جەلتوقساندا ۇشاق ءجيى قۇلاعان. قازاقستاندا بولعان ءىرى اۋە اپاتتارى

استانا. قازاقپارات - بۇگىن اقتاۋ ماڭىندا ۇشاق اپاتقا ۇشىرادى. ۇشاق باكۋدەن گروزنىيعا ۇشىپ بارا جاتقان. ەلىمىزدە بولعان ءىرى ۇشاق اپاتتارىنىڭ حرونولوگياسىن ۇسىنامىز.

ۇشاقتار ءجيى نە سەبەپتەن اپاتقا ۇشىرايدى؟

Forinsurer باسىلىمىنىڭ 1974-2024-جىلدارداعى الەمدەگى ەڭ ءىرى ۇشاق اپاتتارىنىڭ ستاتيستيكاسى بويىنشا، اۋە تراگەديالارىنىڭ نەگىزگى سەبەبى - ادام فاكتورى (ەكيپاجدىڭ نەمەسە ديسپەتچەردىڭ قاتەلىگى).

ەڭ قورقىنىشتى ۇشاق اپاتى 1977-جىلى ەكى اۆيالاينەردىڭ قاتىسۋىمەن كانار ارالدارىندا بولدى: گوللانديالىق KLM Tenerife Boeing-747 اۋەجايدان ۇشۋعا تىرىسقاندا تۇماندا PanAm Boeing-747-گە سوقتىعىستى. سوقتىعىسۋ ناتيجەسىندە 578 ادام قازا تاپتى. اۋە لاينەرلەرىنىڭ قاقتىعىسى تىلدىك كەدەرگىنىڭ سالدارىنان بولدى: گوللانديالىق ۇشقىشتار يسپان اكسەنتىمەن اعىلشىن تىلىندە سويلەيتىن ديسپەتچەردىڭ كوماندالارىن دۇرىس تۇسىنبەگەن.

1985-جىلى سوڭعى 40 جىل ىشىندە ءبىر ۇشاق قۇلاعان كەزدە ەڭ كوپ جولاۋشى قازا تاپقان ۇشاق اپاتى بولدى. جاپوندىق Boeing-747 بورتىندا 524 ادام بولدى، ولاردىڭ تورتەۋى عانا قۇتقارىلدى. بۇل اپاتتىڭ سەبەبى - ساپاسىز جوندەۋ.

1974-2024-جىلدارداعى الەمدەگى ەڭ ءىرى ۇشاق اپاتتارىنىڭ تىزىمىندە قازاقستان دا بار. ءبىر بايقاعانىمىز، قازاقستاندا ادام كوپ قازا تاپقان اۋە اپاتتارى جەلتوقسان-قاڭتار ايىندا بولعان.

قازاقستاندا بولعان ءىرى ۇشاق اپاتتارى

مي-8 ۇشاعىنىڭ اپاتى

2009-جىلى 8-قىركۇيەكتە قازاقستاننىڭ ۇ ق ك شەكارا قىزمەتىنىڭ «وڭتۇستىك» وڭىرلىك باسقارماسىنىڭ «ارلان» بارلاۋ-ىزدەۋ توبىنىڭ مي-8 ۇشاعى قازاق-وزبەك شەكاراسىنىڭ ماڭىنداعى وگەم شاتقالىندا اپاتقا ۇشىراعان.

تىكۇشاقتا ەكيپاجدى قوسا ەسەپتەگەندە 13 ادام بولعان. مي-8 تىكۇشاعىنىڭ اپاتىنان 10 ادام قازا بولدى، قالعان ۇشەۋى اۋىر جارالانعان.

ان-72 ۇشاعىنىڭ اپاتى

2012-جىلى 25-جەلتوقسان كۇنى استانادان شىمكەنتكە ۇشقان ان-72 ۇشاعى شىمكەنت اۋەجايىنا 20 كيلومەتر قالعاندا اپاتقا ۇشىراعان. ۇشاق راداردان جەرگىلىكتى ۋاقىت بويىنشا ساعات 18:55-تە جوعالىپ كەتكەن. بورتتاعى بارلىق 27 ادام (7 ەكيپاج مۇشەسى، 20 جولاۋشى) قازا بولدى. جولاۋشىلاردىڭ ىشىندە ق ر كەدەن قىزمەتىنىڭ پولكوۆنيك تۇرعانبەك ستامبەكوۆ، ونىڭ ورتالىق اپپاراتتاعى وفيتسەرلەرى جانە «وڭتۇستىك» كەدەن قىزمەتىنىڭ اسكەريلەرى بولعان.

CRJ-200 ۇشاعىنىڭ اپاتى

2013-جىلى 29-قاڭتاردا SCAT كومپانياسىنا تيەسىلى Bombardier CRJ-200 ۇشاعى كوكشەتاۋ-الماتى اۆيارەيسىندە الماتى وبلىسىنداعى قىزىلتۋ ەلدى مەكەنىنە قۇلادى. بورتتاعى 21 ادامنىڭ (5 ەكيپاج مۇشەسى، 16 جولاۋشى) بارلىعى قازا بولدى. اپاتقا اۋا رايى مەن ەكيپاجدىڭ قاتەلىگى سەبەپ بولعان. ەكيپاج كورۋ مۇمكىندىگىنىڭ ناشار جاعدايىندا ۇشۋ بيىكتىگىن نەگىزسىز تومەندەتكەن. ەكيپاجدىڭ نەگىزسىز شەشىمى جەر بەتىمەن سوقتىعىسۋعا الىپ كەلدى.

