جۇمىس بەرۋشى تولەيتىن مىندەتتى زەينەتاقى جارناسىنىڭ مولشەرى ۇلعايدى

استانا. KAZINFORM — بيىل 1-قاڭتاردان باستاپ قازاقستاندا جۇمىس بەرۋشىنىڭ مىندەتتى زەينەتاقى جارناسى 2,5 پايىزعا ۇلعايدى.

— الەۋمەتتىك كودەكسكە سايكەس، جۇمىسشىلاردىڭ 10 پايىز مىندەتتى زەينەتاقى جارناسىن جۇمىس بەرۋشى ءوز قاراجاتى ەسەبىنەن اۋدارادى. جىل سايىن جارنا مولشەرى كەزەڭ-كەزەڭىمەن ءوسىپ وتىرادى (2024-جىلى 1,5 پايىز، 2025-جىلى 2,5 پايىز، 2026-جىلى 3,5 پايىز، 2027-جىلى 4,5 پايىز) جانە 2028-جىلى 5 پايىز جەتەدى. جۇمىس بەرۋشىنىڭ زەينەتاقى جارناسىن ەسەپتەۋ ءۇشىن قابىلدايتىن جۇمىسكەردىڭ تابىس سوماسى ءتيىستى كۇنتىزبەلىك جىلعا بەلگىلەنگەن ەڭ تومەنگى جالاقىنىڭ كەم دەگەندە بىرەۋىن جانە كوپ دەگەندە 50 ەسەلەنگەن مولشەرىنەن اسپاۋى ءتيىس، — دەپ حابارلايدى ءبىرىڭعاي جيناقتاۋشى زەينەتاقى قورىنان.

جۇمىس بەرۋشىلەر زەينەت جاسىنداعى، 1-جانە 2-توپتاعى مەرزىمسىز مۇگەدەكتىگى بار، اسكەري قىزمەتشىلەر مەن ولارعا تەڭەستىرىلگەن ادامدار، سونداي-اق 1975-جىلدىڭ 1-قاڭتارىنا دەيىن تۋعان ادامداردىڭ پايداسىنا جارنا تولەۋدەن بوساتىلدى. جۇمىس بەرۋشىلەردىڭ جارنانى ۋاقىتىلى جانە تولىق تولەپ وتىرۋىن باقىلاۋ قارجى مينيسترلىگىنىڭ مەملەكەتتىك كىرىستەر كوميتەتىنە جۇكتەلگەن.

قىزمەتكەرلەردىڭ جەكە زەينەتاقى شوتتارىنا تۇسەتىن جارنادان جۇمىس بەرۋشىنىڭ مىندەتتى زەينەتاقى جارناسى شارتتى زەينەتاقى شوتتارىنا ەسەپتەلەدى جانە قىزمەتكەرلەردىڭ مەنشىگى ەمەس. تيىسىنشە، جۇمىس بەرۋشىنىڭ مىندەتتى زەينەتاقى جارناسى ەسەبىنەن قالىپتاسقان جيناقتاردى قىزمەتكەرلەر مۇراعا قالدىرا المايدى. جۇمىس بەرۋشىنىڭ مىندەتتى زەينەتاقى جارناسى زەينەتاقىنى ورتاق (تاراتۋشى) قاعيداتى بويىنشا تولەۋگە ارنالعان. سوندىقتان، قازاقستان ازاماتتىعىنان ايىرىلعان نەمەسە قايتىس بولعان ادامدار ءۇشىن تولەنىپ كەلگەن جۇمىس بەرۋشىنىڭ مىندەتتى زەينەتاقى جارناسى قالعان قاتىسۋشىلار اراسىندا ءبولىنىپ، ءومىر بويى تولەنەتىن بولادى.

جۇمىس بەرۋشىنىڭ مىندەتتى زەينەتاقى جارناسى ەنگىزۋ 1975-جىلى جانە ودان كەيىن تۋعان جۇمىسشىلاردىڭ ورتاق زەينەتاقى الۋعا مۇمكىندىك بەرەتىن 1998-جىلعا دەيىنگى جۇمىس ءوتىلىنىڭ جوقتىعىن نەمەسە مۇلدە از ەكەندىگىن ەسكەرە وتىرىپ، وسى ازاماتتاردى زەينەتاقىمەن قامسىزداندىرۋعا باعىتتالعان. بولاشاقتا ولاردىڭ جيىنتىق زەينەتاقىسى ءۇش قۇرامداۋىش كوزدەن، ياعني بازالىق — مەملەكەتتەن، جيناقتاۋشى — ءبىرىڭعاي جيناقتاۋشى زەينەتاقى قورىنا اۋدارعان مىندەتتى زەينەتاقى جارنالارى جانە شارتتى- جيناقتاۋشى — جۇمىس بەرۋشىلەردىڭ جارنالارى ەسەبىنەن قالىپتاسادى.

ەسكە سالا كەتەيىك، بىلتىر 1-قاڭتاردان باستاپ بارلىق جۇمىس بەرۋشى زەينەتاقى جيناقتارىن قالىپتاستىرۋعا قاتىسىپ، زەينەتاقى جارناسىن ءوز قىزمەتكەرلەرىنىڭ پايداسىنا اۋدارا باستادى.

ايتا كەتەيىك، بيىل 1-قاڭتاردان باستاپ ەلىمىزدە بازالىق زەينەتاقى 6,5 پايىزعا، ىنتىماقتى زەينەتاقى — 8,5 پايىزعا يندەكستەلدى.