جۇمىس بەرۋشىلەر ءوز قاراجاتى ەسەبىنەن مىندەتتى زەينەتاقى جارناسىن اۋدارا باستايدى

بۇگىننەن باستاپ «جۇمىس بەرۋشىنىڭ مىندەتتى زەينەتاقى جارنالارىن ەسەپتەۋ (ەسەپكە جازۋ) جانە ءبىرىڭعاي جيناقتاۋشى زەينەتاقى قورىنا اۋدارۋ جانە ولار بويىنشا ءوندىرىپ الۋ قاعيدالارى مەن مەرزىمدەرىن بەكىتۋ تۋرالى» ەل ۇكىمەتىنىڭ قاۋلىسى كۇشىنە ەندى، دەپ حابارلايدى Kazinform.

اتالعان قۇجاتقا سايكەس، 2024 -جىلعى 1-قاڭتاردان باستاپ جۇمىس بەرۋشىلەر ءوز قاراجاتى ەسەبىنەن مىندەتتى زەينەتاقى جارناسىن اۋدارا باستايدى. ول 2024-2028 -جىلدار ارالىعىندا %1,5 دان %5 عا دەيىن كەزەڭ-كەزەڭىمەن وسۋگە ءتيىس. وسىلايشا زەينەتكە شىققان كەزدە بۇل جۇمىسكەرلەر قوسىمشا جيناقتاۋشى زەينەتاقى تولەمىمەن قامتاماسىز ەتىلەدى.

بۇل شارا اسىرەسە جاس قازاقستاندىقتاردى قولداۋعا باعىتتالعان. ولاردىڭ زەينەتاقىسى اۋدارىمىنا تىكەلەي بايلانىستى بولادى. ولاردىڭ زەينەتاقىسى ءۇش كومپونەنتتەن: مەملەكەتتەن بازالىق زەينەتاقى، جيناقتاۋشى زەينەتاقى - ءبىرىڭعاي جيناقتاۋشى زەينەتاقى قورىنا اۋدارىم ەسەبىنەن جانە شارتتى-جيناقتاۋشى زەينەتاقى جۇمىس بەرۋشىلەردىڭ جارناسى ەسەبىنەن قۇرالادى.

جۇمىس بەرۋشىنىڭ مىندەتتى زەينەتاقى جارنالارىن ەنگىزۋ، اسىرەسە، ىنتىماقتى ءوتىلى جوق (1998 -جىلعا دەيىن) نەمەسە ىنتىماقتى جۇيەدەگى ءوتىلى از ازاماتتار ءۇشىن وزەكتى.

وسىلايشا الەمدىك تاجىريبەنى ەسكەرە وتىرىپ، ازاماتتاردى زەينەتاقىمەن قامسىزداندىرۋ ءۇشىن مەملەكەتتىڭ، جۇمىس بەرۋشىنىڭ جانە قىزمەتكەردىڭ ورتاق جاۋاپكەرشىلىگى بولادى.

سالىق كودەكسىنە سايكەس سالىق سالىناتىن تابىستان شەگەرىمگە جاتقىزىلعاندىقتان، تيىسىنشە جۇمىس بەرۋشىنىڭ جۇمىس بەرۋشىنىڭ مىندەتتى زەينەتاقى جارنالارىن تولەۋ شىعىنى ەلەۋسىز دەڭگەيدە قالاتىنىن اتاپ ءوتۋ قاجەت.