جۇمىس وتىلىنەن جالتارۋ: «بولاشاق» تۇلەكتەرى قانداي قۋلىقتارعا بارادى
استانا. KAZINFORM - «بولاشاق» تۇلەكتەرى ەلگە كەلگەن سوڭ 5 جىلدىق جۇمىس ءوتىلىن وتەۋ كەزىندە ءتۇرلى قۋلىق-سۇمدىقتارعا باراتىنى انىقتالدى. بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ايتتى.
بريفينگتە ب ا ق وكىلى قارىزىن وتەمەگەن «بولاشاق» تۇلەكتەرى جايلى سۇراق قويدى.
- وكىنىشكە قاراي، ونداي تۇلەكتەرىمىز بار. بىلتىر ۇلكەن اۋديت جۇرگىزدىك. كىم شەتەلدە قالىپ قالدى؟ قازىرگى تاڭدا «بولاشاق» باعدارلاماسىنىڭ بازاسى شەكارا قىزمەتىنىڭ بازاسىمەن ۇشتاستىرىلدى. كىم قايدا شىقتى؟ كىم شەكارادان ءوتتى؟ بىزگە بۇل مالىمەتتەر جەتىپ وتىرادى. ونداي 200-300 شاماسىنداعى ادام ايقىندالدى. ونداي ادامدار بىردەن ستيپەنديادان ايىرىلادى. نە سوتتىڭ شەشىمىمەن، نە ەكىجاقتى كەلىسىممەن ول اقشا قايتارىلادى، - دەدى ول.
مينيستر «بولاشاق» تۇلەكتەرىنىڭ ەلگە كەلگەن سوڭ 5 جىلدىق جۇمىس وتىلىنەن ءوتۋ كەزىندە باراتىن ءبىرقاتار قۋلىق ارەكەتتەرىن دە اشكەرە ەتتى.
- قازاقستاندا ءبىر كومپانياعا تىركەلەدى. سوسىن سول كومپانيانىڭ ەسەپتەرىن جىبەرىپ تۇرادى. ونى ءبىز قازىر سالىق ورگاندارىمەن قاراستىرىپ، بىردەن ايقىندايمىز. مينيمالدى سالىق تولەپ تۇرعاندا بىردەن بەلگىلى بولادى. ودان بولەك، اۋىلدى جەرلەرگە شىعىپ كەتەدى. سەبەبى اۋىلدى جەرگە بارعاندا ونىڭ جۇمىس ءوتىلى 5 جىلدان 3 جىلعا قىسقارادى. سوندا ءبىر كومپانياعا تىركەلەدى دە، ءوزى قالادا جۇمىس ىستەپ جۇرەدى. ونى دا انىقتاۋدىڭ جولىن تاۋىپ الدىق، - دەدى ساياسات نۇربەك.
سپيكەر قازىر حالىقارالىق باعدارلامامەن ءبىلىم العان تۇلەكتەردى قاداعالاۋ تەتىكتەرى كۇشەيتىلگەنىن قاداپ ايتتى.
بۇعان دەيىن «بولاشاق» ارقىلى دارىندى وقۋشىلاردىڭ باكالاۆرياتقا قالاي تۇسە الاتىنى جايلى جازعان ەدىك.
