جەلىدە ادام شوشىرلىق سۋرەتتەرى تاراعان بۇلدىرشىن قىزدىڭ جاعدايى بەلگىلى بولدى

جەلىدە اتىراۋدا «ءيت قاپقان» قىزدىڭ ادام شوشىرلىق سۋرەتتەرى تارادى. قالا اكىمدىگى وكىلدەرى بۇل اقپاراتتى جوققا شىعاردى.

Фото: Әлеуметтік желі
Фото: из открытых источников

كەيىن قىزدىڭ شىمكەنتتە كامازدىڭ استىنا ءتۇسىپ قالعانى بەلگىلى بولدى. شىمكەنت دەنساۋلىق ساقتاۋ باسقارماسى وكىلدەرى مەكتەپ وقۋشىسىنىڭ جاعدايى تۋرالى ايتتى، - دەپ حابارلايدى Massaget.kz ءتىلشىسى.

شىمكەنت قالاسى دەنساۋلىق ساقتاۋ باسقارماسى باسشىسىنىڭ ورىنباسارى ساۋلە سانسىزباي قىزى اۋىر جاعدايعا تاپ بولعان قىزدىڭ جاعدايى تۋرالى ايتتى. ونىڭ ايتۋىنشا، قىزعا 2 كۇن بۇرىن وتا جاسالعان. ال كەشە دارىگەرلەر قىزدىڭ اياعىن كەسپەۋ تۋرالى شەشىمگە كەلگەن.

بۇل وقيعا 21- قىركۇيەكتە بولعان. ول 13:38 دە اۋرۋحاناعا جەتكىزىلگەن. قازىر ونىڭ جاعدايى ءبىرقالىپتى، ءبىراق اۋىر.

«اتا-اناسىمەن كەزدەستىك. 2-سىنىپ وقۋشىسى مەكتەپكە قايتىپ كەلە جاتقاندا كامازدىڭ استىنا ءتۇسىپ قالعان. جۇرگىزۋشى جولدان ءوتىپ بارا جاتقان قىزدى كورمەي قالعان. ءبىراق دەر كەزىندە توقتاپ ۇلگەرگەن. قىزدىڭ اياعى ەكى جەردەن سىنعان. وقۋشى اۋرۋحاناعا تۇسكەندە دارىگەرلەر الدىمەن ونىڭ جاراقاتىن تاڭىپ، كەيىن جاعدايىن باقىلادى. 26- قىركۇيەكتە قىزعا وتا جاسالدى. ەندى 3 كۇن ىشىندە ونىڭ جاعدايى باقىلانادى. كەشە تۇركىستان وبلىسىنىڭ اۋرۋحاناسىنىڭ، شىمكەنتتىڭ ماماندارى كونسيليۋم جاساپ، اياقتى كەسىپ-كەسپەۋ تۋرالى تالقىلادى. قىزدىڭ تەرىسى، بۇلشىقەتتەرى ەزىلىپ كەتكەن، الايدا دارىگەرلەر اياقتى كەسپەۋ تۋرالى توقتامعا كەلىپ وتىر. قازىر ناقتى ەشتەڭە ايتا المايمىز، 2-3 كۇننەن كەيىن قىزدىڭ جاعدايى بەلگىلى بولادى»، - دەدى شىمكەنت قالاسى دەنساۋلىق ساقتاۋ باسقارماسى باسشىسىنىڭ ورىنباسارى ساۋلە سانسىزباي قىزى.

ەسكە سالايىق، بۇعان دەيىن جەلىدە اتىراۋدا مەكتەپ وقۋشىسىن ءيت قاپقانى تۋرالى اقپارات تاراعان ەدى. قالا اكىمدىگى وكىلدەرى بۇل اقپاراتتى جوققا شىعاردى.

اتىراۋ وبلىسى اكىمىنىڭ باسپا ءسوز حاتشىسى ايشا كەنجەمۇراتوۆا بۇل اقپاراتقا قاتىستى پىكىر ءبىلدىردى.

«الەۋمەتتىك جەلى ارقىلى اتىراۋدا مەكتەپ وقۋشىسىن ءيت قاپقانى تۋرالى اقپارات تاراپ جاتىر. اقپاراتتىڭ جالعان ەكەنىن ايتا كەلە، وقيعا شىمكەنتتە جول اپاتىنان بولعانى انىقتالدى. سوندىقتان جالعان اقپارات تاراتپاۋلارىڭىز سۇرالادى! جەدەل جاردەم قىزمەتى مەن وبلىستىق بالالار اۋرۋحاناسىندا مۇنداي جاراقاتپەن كەلگەن ناۋقاس تىركەلمەگەنىن قاپەرلەرىڭىزگە بەرەمىز!» - دەدى ول.

سوڭعى جاڭالىقتار