جەمقورلاردى ەلدەن شىعۋعا تىيىم سالۋ جاعىن قاراستىرىپ جاتىرمىز - انتيكور
استانا. KAZINFORM - قازاقستاندا پارامەن ۇستالعانداردى، ياعني جەمقورلاردى ەلدەن شىعۋعا تىيىم سالۋ جاعى قاراستىرىلىپ جاتىر.

بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ءمالىم ەتتى.
- ايتا كەتەيىن، بۇل ءبىرىنشى رەت كوتەرىلىپ جاتقان سۇراق ەمەس، بۇل بىزدە باياعىدان بەرى تالقىلانۋدا. بۇل باستاما بۇرىننان بەرى قاراستىرىلۋدا. بۇل باعىتتاعى جۇمىس جالعاسۋدا، ءتيىستى ۇسىنىستار بار، - دەدى دانيار بيگايداروۆ اگەنتتىكتە وتكەن باسپا ءسوز ءماسليحاتى بارىسىندا.
اگەنتتىك وكىلىنىڭ مالىمدەۋىنشە، پارامەن ۇستالعانداردى ەلدەن شىعارماۋ ماسەلەسى باسقا دا قۇزىرلى ورگاندارمەن بىرلەسە قارالۋدا.
- تالقىلاۋ ناتيجەسى كورسەتەدى. بۇل باعىتتاعى جۇمىستى ءبىز عانا قابىلداي المايمىز، بۇل بۇكىل مەملەكەتتىك ورگان، اپپارات قابىلداۋى ءتيىس. دەپۋتاتتار قولداسا، ارينە، ەنگىزىلۋى مۇمكىن، - دەپ تولىقتىردى ول.
سونداي-اق انتيكور وكىلى جەمقورلاردى ەلدەن شىعۋعا تىيىم سالۋ تاجىريبەسى شەت مەملەكەتتەردە بار ەكەنىن ايتتى.
ايتا كەتسەك، ادىلەت مينيسترلىگى تاياۋدا زاڭ جوباسىنا جەمقورلاردى شەتەلگە شىعارماۋ تۋرالى نورمانى ەنگىزۋ ماسەلەسى قارالۋى مۇمكىن ەكەندىگىن ايتقان ەدى.
ودان بولەك ەلىمىزدە سىبايلاس جەمقورلاردىڭ جاريا ءتىزىلىمى ەنگىزىلەتىنى ايتىلدى.