جەمقورلىق جاساعان توتەنشە جاعدايلار دەپارتامەنتىنىڭ لاۋازىمدى تۇلعالارى سوتتالدى
قازاقستان رەسپۋبليكاسى اسكەري سوتىنىڭ اپەللياتسيالىق القاسى الماتى قالاسى توتەنشە جاعدايلار دەپارتامەنتىنىڭ باستىعى، پولكوۆنيك ر. قاسىبايەۆقا ۇكىم شىعاردى، دەپ حابارلايدى قازاقپارات.

سوتتالۋشى مەردىگەر ۇيىمعا ناقتى ورىندالماعان جۇمىس كولەمى ءۇشىن ەڭبەكاقىنىڭ تولىق قۇنىن زاڭسىز تولەگەن جانە تەحنيكالىق قاداعالاۋدىڭ وڭ قورىتىندىسىنسىز قالانىڭ ءورت ءسوندىرۋ بولىمدەرىنىڭ ءبىرىن پايدالانۋعا قابىلداعان.
ول بيلىكتى تەرىس پايدالانعانى ءۇشىن كىنالى دەپ تانىلىپ، ءۇش جىلعا باس بوستاندىعىنان جانە ءومىر بويى مەملەكەتتىك قىزمەت اتقارۋ قۇقىعىنان ايىرىلدى.
قىزىلوردا وبلىسىندا ت ج م ونەركاسىپتىك قاۋىپسىزدىك دەپارتامەنتى باسشىسىنىڭ ورىنباسارى ب. ستامقۇلوۆقا قاتىستى ۇكىم شىقتى.
ستامقۇلوۆ ن. ورازباحوۆتان دەلدال ا. اتاجانوۆ ارقىلى جەتكىزۋشىنى تاڭداۋ كەزىندە ارتىقشىلىق كورسەتكەنى جانە گاز تولتىرۋ پۋنكتتەرى بويىنشا جوبالىق قۇجاتتارعا كەدەرگىسىز قول قويعانى ءۇشىن 500 مىڭ تەڭگە سوماسىندا پارا العان دەپ تانىلدى.
سونىمەن قاتار، ستامقۇلوۆ لاۋازىمدىق وكىلەتتىكتەرىن تەرىس پايدالانۋ ارقىلى ق ر ت ج م لاۋازىمدى تۇلعالارىنا كەزدەسۋلەر مەن بوس ۋاقىتتى ۇيىمداستىرۋ سىلتاۋىمەن ءوزىنىڭ باعىنىستى 4 قىزمەتكەرىنىڭ 100000 تەڭگە سوماسىنداعى اقشالاي قاراجاتىن يەلەنگەن.
وعان 5 جىل باس بوستاندىعىنان ايىرۋ جازاسى تاعايىندالدى.
وسى ۇكىممەن پارا بەرۋشى ن. ورازباحوۆ 3 جىل مەرزىمگە، دەلدال ا. اتاجانوۆ 1 جىلعا باس بوستاندىعىنان ايىرىلدى.
سوتتالعاندارعا مەملەكەتتىك قىزمەتتە، جەرگىلىكتى ءوزىن- ءوزى باسقارۋ ورگاندارىندا، قارجى ۇيىمدارىندا جانە كۆازيمەملەكەتتىك سەكتوردا باسشىلىق لاۋازىمداردا جۇمىس ىستەۋگە ءومىر بويى تىيىم سالىنادى.
ۇكىمدەر زاڭدى كۇشىنە ەنبەدى.