ان-2 ۇشاعىنىڭ اپاتى

2015-جىلى 20-قاڭتاردا ان-2 ۇشاعى ساعات 15.40 شاماسىندا «شاتىركول» كەن ورنى اۋدانىندا اپاتقا ۇشىراعان ەدى. «وليمپ ەير» سەرىكتەستىگىنە تيەسىلى ۇشاق بالقاشتان كەن ورنىنا ۇشىپ شىققان. ۇشاقتىڭ اپاتقا ۇشىراۋىنا تۇمان سەبەپ بولۋى مۇمكىن دەگەن جورامال ايتىلدى. ۇشاقتىڭ بورتىندا جەتى ادام بولدى، ونىڭ ۇشەۋى - ەكيپاج مۇشەسى.

مي-2 تىكۇشاعىنىڭ اپاتى

2016-جىلى 23-قاڭتاردا جامبىل وبلىسىندا اپاتقا ۇشىراعان مي-2 پوليتسيانىڭ تىكۇشاعى بولىپ شىقتى. اپاتقا ۇشىراعان تىكۇشاقتىڭ پيلوتى قايتىس بولدى. ول اۋرۋحانادا كۇيىك شالعانداردىڭ بولىمىندە قايتىس بولدى.

600-N ازاماتتىق تىكۇشاعىنىڭ اپاتى

2016-جىلى 27-قاڭتاردا استانا ۋاقىتى بويىنشا 17.47 دە الماتى وبلىستىق ت ج د- نىڭ ءبىرىڭعاي كەزەكشى-ديسپەتچەرلىك قىزمەتىنە 15.45 تە الاكول اۋدانىنداعى ءۇشارال قالاسىنان تالدىقورعانعا قاراي اۋرۋحاناعا «اسپان» اكسيونەرلىك قوعامىنىڭ مەنشىگىندەگى UP- MD 600-N ازاماتتىق تىكۇشاعىنىڭ ناۋقاس بالانى الىپ شىققانى تۋرالى حابارلاما كەلىپ تۇسكەنىن ايتقان بولاتىن. تىكۇشاق بورتىندا بولعان بەس ادام قازا تاپقان.

مي-8 تىكۇشاعىنىڭ اپاتى

2019-جىلى 27-ناۋرىزدا قازاقستان قك اقك اسكەري اۋە كۇشتەرىنىڭ تىكۇشاعى اپاتقا ۇشىرادى. قىزىلوردا وبلىسىنداعى جالاعاش اۋدانىنىڭ ماڭىندا مي-8 تىكۇشاعى اپاتى سالدارىنان 13 اسكەري قازا تاپقان. ءتورت تىكۇشاق اقتاۋ قالاسىنان شىمكەنتكە قاراي باعىت العان ەدى. ۇشۋ تۇنگى ۋاقىتتا مەتەورولوگيالىق قيىن جاعدايدا كەشەندى تەكسەرىس جانە «التىن جەبە» ارنايى بولىمشەلەرىنىڭ جاتتىعۋى اياسىندا ىسكە اسىرىلعان.

Fokker 100 ۇشاعىنىڭ اپاتى

2019-جىلى 27-جەلتوقسان كۇنى تاڭەرتەڭ Bek Air اۋە كومپانياسىنىڭ الماتىدان نۇر-سۇلتانعا باعىت العان Fokker 100 ۇشاعى اۋەلى راداردان جوعالىپ كەتتى. كەيىن 93 جولاۋشى مەن ەكيپاجدىڭ بەس مۇشەسى مىنگەن ۇشاقتىڭ الماتى ماڭىندا اپاتقا ۇشىراعانى بەلگىلى بولدى. اۋەلى 15 ادام قازا تاپقانى حابارلاندى، كەيىن ىشكى ىستەر مينيسترلىگى مەن الماتى اكىمىنىڭ باسپا ءسوز قىزمەتى قۇرباندار سانى 12 ەكەنىن جانە 68 ادام جاراقات العانىن ناقتىلادى. 2019-جىلدىڭ 28-جەلتوقسانى جالپىۇلتتىق ازا تۇتۋ كۇنى بولىپ جاريالاندى.

ەسكە سالايىق، 25-جەلتوقساندا اقتاۋ ماڭىندا ۇشاق اپاتقا ۇشىرادى. ۇشاق باكۋدەن گروزنىيعا ۇشىپ بارا جاتقان. بۇل ۇشاق Azerbaijan Airlines اۆياكومپانياسىنا تيەسىلى. ۇشاق بورتىندا 67 ادام، ونىڭ ىشىندە 5 ەكيپاج مۇشەسى بولعان.

كەيىنىرەك توتەنشە جاعدايلار دەپارتامەنتى وقيعا ورنىنا باردى. قۇتقارۋشىلار جەتكەن كەزدە ۇشاق ورتەنىپ جاتقانى انىقتالدى.

قازاقستاننىڭ كولىك مينيسترلىگى دە توتەنشە جاعدايعا بايلانىستى مالىمدەمە جاسادى.

توتەنشە جاعدايلار دەپارتامەنتى اقتاۋدا اپاتقا ۇشىراعان ۇشاقتان 25 ادام امان قالعانىن مالىمدەدى.

«زارداپ شەككەندەر بويىنشا اقپارات ناقتىلانىپ جاتىر. الدىن الا بولجام بويىنشا امان قالعان 25 ادام بار، ونىڭ ىشىندە 22 ادام اۋرۋحاناعا جەتكىزىلدى»، - دەلىنگەن حابارلامادا.

Massaget.kz