەسىن.

سوڭعى جاڭالىقتار